NSO ikedi akpan ntak emi Jesus ekedide isọn̄? Enye ke idemesie ọkọdọhọ ete: “Ana ntan̄a eti mbụk obio ubọn̄ Abasi . . . koro ẹkesio mi ẹdọn̄ ẹte ndinam emi.” (Luke 4:43) Ẹyak ineme n̄kpọ inan̄ oro Jesus ekekpepde mme owo aban̄a Obio Ubọn̄ oro, sia emi ekedide akpan ibuotikọ esie.

1. Jesus edidi Edidem. Jesus ama etịn̄ nnennen nnennen ete ke imọ idi Messiah oro ẹken̄wọn̄ọde. (John 4:25, 26) Enye ama onyụn̄ owụt ke imọ idi Edidem oro prọfet Daniel okokụtde ke n̄kukụt. Jesus ama ọdọhọ mme apostle esie ete ke usen kiet imọ iyetie ke “ebekpo ubọn̄” ndien ke mmọ ẹyenyụn̄ ẹtiene ẹtie ke mme ebekpo. (Matthew 19:28) Enye okokot mbon oro ẹditienede enye ẹkara mi, “ekpri otuerọn̄,” onyụn̄ ọdọhọ ke imọ imenyene “mme erọn̄ en̄wen” emi mîdụhe ke otu oro.—Luke 12:32; John 10:16.

2. Ẹdikpe edinen ikpe ke Obio Ubọn̄ Abasi. Jesus ama ọdọhọ ke Obio Ubọn̄ oro oyosio akakan ukwan̄ikpe efep ke ndinam enyịn̄ Jehovah Abasi asana ọbọhọ kpukpru isụn̄i oro Satan ekemende odori enyịn̄ oro toto ke ini enye akanamde Adam ye Eve ẹsọn̄ ibuot ye Abasi ke Eden. (Matthew 6:9, 10) Nte Jesus ekesikwọrọde ikọ ọnọ irenowo ye iban, imọ ye ubuene, kpukpru usen, ama owụt ke enye inamke asari. Okposụkedi emi enye ekenen̄ede edi ndikpep Israel n̄kpọ, enye ama esinyụn̄ an̄wam mbon Samaria ye mme Gentile m̀mê mbon oro mîdịghe mme Jew. Enye ikanamke asari nte mme adaiso ido ukpono oro ẹkedude ini oro, inyụn̄ imaha ndusụk owo isua mbon eken.

3. Obio Ubọn̄ Abasi ididịghe ubak ererimbot emi. Ndutịme ukaraidem ama ọsọn̄ odudu etieti ke ini Jesus okodude ke isọn̄. Odudụn̄ akakara obio emana esie. Kpa ye oro, ke ini mme owo ẹkedomode ndimụm Jesus nnịm nte edidem, enye ama efehe. (John 6:14, 15) Enye ama ọdọhọ owo ukara kiet ete: “Obio ubọn̄ mi idịghe ubak ererimbot emi.” (John 18:36) Onyụn̄ ọdọhọ mme mbet esie ete: “Mbufo [idịghe] ubak ererimbot.” (John 15:19) Enye ikayakke mmọ ẹkama n̄kpọ en̄wan, idem ndida n̄n̄wana nnọ enye.—Matthew 26:51, 52.

4. Christ edikara ke ima. Jesus ama ọdọhọ ke imọ iyọnọ mme owo nduọkodudu inyụn̄ inam mbiomo mmọ efere. (Matthew 11:28-30) Enye ama onyụn̄ anam emi. Enye ama ọnọ ima ima nti item ke nte ẹkpeyọde editịmede esịt, nte ẹkpenyenede eti itie ebuana ye kiet eken, nte ẹkpefepde uma-inyene, ye nte ẹkpekopde inemesịt. (Matthew, ibuot 5-7) Kpukpru orụk owo ẹma ẹsisan̄a ẹkpere enye, sia enye ama ama mme owo. Idem mbon oro ẹkefịkde ẹma ẹsika ẹbịne enye ye idotenyịn ke enye ọyọfọn ido ye mmimọ onyụn̄ anam n̄kpọ ye mmimọ ke ukpono. Nso eti Andikara ke Jesus edidi ntem!

Jesus ama onyụn̄ ada ata eti usụn̄ efen ekpep mme owo n̄kpọ aban̄a Obio Ubọn̄ Abasi. Oro edi, enye ama esinam mme utịben̄kpọ. Ntak emi enye akanamde emi? Ẹyak ise.

—Ẹda ẹto n̄wed Matthew, Mark, Luke, ye John.