NTE ọmọfiọk se ekpri eyenan̄wan oro ye mme ufan esie ẹkotde? Ih, edi ukem n̄wed emi afo okotde—N̄wed Mi eke Mme Mbụk Bible. Ndien mmọ ẹkot kpasụk ukem mbụk emi afo okotde—“Nte Ikemede Ndidu ke Nsinsi.”

Nte ọmọfiọk se mmọ ẹkpepde? Ke akpa, nte ke oyom nnyịn ifiọk iban̄a Jehovah ye Jesus Eyen esie edieke anade idu ke nsinsi. Bible ọdọhọ ete: ‘Usụn̄ ndidu ke nsinsi edi emi. Kpep ban̄a Abasi akpanikọ kiet, ye Jesus Christ, Eyen oro enye ọkọdọn̄de ke isọn̄.’

Didie ke nnyịn ikeme ndikpep mban̄a Jehovah Abasi ye Jesus Eyen esie? Usụn̄ kiet edi ndikọt N̄wed Mi eke Mme Mbụk Bible tọn̄ọde ke ntọn̄ọ sịm utịt. Enye etịn̄ ekese aban̄a Jehovah ye Jesus, nte itịn̄ke? Ndien enye etịn̄ ekese n̄kpọ oro mmọ ẹkenamde ye oro mmọ ẹdisụk ẹnamde. Edi oyom nnyịn inam ikan kpasụk edikot n̄wed emi.

Nte omokụt n̄wed eken oro anade ke isọn̄? Edi Bible. Nam owo okot mme ikpehe Bible oro mme mbụk n̄wed emi ẹkọn̄ọde ọnọ fi. Bible ọnọ nnyịn ọyọhọ ntọt oro iyomde man nnyịn kpukpru ikeme ndinam n̄kpọ Jehovah ke nen nen usụn̄ inyụn̄ inyene nsinsi uwem. Ntre nnyịn ikpenyene ndinyene mbumehe ndikpep Bible kpukpru ini.

Edi edinyụn̄ n̄kpep mban̄a Jehovah Abasi ye Jesus Christ ikemke. Nnyịn ikpenyene uwak uwak ifiọk iban̄a mmọ ye mme ukpepn̄kpọ mmọ, edi kpa ye oro inyeneke nsinsi uwem. Nte ọmọfiọk n̄kpọ efen ẹyomde?

Oyom nnyịn n̄ko idu uwem ekem ye mme n̄kpọ nnyịn ikpepde. Nte afo emeti Judas Is·carʹi·ot? Enye ekedi kiet ke otu 12 oro Jesus ekemekde ndidi mme apostle esie. Judas ama enyene uwak ifiọk aban̄a Jehovah ye Jesus. Edi nso ikotịbe inọ enye? Ke ndusụk ini ebede, enye ama akabade edi ibụk, ndien akatap Jesus ọnọ mme asua esie ke mbak silver 30. Ntre Judas idibọhọ nsinsi uwem.

Nte emeti Ge·haʹzi, owo oro nnyịn ikekpepde iban̄a ke Mbụk 69? Enye okoyom ndinyene ndusụk ọfọn̄ ye okụk oro mikedịghe esie. Ntre, enye ama osu nsu ndibọ mme n̄kpọ emi. Edi Jehovah ama amia enye ufen. Ndien enye eyemia nnyịn n̄ko ke nnyịn minịmke mme ibet esie.

Edi ediwak nti owo edu ẹnamde n̄kpọ Jehovah ofụri ini ke mbuọtidem. Nnyịn iyom nditie nte mmọ, nte iyomke? Ekpri Samuel edi eti uwụtn̄kpọ nditiene. Ti, nte nnyịn ikokụtde ke Mbụk 55, enye ekedi isua inan̄ mme ition kpọt ke ọtọn̄ọde ndinam n̄kpọ Jehovah ke ataya esie. Ntre ikereke adan̄a nte afo ekpride, afo ukprike ukaha ndinam n̄kpọ Jehovah.

Ke akpanikọ, owo oro nnyịn kpukpru iyomde ndikpebe edi Jesus Christ. Idem ke ekedide ekpri eyen, nte ẹkewụtde ke Mbụk 87, enye ama odu do ke temple etịn̄ ikọ ye mmọ efen aban̄a Ete esie eke heaven. Yak ikpebe uwụtn̄kpọ esie. Yak itịn̄ inọ ediwak owo nte ikekeme iban̄a utịbe Abasi nnyịn Jehovah ye Jesus Christ, Eyen esie. Ke nnyịn inamde mme n̄kpọ emi, do iyekeme ndidu uwem nsinsi ke obufa paradise Abasi ke isọn̄.