UKPEPN̄KPỌ 38
Wụt ke Amama Uwem
Awak n̄kpọ emi ekemede ndinam uwem enem nnyịn. Idem ekpededi inyene mfịna, imosụk ikeme ndikop inem uwem. Didie ke ikeme ndiwụt Jehovah ke imama uwem? Nso idi ata akpan ntak anade inam oro?
1. Ntak ọfọnde iwụt ke imama uwem?
Ọfọn iwụt ke imama uwem sia edima Ete nnyịn Jehovah ọkọnọ nnyịn uwem. Enye edi “ntọn̄ọ uwem”—enye okobot kpukpru mme odu-uwem n̄kpọ. (Psalm 36:9) “Enye ọnọ kpukpru owo uwem ye ibifịk ye kpukpru n̄kpọ.” (Utom 17:25, 28) Jehovah ọnọ nnyịn kpukpru se inịmde nnyịn uwem. Enye inọhọ nnyịn se inịmde nnyịn uwem kpọt, edi ọnọ se inamde nnyịn ikeme ndikop inem uwem n̄ko.—Kot Utom 14:17.
2. Didie ke ikeme ndiwụt Jehovah ke imama uwem emi enye ọnọde nnyịn?
Toto ke usen eka fo okoyomode fi, ke Jehovah Abasi ọkọtọn̄ọ ndise mban̄a fi. David ama ọdọhọ Jehovah ini spirit okodorode David ke idem ete: “Enyịn fo ama okụt mi ke ini n̄kedide ọbọn̄eyen.” (Psalm 139:16) Uwem fo ọsọn̄ urua etieti ke enyịn Jehovah. (Kot Matthew 10:29-31.) Esibiak Jehovah tutu owo okpokokoi owot owo m̀mê owot idem. a (Exodus 20:13) Esibiak Jehovah n̄ko edieke ikoide-koi inam n̄kpọ emi ekemede ndiwot nnyịn m̀mê edieke nnyịn mînamke se akpanade inam man nnyịn idiwot owo. Edieke isede iban̄a idem nnyịn, inyụn̄ ikpemede idem man nnyịn idinam se ikemede ndiwot owo, iwụt Jehovah ke imama uwem.
SỊN IDEM KPEP
Se ndusụk n̄kpọ emi afo ekemede ndinam man owụt ke amama uwem.
3. Se ban̄a idemfo
Mme Christian emi ẹyakde idem ẹnọ Jehovah ẹsida ofụri se mmọ ẹnyenede ẹnam n̄kpọ esie. Ntre, ana mmọ ẹtịm idem ẹkama, sia Ikọ Abasi ọdọhọ mmọ ete: “Ẹda idem mbufo ẹnọ Abasi nte . . . uwa emi asanade.” Kot Rome 12:1, 2, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ntak emi ekpesitịmde idem akama?
-
Nso ye nso ke akpanam man owụt ke emetịm idemfo akama?
4. Kpeme idem man udûnọ owo unan m̀mê udûwot owo
Bible owụt ke ọfọn ikpeme idem man nnyịn idinọ idem nnyịn m̀mê owo en̄wen unan m̀mê idiwot owo. Se VIDIO emi ke oyokụt se ikemede ndin̄wam fi.
Kot Mme N̄ke 22:3, ekem ẹneme nte owo ekpekpemede idem man idinọ owo unan m̀mê idiwot owo . . .
-
ke ufọk.
-
ke itieutom.
-
ini enye esịn̄erede idem.
-
ini enye awatde m̀mê adade masịn anam utom.
5. Kûwot eyen emi mîmanake kan̄a
David ama etịn̄ ke Jehovah esikụt kpukpru se itịbede inọ eyen emi ọtọn̄ọde ndiboro ke esịt idịbi. Kot Psalm 139:13-17, ekem ẹbọrọ mbụme emi ẹnyụn̄ ẹneme ẹban̄a enye:
-
Ke enyịn Jehovah, ini ewe ke eyen esitọn̄ọ edi owo—ndi esidi ke ini eka amande enye m̀mê ke ini eka odụkde idịbe esie?
