Edima eyenete nnyịn:

Bible etịn̄ n̄kpọ aban̄a nsio nsio owo. Ediwak ke otu mmọ ẹma ẹsọn̄ọ ẹda ẹnam n̄kpọ Abasi kpa ye oro mmọ ẹkesobode mme afanikọn̄ oro nnyịn inyụn̄ isobode mfịn. N̄kpọ ama esitụk mmọ nte ‘esitụkde nnyịn.’ (James 5:17) Ndusụk mmọ ẹma ẹnyene ikpọ mfịna ẹnyụn̄ ẹkop editịmede esịt. Ndusụk ẹma ẹnen̄ede ẹyat esịt ke ntak se mbonubon m̀mê se ikọt Abasi eken ẹkenamde mmọ. Esịt ama esibiom mbon eken ke ntak idiọkn̄kpọ oro mmọ ẹkenamde.

Ndi mme owo emi ẹma ẹkpọn̄ Jehovah? Baba. Ediwak mmọ ẹma ẹtịn̄ se andiwet Psalm eketịn̄de ke akam, ete: “Mmoyo nte erọn̄ eke osopde. Mbọk yom asan̄autom fo, koro mmemfreke mme ewụhọ fo.” (Psalm 119:176) Ndi akanam emetịn̄ se ẹtịn̄de ke itien̄wed emi?

Jehovah isifreke ikọt esie emi ẹyode ẹkpọn̄ usụn̄. Utu ke oro, enye esisan̄a oyom mmọ. Enye esiwak ndida ikọt esie nyom mbon oro ẹyode ẹkpọn̄ usụn̄. Ke uwụtn̄kpọ, kere nte Jehovah akan̄wamde Job emi okokụtde ediwak afanikọn̄. Ufene esie ẹma ẹkpan̄a, kpukpru nditọ esie ẹkpan̄a, enye onyụn̄ ọdọn̄ọ ata idiọk udọn̄ọ. Mbon oro ẹkpeken̄wamde Job ẹma ẹtịn̄ ikọ oro okobụn̄de enye esịt. Edi Job ikedehedei ikpọn̄ Jehovah, kpa ye oro edide ama enyene ini emi enye ekekerede se mîfọnke. (Job 1:22; 2:10) Didie ke Jehovah akan̄wam Job?

Jehovah ama ada Elihu emi ekedide asan̄autom Esie an̄wam Job. Ke ini Job eketịn̄de se ifịnade enye, Elihu ama enen̄ede akpan̄ utọn̄ mbemiso etịn̄de ikọ. Enye ikekwe ndudue inọ Job, ikonyụn̄ inamke Job ekere ke enye anam idiọkn̄kpọ, ntre ke ana enye akabade esịt. Elihu ikanamke nte ke imọfọn ikan Job. Spirit Abasi ama anam Elihu ọdọhọ ete: “Ami ndi kpa se afo edide ke iso ata Abasi; ẹkeda mbat ẹbot mi n̄ko.” Ekem enye ama ọdọhọ Job ete: “Ndịk mi idinamke fi edịghe, mfịghe mi idinyụn̄ idobike fi ke idem.” (Job 33:​6, 7) Sia Elihu akamade Job, enye ama etịn̄ ikọ ọdọn̄ enye esịt, ikonyụn̄ itịn̄ke n̄kpọ oro akanamde mfịna esie etetịm okpon.

Mbọk fiọk ete ke isio ediye ekpri n̄wed emi inọ mbon oro ẹyode ẹkpọn̄ Jehovah, ke ntak emi imade mmọ. Nnyịn ima ibem iso ikpan̄ utọn̄ ikop se mbon oro ẹkeyode ẹkpọn̄ usụn̄ ẹketịn̄de ye se ikanamde mmọ ẹyo ẹkpọn̄ usụn̄. (Mme N̄ke 18:13) Ima inyụn̄ ida ini idụn̄ọde mme mbụk emi ẹdude ke N̄wed Abasi, emi aban̄ade nte Jehovah akan̄wamde ikọt esie emi ẹkeyode ẹkpọn̄ usụn̄ ke eset. Ekem, nnyịn ima ida se ikokụtde ke N̄wed Abasi idian ye se ifiọkde inyụn̄ ikopde iban̄a mbon oro ẹyode ẹkpọn̄ usụn̄ mfịn, iwet ediye ekpri n̄wed emi. Mbọk kot ediye ekpri n̄wed emi, nyụn̄ fiọk ete ke nnyịn imama fi etieti.

Otu Emi Ẹsede Ẹban̄a Utom Mme Ntiense Jehovah