UKPEPN̄KPỌ 16
Se Jesus Akanamde Ini Odude ke Isọn̄
Ediwak owo ẹma ẹkokop ẹsiakde Jesus, se isidụkke mmọ ibuot esidi nsekeyen emi esịnede ke usịnudia ufene, owo emi ọkọn̄ọde ke eto ndutụhọ ekpere n̄kpa, m̀mê prọfet emi ekenen̄erede ọdiọn̄ọ n̄kpọ. Ndi emekere ke imekeme ndikpep ediwak n̄kpọ mban̄a Jesus, ikpeneme iban̄a uwem esie mi ke isọn̄? Ke ukpepn̄kpọ emi, iyeneme ndusụk akpan n̄kpọ oro Jesus akanamde ye nte oro ekemede ndin̄wam fi.
1. Nso ikedi akpan utom Jesus?
Akpan utom Jesus ekedi “nditan̄a eti mbụk obio ubọn̄ Abasi.” (Kot Luke 4:43.) Enye ekesikwọrọ ke Abasi ayada Obio Ubọn̄ Abasi, m̀mê ukara Abasi, anam ofụri afanikọn̄ ererimbot emi etre. a Jesus ama ada ofụri isua ita ye ubak ọkwọrọ nti n̄kpọ emi ukara Abasi edinamde, ikpaha mba.—Matthew 9:35.
2. Ntak emi Jesus ekesinamde utịben̄kpọ?
Bible etịn̄ ediwak “utom odudu ye mme utịben̄kpọ ye mme idiọn̄ọ oro Abasi akadade [Jesus] anam.” (Utom 2:22) Abasi ama ọnọ Jesus odudu anam oyobio etre, inyan̄ odobo, ọnọ ediwak tọsịn owo udia, ọkọk mme owo udọn̄ọ, onyụn̄ anam mme akpan̄kpa ẹset. (Matthew 8:23-27; 14:15-21; Mark 6:56; Luke 7:11-17) Ofụri utịben̄kpọ oro Jesus akanamde owụt ke Abasi ọkọdọn̄ enye edi isọn̄, ke Abasi onyụn̄ ekeme ndikọk kpukpru mfịna nnyịn.
3. Nso ke ikeme ndikpep nto Jesus?
Jesus ekesinam se Jehovah Abasi amade kpukpru ini. (Kot John 8:29.) Kpa ye oro mme asua ẹkebiọn̄ọde enye, enye ama anam se Ete esie oyomde tutu esịm usen emi enye ọkọduọkde akpatre ibifịk. Jesus ama owụt ke owo ekeme ndinam se Abasi amade, ọkpọkọm n̄kpọ etie didie. Enye ama enịm ‘uwụtn̄kpọ ọnọ nnyịn man ikpetiene nde ikpat esie ketket.’—1 Peter 2:21.
SỊN IDEM KPEP
Se nte Jesus ọkọkwọrọde eti mbụk onyụn̄ anamde utịben̄kpọ.
4. Eti mbụk ke Jesus ekesikwọrọ
Jesus ama esisan̄a ata ediwak kilomita ke usụn̄ emi etiede ntọn̄ ntọn̄ ọkwọrọ eti mbụk, m̀mê etịn̄ se Abasi aduakde ndinam, ọnọ ediwak owo nte enye ekekeme. Kot Luke 8:1, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ndi otuowo emi ẹkesikade ẹbịne Jesus kpọt ke Jesus ekesikwọrọ ikọ ọnọ?
-
Nso ke Jesus ekesinam man okụt mme owo ọkwọrọ ikọ ọnọ?
Abasi ama etetịn̄ ke eti mbụk ke Messiah edikwọrọ. Kot Isaiah 61:1, 2, ekem ẹbọrọ mbụme emi ẹnyụn̄ ẹneme ẹban̄a mmọ:
-
Didie ke Jesus akanam se ẹma ẹketetịn̄ emi?
-
Ndi emekere ke ọfọn mme owo mfịn ẹkop eti mbụk oro ẹtịn̄de mi?
5. Jesus ekesikpep mme owo ata nti n̄kpọ
Jesus ama esikwọrọ nti n̄kpọ oro ukara Abasi edinamde, onyụn̄ ekpep mme owo nti n̄kpọ emi ekemede ndin̄wam owo ke usen ke usen. Ndusụk se enye ekekpepde odu ke ọwọrọetop ukwọrọikọ emi enye ọkọkwọrọde ke obot. Kot Matthew 6:14, 34 ye 7:12, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ewe nti item ke Jesus ọkọnọ ke mme itie Bible oro?
