IDỤHE owo emi esịt mîsitịmekede, esịnede ikọt Abasi. Andiwet Psalm ọkọdọhọ ete: ‘Ediwak ekikere ẹtịmede mi esịt.’ (Psalm 94:19) Jesus ama onyụn̄ ọdọhọ ke “editịmede esịt uwem emi” ekeme ndinam ọsọn̄ nnyịn ndinam n̄kpọ Jehovah ke utịt ini emi. (Luke 21:34) Ndi mfịna okụk, mfịna ubon, m̀mê udọn̄ọ anam esịt etịmede fi? Didie ke Jehovah ekeme ndin̄wam fi ọyọ mme n̄kpọ emi?

Nnyịn imesiyom un̄wam ke ini esịt etịmerede nnyịn. Apostle Paul ọkọdọhọ ete: ‘Ẹfịk nnyịn ke kpukpru usụn̄, ekikere etịmede nnyịn, ẹnyụn̄ ẹduọk nnyịn ke isọn̄.’ Edi enye ama ọdọhọ n̄ko ete: “Ufan̄ ifahake nnyịn ibe nde,” “usụn̄ ubọhọ inanake ofụri ofụri,” owo inyụn̄ “isoboke nnyịn.” Nso isin̄wam nnyịn iyọ mfịna nnyịn? Edi “odudu eke ebede ukeme owo.” Jehovah, Ata Ọkpọsọn̄ Abasi, esinọ nnyịn odudu emi.​—2 Corinth 4:​7-9.

Ti nte Abasi ekesinọde fi “odudu eke ebede ukeme owo.” Ndi emeti utịn̄ikọ emi akanamde fi ọfiọk ke Jehovah enen̄ede ama fi? Ndi afo ndikesikpep mme owo ke isọn̄ ayakabade edi Paradise ikanamke enen̄ede enịm ke se Jehovah ọn̄wọn̄ọde oyosu? Ke ini idụkde mbono esop, inyụn̄ itịn̄de se ikpepde ke Bible inọ mme owo, emi esisọn̄ọ nnyịn idem ndiyọ n̄kpọ ekededi oro anamde esịt etịmede nnyịn, esịt esina nnyịn sụn̄, nnyịn imesinyụn̄ inam n̄kpọ Jehovah ye idatesịt.

Ekeme nditie fi nte ke se enyenede ndinam awak akaha. Ke uwụtn̄kpọ, Jehovah ọdọhọ nnyịn ibem iso iyom Obio Ubọn̄ esie inyụn̄ isio ini inịm inam mme n̄kpọ eken oro enye oyomde inam. (Matthew 6:33; Luke 13:24) Edi, ubiọn̄ọ, udọn̄ọ, m̀mê mfịna ubon ekeme ndinam ọsọn̄ fi ndinam se akpamade ndinam nnọ Abasi. Mîdịghe utom fo ekeme ndida ini ye odudu oro akpadade anam n̄kpọ Abasi. Edieke enyenede ediwak n̄kpọ ndinam ntem, edi unyeneke ini ye odudu ndinam mmọ, emi ekeme ndinam ibuot oyon̄ fi. Emekeme ndikam n̄kere ke se Jehovah oyomde anam ọsọn̄ akaha.

Jehovah ọfiọk se nnyịn ikemede ndinam. Enye ididọhọke inam se isọn̄de ikan nnyịn. Enye ọfiọk ke esida ini mbemiso nnyịn itọn̄ọ ndifre mban̄a mme n̄kpọ oro akanamde esịt etịmede nnyịn.​—Psalm 103:​13, 14.

Ke uwụtn̄kpọ, kere nte Jehovah ekesede aban̄a prọfet Elijah. Ke ini ndịk akanamde Elijah efehe aka wilderness, ndi Jehovah ama ayat esịt ye enye onyụn̄ ọdọhọ enye ọsọsọp aka akanam se imọ ikọdọn̄de enye? Baba. Jehovah ama ọdọn̄ angel utịm ikaba aka ekedemede Elijah ke idap onyụn̄ ọnọ enye udia adia. Kpa ye oro, ke usen  40 ama ekebe, Elijah okosụk okokop ndịk onyụn̄ atak ke ekikere. Nso en̄wen ke Jehovah akanam man an̄wam enye? Akpa, Jehovah ama anam n̄kpọ ndiwụt ke imekeme ndikpeme enye. Ọyọhọ iba, Jehovah ama ada “sụn̄sụn̄ ekpri uyo” ọdọn̄ enye esịt. Ke akpatre, Jehovah ama anam enye ọfiọk ke ediwak tọsịn owo ẹdu oro ẹtienede enye ẹnam n̄kpọ imọ. Ikebịghike, Elijah ama afiak ọtọn̄ọ esịn idem anam utom esie nte prọfet. (1 Ndidem 19:​1-19) Nso ke emi ekpep nnyịn? Ke ini esịt ekenen̄erede etịmede Elijah, Jehovah ama eme ime ye enye onyụn̄ atua enye mbọm. Jehovah ikpụhọkede. Enye ese aban̄a nnyịn mfịn nte ekesede aban̄a Elijah.

Fiọk se ekemede ndinam nnọ Jehovah. Kûmen se ekemede ndinam idahaemi udomo ye se ekesinamde. Ke uwụtn̄kpọ: Owo emi etrede ndifehe itọk ke ediwak ọfiọn̄ m̀mê ke ediwak isua ikemeke ndifiak ntọn̄ọ mfehe nte enye ekesifehede. Edieke enye ekesifehede itiat 20 akpa, idahaemi enye ekeme nditọn̄ọ ke ndifehe itiat 4 tutu enye enyene odudu ye ime ndifehe itiat 20 oro enye ekesifehede. Mme Christian ẹtie nte mme efehe itọk. Mmọ ẹfiọk ntak emi mmọ ẹfehede. (1 Corinth 9:​24-27) Mbọk fiak tọn̄ọ ndinam n̄kpọ Abasi; tọn̄ọ ye se ekemede ndinam. Ke uwụtn̄kpọ, emekeme nditọn̄ọ ndisika mbono esop ọkpọkọm ini kiet ke urua. Ben̄e Jehovah an̄wam fi anam emi. Nte akade iso anam emi, afo eyedikụt “nte Jehovah ọfọnde.” (Psalm 34:8) Ti ete ke Jehovah adara se ededi oro anamde ndiwụt ke amama enye, ọkpọkọm edi ekpri.​—Luke 21:​1-4.

Didie ke Jehovah akan̄wam June afiak etiene imọ? Enye ọdọhọ ete: “Mma nsibọn̄ akam nnọ Jehovah nte an̄wam mi. Ekem n̄wan eyen mi ama ọdọhọ ntiene mmimọ n̄ka mbono circuit oro ẹkenịmde ke edem nnyịn. Mma ntiene mmọ n̄ka. Ama enen̄ede enem mi ndifiak ndidu ye ikọt Jehovah! Mbono emi akan̄wam mi mfiak ntiene Jehovah. Idahaemi, ke nnam n̄kpọ Jehovah ye inemesịt. Uwem enen̄ede enem mi. Mmedifiọk n̄ko ke oyom ndian idem ye nditọete mi nnyụn̄ nnyịme mmọ ẹn̄wam mi. Mmọkọm Jehovah ke ini ikebehe ikaha ami ndifiak nnyọn̄ ntiene enye.”