Jehovah ama ọnọ nditọ Israel eset ibet man n̄kpọ idinam n̄wan idịbi, idinyụn̄ inam eyen esie ke idịbi. Kot Exodus 21:22, 23, ekem ẹbọrọ mbụme emi ẹnyụn̄ ẹneme ẹban̄a mmọ:
-
Jehovah ekesida didie owo emi eduede owot eyen ke idịbi?
-
Ekere ke enye ada didie owo emi okoide-koi owot eyen ke idịbi? b
-
Nte Abasi adade n̄kpọ emi etie fi didie?
Ndusụk ini, n̄wan emi ọdiọn̄ọde ke uwem ọsọn̄ urua ekeme ndikere ke imọ ikanke inyan̄a, ke ana ision̄o idịbi. Kot Isaiah 41:10, ekem ẹbọrọ mbụme emi ẹnyụn̄ ẹneme ẹban̄a mmọ:
-
Edieke enyịkde n̄wan ẹte osion̄o idịbi, anie ke enye ọkpọdọhọ an̄wam enye? Nso inam ọdọhọ ntre?
NDUSỤK OWO ẸSIDỌHỌ ẸTE: “N̄wan enyene unen ndision̄o idịbi sia enye enyene idemesie.”
-
Nso inam fi enịm ke uwem n̄wan emi asan̄ade ye idịbi ye uwem eyen emi esịnede enye ke idịbi ọsọn̄ urua ke enyịn Jehovah?
SE IKPEPDE
Bible ekpep nnyịn ete ida uwem ke akpan n̄kpọ, inyụn̄ ikpeme uwem nnyịn ye eke mbon en̄wen, sia uwem edi enọ Abasi.
Se M̀mê Emeti
-
Nso inam uwem owo ọsọn̄ urua ke enyịn Jehovah?
-
Esitie Jehovah didie owo okpokokoi owot idemesie m̀mê owo en̄wen?
-
Nso inam fi ama uwem emi Abasi ọnọde fi?
KPEP N̄KPỌ EN̄WEN
Didie ke ikpowụt Jehovah ke imama uwem emi enye ọnọde nnyịn?
Se nte ẹbọrọde mbụme emi, Ndi Abasi eyefen ọnọ n̄wan emi okosion̄ode idịbi?
Se nte ndida uwem nte Abasi adade ekemede ndinam isibre eti mbre kpọt.
“Ndi Mbre M̀mê Mbuba Emi Ekemede Ndida Owo Ibuot Ọdiọk?” (g00-E 10/8)
Se nte Bible ekemede ndin̄wam owo emi ekerede ndiwot idem.
“N̄kpa Ọdọn̄ Mi—Ndi Bible Ekeme Ndin̄wam Mi Ọkpọdọn̄ Mi Ndiwot Idem?” (Odu ke jw.org)
a Jehovah enen̄ede ekere aban̄a mbon emi esịt obụn̄ọde. (Psalm 34:18) Enye esidiọn̄ọ ini n̄kpọ abiakde owo tutu owo ekere ke n̄kpa imọ ọfọn akan uwem; enye onyụn̄ ada ke ukot ndin̄wam nnyịn. Okpoyom ndidiọn̄ọ nte Jehovah esin̄wamde owo emi ekerede ndiwot idem okpụhọde ekikere, kot ibuotikọ emi “N̄kpa Ọdọn̄ Mi—Ndi Bible Ekeme Ndin̄wam Mi Ọkpọdọn̄ Mi Ndiwot Idem?” Ibuotikọ oro odu ke Kpep N̄kpọ En̄wen, eke ukpepn̄kpọ enye emi.
b Mbon emi ẹkesion̄ode idịbi ikpenyeneke nditie n̄kpa mfụhọ—Jehovah ekeme ndifen nnọ mmọ. Okpoyom ndinen̄ede ndiọn̄ọ, kot ibuotikọ emi “Nso ke Bible Etịn̄ Aban̄a Usion̄ọ-Idịbi?” Ibuotikọ oro odu ke Kpep N̄kpọ En̄wen, eke ukpepn̄kpọ enye emi.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