-
Ndi emekere ke nti item oro ẹkeme ndin̄wam owo mfịn?
6. Jesus ama esinam utịben̄kpọ
Jehovah ama ọnọ Jesus odudu anam ediwak utịben̄kpọ. Ke uwụtn̄kpọ, kot Mark 5:25-34 mîdịghe se VIDIO emi. Ekem ẹbọrọ mbụme oro ẹtienede ẹnyụn̄ ẹneme ẹban̄a mmọ.
-
Nso ke eyenan̄wan oro ọkọdọn̄ọde do ekenen̄ede enịm?
-
Nso ke afo ama ke utịben̄kpọ oro?
Kot John 5:36, ekem ẹbọrọ mbụme emi ẹnyụn̄ ẹneme ẹban̄a enye:
-
Nso ke nsio nsio utịben̄kpọ oro Jesus akanamde owụt?
Ndi ọmọdiọn̄ọ?
Ediwak n̄kpọ emi idiọn̄ọde iban̄a Jesus odu ke Bible ke n̄wed Matthew, Mark, Luke, ye John. Enyene nsio nsio n̄kpọ emi mmọ kiet kiet ẹwetde ẹsịn ke mbụk mmọ ẹban̄a Jesus. Kpukpru n̄kpọ oro anam inen̄ede idiọn̄ọ owo emi Jesus ekedide.
-
MATTHEW
ekebem iso ewet n̄kpọ aban̄a Jesus. N̄wed esie enen̄ede aban̄a se Jesus ekekpepde mme owo, akpan akpan se enye ekekpepde aban̄a Obio Ubọn̄ Abasi.
-
MARK
ekewet n̄wed emi ekpride akan aban̄a Jesus. N̄wed esie ọdọn̄ọ ediwak mbụk oro esidọn̄de-dọn̄ owo ndikop.
-
LUKE
ekenen̄ede ewet n̄kpọ aban̄a akam Jesus ye nte Jesus ekesinamde n̄kpọ ye iban.
-
JOHN
anam inen̄ede idiọn̄ọ ido ye edu Jesus, sia enye ama ewet ediwak nneme emi Jesus ekenemede ye mme ufan esie ye mbon en̄wen.
NDUSỤK OWO ẸSIDỌHỌ ẸTE: “Jesus edi Ata Ọkpọsọn̄ Abasi.”
-
Afo ekere didie?
SE IKPEPDE
Jesus ama esikwọrọ aban̄a Obio Ubọn̄ Abasi; enye ama esinam utịben̄kpọ onyụn̄ anam se Jehovah amade kpukpru ini.
Se M̀mê Emeti
-
Nso ikedi akpan utom Jesus?
-
Nso ke nsio nsio utịben̄kpọ oro Jesus akanamde owụt?
-
Ewe nti n̄kpọ emi ekemede ndin̄wam owo ke usen ke usen ke Jesus ekekpep?
KPEP N̄KPỌ EN̄WEN
Nso ke Jesus ekesima nditịn̄ mban̄a?
“Nte Jesus Adade Obio Ubọn̄ Abasi” (Enyọn̄-Ukpeme, October 1, 2014)
Se nsio nsio n̄kpọ oro owụtde ke Jesus ama esinam utịben̄kpọ.
“Mme Utịben̄kpọ Jesus—Nso ke Afo Ekeme Ndikpep Nto Mmọ?” (Enyọn̄-Ukpeme, July 15, 2004)
Kot se se ikanamde ete kiet okpụhọde ke ama ekedidiọn̄ọ ke Jesus ikesikereke iban̄a idemesie.
“N̄kesikere Mban̄a Idemmi Ikpọn̄” (Enyọn̄-Ukpeme, October 1, 2014)
Se mme akpan n̄kpọ emi Jesus akanamde ini ọkọkwọrọde ikọ mi ke isọn̄, ke adiana ke adiana.
“Mme Akpan N̄kpọ Emi Aban̄ade Uwem Jesus ke Isọn̄” (Se Idin̄wamde Fi Ekpep Ikọ Abasi, Ikpehe 4-B)
a Ukpepn̄kpọ 31 esịm 33, enen̄ede aban̄a Obio Ubọn̄ Abasi.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
