ABASI ama ọnọ Jesus odudu ndinam mme n̄kpọ oro mme owo mîkemeke ndinam. Jesus ama anam ata ediwak ikpọ utịben̄kpọ, ndien enye akanam ediwak utịben̄kpọ esie ke iso ediwak ntiense. Mme utịben̄kpọ oro ẹkewụt ke Jesus enyene odudu akan mme asua, enye onyụn̄ enyene odudu ekem ndision̄o mme afanikọn̄ oro mme anana-mfọnmma owo ẹsụk ẹtịmede ofụri anyan ini emi ndisio mfep, edi mmọ mîkemeke. Ẹyak ineme iban̄a ndusụk n̄kpọ emi.

Biọn̄. Akpa utịben̄kpọ oro Jesus akanamde ekedi ndinam mmọn̄ akabade ata edinem wine. Enye ama onyụn̄ ada uyo ye iyak ifan̄ ọbọk ata ediwak tọsịn owo ikaba. Ofụri ikaba emi, udia ama ekem mme owo ọyọhọ osụhọ.

Udọn̄ọ. Jesus ama ọkọk mbon oro ẹkedọn̄ọde “kpukpru orụk udọn̄ọ ye kpukpru orụk ndiọkidem.” (Matthew 4:23) Enye ama ọkọk nnan, inan, akpamfia, akpauben̄, mbụn̄ọ, ye mme ndo eken. Idụhe udọn̄ọ ndomokiet oro enye mîkekemeke ndikọk.

Oyobio. Ke ini Jesus ye mme mbet esie ẹkewatde ubom ẹyom ndibe Inyan̄ Galilee, ata ọkpọsọn̄ oyobio ama ọtọn̄ọ. Ndịk ama anam mme mbet esie. N̄kukụre se Jesus akanamde ekedi ndidọhọ: “Dobo! Na sụn̄!” Ndien ofụm odobo onyụn̄ ana sụn̄. (Mark 4:37-39) Odu ini emi enye okonyụn̄ asan̄ade ke enyọn̄ mmọn̄ ke ini akpa akadahade.—Matthew 14:24-33.

Mme demon. Mme demon ẹnen̄ede ẹnyene odudu ẹkan mme owo. Ediwak owo ikemeke ndinyan̄a idem nsio ke ubọk mme asua Abasi emi. Edi Jesus ama ebịn ndiọi spirit emi ediwak ini osion̄o ke idem mbon oro mmọ ẹketụhọrede. Enye ikabakke mmọ. Edi mme demon emi ẹkekam ẹbak Jesus sia mmọ ẹma ẹdiọn̄ọ owo emi Jesus edide.

N̄kpa. Enen̄ede odot ẹkot n̄kpa “akpatre asua” sia enye edide asua oro owo ndomokiet mîkemeke ubọk ye enye. (1 Corinth 15:26) Edi Jesus ama anam mme akpan̄kpa ẹset. Enye ama anam akparawa oro eka esie ekedide ebeakpa eset onyụn̄ anam ekpri eyenan̄wan emi ete ye eka esie ẹkefụhọde etieti eset. Enye emi akam akpade owo idem akan edi enye ndikanam Lazarus ufan esie oro ama akakpa usen inan̄ eset ke iso ediwak mbon oro ẹkesụk ẹtuan̄ade n̄kpa esie! Idem mbon oro ẹkenen̄erede ẹsua Jesus ẹma ẹkụt enye emi ikpọn̄ ẹnyụn̄ ẹnyịme ke edi utịben̄kpọ.—John 11:38-48; 12:9-11.

Ntak emi Jesus akanamde kpukpru utịben̄kpọ oro? Ndi mbon oro enye akanamde ẹset ikafiakke ikpa? Okposụkedi emi mbon oro ẹkefiakde ẹkpa, se Jesus akanamde oro ama enyene ata akamba ufọn. Mmọ ẹkewụt ke kpukpru ntịn̄nnịm ikọ oro ẹban̄ade se Messiah edinamde ke ini ukara esie, ẹyesu. Ufọn idụhe owo ndiyịk m̀mê Jesus, kpa Edidem emi Abasi emekde, eyekeme ndisio biọn̄, udọn̄ọ, oyobio, mme demon, m̀mê n̄kpa mfep. Se enye akanamde owụt ke Abasi ọnọnọ enye odudu ndinam kpukpru n̄kpọ oro.

—Ẹda ẹto n̄wed Matthew, Mark, Luke, ye John.