OWO oro ọtọn̄de edọn̄ mi edi Stephen. Enye edi mbet akpanikọ Jesus. Edi se se itịbede inọ enye idahaemi! Mme owo emi ke ẹtop ikpọ itiat ẹtọ enye. Ntak emi mmọ ẹsuade Stephen ntem tutu mmọ ẹnam enye n̄kpọ ndịk emi? Yak ise.

Abasi ke an̄wam Stephen ndinam mme utịbe n̄kpọ. Mme owo ẹmi imaha emi, ntre mmọ ẹdụk ke mfan̄a ye enye ẹban̄a enye ndikpep mme owo akpanikọ. Edi Abasi ọnọ Stephen akwa ifiọk, ndien Stephen owụt nte mme owo ẹmi ẹkpepde nsu. Emi anam mmọ ẹkam ẹyat esịt ẹkan. Ntre mmọ ẹmụm enye, ẹnyụn̄ ẹkot mme owo ẹdisu nsu ẹdian enye.

Akwa oku obụp Stephen: ‘Nte mme n̄kpọ ẹmi edi akpanikọ?’ Stephen ọbọrọ ke ndinọ eti utịn̄ikọ Bible. Ke utịt, enye etịn̄ nte mme idiọk owo ẹkesuade mme prọfet Jehovah ke eset. Ndien enye ete: ‘Mbufo ẹtie ukem nte mmọ oro. Mbufo ẹma ẹwot Jesus isụn̄utom Abasi, ndien mbufo inịmke mme ibet Abasi.’

Emi anam mme adaiso ido ukpono ẹmi ẹtịm ẹyat esịt. Mmọ ẹta edet ke uyat. Edi do, Stephen emenede ibuot ke enyọn̄, ọdọhọ: ‘Sese! Mmokụt Jesus adade ke ubọk nnasia Abasi ke heaven.’ Ke emi, mme owo ẹmi ẹsịri utọn̄ mmọ ẹnyụn̄ ẹbụmede ẹbịne Stephen. Mmọ ẹmụm enye ẹdudi ẹwọrọ ke obio.

Mi, mmọ ẹsion̄o mme ọfọn̄ mmọ ẹnọ akparawa oro Saul ekpeme. Nte omokụt Saul? Ekem ndusụk owo oro ẹtọn̄ọ nditop itiat ntọn̄ọ Stephen. Stephen ọtọn̄ọ ẹdọn̄, nte afo ekemede ndikụt, ndien enye ọbọn̄ akam ọnọ Abasi: ‘Jehovah, kumia mmọ ufen uban̄a idiọkn̄kpọ emi.’ Enye ọfiọk ke mme adaiso ido ukpono ẹbian̄a ndusụk mmọ. Ke oro ebede, Stephen akpa.

Ke owo anamde fi idiọkn̄kpọ, nte afo emesidomo ndinam enye idiọk ke usiene, midịghe afo eben̄e Abasi anam enye idiọk? Stephen mme Jesus ikanamke oro. Mmọ ẹma ẹfọn ido ye idem mmọ oro mikọfọnke ido ye mmọ. Yak idomo ndikpebe uwụtn̄kpọ mmọ.