ẸDỌHỌ ke ntọn̄ọikọ emi ọwọrọ etop akan kpukpru ikọ emi akanam ẹwetde: “Ke editọn̄ọ Abasi okobot enyọn̄ ye isọn̄.” (Genesis 1:1) Bible ada mmemmem n̄kpọsọn̄ ikọ emi owụt nnyịn ata akpan Owo emi N̄wed Abasi enen̄erede etịn̄ aban̄a, oro edi Jehovah Ata Ọkpọsọn̄ Abasi. Akpa ufan̄ikọ ke Bible owụt ke Abasi okobot akaka ekondo emi, esịnede isọn̄ emi nnyịn idụn̄de mi. Mme ufan̄ikọ oro ẹtienede ẹtịn̄ ẹban̄a anyan ini, oro ẹkotde usen, emi Abasi akadade etịm isọn̄ emi ọnọ nnyịn idụn̄, onyụn̄ obot kpukpru mme enyene-ndyọ n̄kpọ emi ẹdude ke ekondo.

Owo edi akakan ke otu n̄kpọ oro Abasi okobotde mi ke isọn̄. Abasi okobot owo ke mbiet idemesie—ntak edi oro mme owo ẹnyenede ukem edu Jehovah, utọ nte ima ye ọniọn̄. Abasi akada ntan obot Adam onyụn̄ esịn enye ke Paradise m̀mê In̄wan̄ Eden. Abasi ọkọtọ in̄wan̄ oro ke idemesie, onyụn̄ ọtọ ndiye eto emi ẹn̄wụmde nti mfri.

Abasi ama okụt ke ọfọn Adam enyene nsan̄a. Ntre enye ama osio ọkpọn̄kan̄ Adam kiet anam n̄wan ọnọ Adam, ndien Adam okot enye Eve. N̄kpọ emi ama enem Adam tutu enye atan̄ ase ete: “N̄wan emi ndien edi ọkpọ eke otode ke ọkpọ mi, ye obụk eke otode ke obụk mi.” Abasi ọdọhọ ete: “Mmọdo owo edikpọn̄de ete esie ye eka esie, edinyụn̄ adiana ye n̄wan esiemmọ; ndien mmọ ẹyekabade obụk kiet.”—Genesis 2:22-24; 3:20.

Abasi ama ọnọ Adam ye Eve ewụhọ iba. Akpa, enye ọkọdọhọ mmọ ẹdiọn̄ ebietidụn̄ mmọ ẹnyụn̄ ẹtọt ẹyọhọ isọn̄. Ọyọhọ iba, enye ọkọdọhọ mmọ ẹkûdia mfri eto kiet ke otu kpukpru eto oro okodude ke akwa in̄wan̄ oro, “eto ifiọk, eti ye idiọk.” (Genesis 2:17) Edieke mmọ ẹtụtde utọn̄ ẹdia mfri eto oro, mmọ ẹyekpan̄a. Abasi akada mme ewụhọ emi ọnọ mmọ ifet ndiwụt ke mmimọ imenyịme Abasi akara mmimọ. Edieke mmọ ẹnịmde mme ewụhọ emi, oro oyowụt ke mmọ ẹma ẹnyụn̄ ẹnyene esịtekọm ẹban̄a se Abasi anamde ọnọ mmọ. Mmọ ẹma ẹnyene eti ntak ndinịm ewụhọ emi. Mmọ ẹma ẹfọn ẹma. Bible ọdọhọ ete: “Abasi okụt kpukpru se enye akanamde, ndien, sese ẹfọn eti eti.”—Genesis 1:31.

—Ẹda ẹto Genesis ibuot 1 ye 2.