OWO emi esịt obiomde m̀mê owo emi esịt amiade ufen etie nte owo emi obiomde akamba mbiomo. Edidem David ekewet ete: “Mme ndudue mi ẹmedọk ẹbe ibuot mi; nte ndodobi mbiomo mmọ ẹmedobi ẹkan mi.” (Psalm 38:4) Ndusụk nditọete ẹfụhọ ẹbe nde, sia ẹkerede ke Jehovah idifenke inọ mmimọ tutu amama. (2 Corinth 2:7) Ndi utọ ekikere oro enen? Idem ọkpọkọm amanam akwa idiọkn̄kpọ, ndi ọwọrọ ke Jehovah ikemeke ndifen nnọ fi? Baba!

Jehovah isitopke mme anamidiọk oro ẹkabarede esịt iduọk. Enye esikam okokot mmọ adian idem! Ke uwụtn̄kpọ oro Jesus ọkọnọde aban̄a idiọk udọ, enye ọkọdọhọ ke Jehovah etie nte edima ete oro eyen esie ọkọwọrọde ọkpọn̄ ufọk okodu etịme etịme uwem. Ekem, eyen oro ama ọdọhọ ke imọn̄ ifiak inyọn̄ ufọk. “Ke adan̄aemi enye odude kan̄a anyan usụn̄, ete esie ada okụt enye, mbọm onyụn̄ anam enye, ndien enye efehe akawan̄a enye ke itọn̄ onyụn̄ etịm enye inua ima ima.” (Luke 15:​11-20) Ndi akpama ndisan̄a n̄kpere Jehovah, edi ekere ke omodu oyom usụn̄ ọkpọn̄ enye akaha? Jehovah ayatua fi mbọm kpa nte ete idiọk udọ akatuade eyen esie mbọm. Jehovah enen̄ede oyom afiak etiene imọ.

Nso idin̄wam fi edieke ekerede ke Jehovah idifenke inọ fi ke ntak emi idiọkn̄kpọ fo awakde m̀mê okponde akaha? Mbọk kop se Jehovah etịn̄de mi ke n̄wed Isaiah 1:18: ‘Di nnyịn inen̄ede mme n̄kpọ ke ufọt nnyịn. Mme idiọkn̄kpọ fo ẹkpetie nte iduot, ẹyenam mmọ ẹfia nte snow.’ Ih, ọkpọkọm idiọkn̄kpọ etie nte iduot emi odụkde afia ọfọn̄, Jehovah edisụk ifefen.

Jehovah iyomke esịt aka iso obiom fi. Nso ke akpanam man Abasi efen fi, esịt ana fi sụn̄, onyụn̄ enyene edisana esịt? Kere ban̄a n̄kpọ iba oro Edidem David akanamde. Akpa, enye ama ọdọhọ ete: “Nyayarade idiọkn̄kpọ mi nnọ Jehovah.” (Psalm 32:5) Ti ke Jehovah ọdọhọ fi ọbọn̄ akam ọnọ imọ onyụn̄ edi mmimọ “inen̄ede mme n̄kpọ.” Nyịme ndinam se enye ọdọhọde oro. Yarade idiọkn̄kpọ fo nọ Jehovah, nyụn̄ tịn̄ nte etiede fi ke idem nọ enye. Ke ini David akanamde idiọkn̄kpọ, enye ama ọbọn̄ akam ọnọ Jehovah ete: “Nam mi nsana mbọhọ idiọkn̄kpọ mi. . . . O Abasi, afo udusịnke esịt eke obụn̄ọde onyụn̄ anuahade ke ndek.”​—Psalm 51:​2, 17.

Ọyọhọ iba, David ama enyịme prọfet Nathan an̄wam imọ. (2 Samuel 12:13) Mfịn, Jehovah emek mbiowo ke esop esie; ndien ẹkpep mmọ ndin̄wam mme anamidiọk oro ẹkabarede esịt  ẹfiak ẹtiene Jehovah. Edieke akade ebịne mbiowo emi, mmọ ẹyeda N̄wed Abasi ẹn̄wam fi ẹnyụn̄ ẹbọn̄ akam ke ofụri esịt ẹnọ fi man esịt ana fi sụn̄, etre ndikere ke imọ iwọrọke n̄kpọ, onyụn̄ afiak edinam n̄kpọ Jehovah.​—James 5:​14-16.

Afo emekeme ndikere ke ndiyarade idiọkn̄kpọ fo nnọ Jehovah Abasi nnyụn̄ n̄ka n̄ketịn̄ nnọ mbiowo edi ata ọkpọsọn̄ n̄kpọ. David ekekere ntre n̄ko. Enye ‘ama odop uyo,’ imaha ndisọp nyarade idiọkn̄kpọ esie. (Psalm 32:3) Nte ini akakade, enye ama edikụt ke ọfọn iyarade idiọkn̄kpọ imọ inyụn̄ inen̄ede usụn̄ imọ.

Akpan ufọn kiet oro David ọkọbọde edi ke enye ama afiak okop inemesịt. Enye ekewet ete: ‘Owo emi ẹfende idiọkn̄kpọ esie okop inemesịt.’ (Psalm 32:1) Enye ama ọbọn̄ akam n̄ko ete: “O Jehovah, afo akpakam atat mi n̄kpọkinua, man inua mi okpobụk itoro fo.” (Psalm 51:15) Esịt ikobiomke David aba ke ntak emi Jehovah ekefende idiọkn̄kpọ esie. Ntre enye ama obụk itoro Jehovah ọnọ mme owo.

Jehovah oyom fi enyene edisana esịt. Enye onyụn̄ oyom fi anam mme owo ẹdiọn̄ọ imọ ye uduak imọ, edi enye iyomke afo ada esịt oro obiomde fi anam emi, oyom ada edisana esịt anam emi ye idatesịt. (Psalm 65:​1-4) Ti ke Jehovah ọdọhọ ke ‘iyọsọhi mme idiọkn̄kpọ fo ifep, man mme ini nduọkodudu ẹkpeto iso esie ẹsịm fi.’​—Utom 3:19.

Se enye akanamde ọnọ Martha edi oro. Martha ọdọhọ ete: “Eyen mi eren ama esinọ Enyọn̄-Ukpeme ye Ẹdemede! ẹsọk mi. Mma mfiak ntọn̄ọ ndikpep n̄kpọ mban̄a Jehovah sụn̄sụn̄. Ama enen̄ede ọsọn̄ mi ndidọhọ Jehovah efen kpukpru idiọkn̄kpọ oro n̄kanamde; emi akanam etetịm ọsọn̄ mi ndifiak ntiene enye. Edi ke akpatre mma mbọn̄ akam nnọ enye nte efen ọnọ mi. N̄kpenịmke ke ofụri isua 40 ama ebe mbemiso n̄kafiakde ntiene Jehovah. Se ikọwọrọde mi owụt ke owo oro ọkọkpọn̄de Jehovah ke ediwak isua ekeme ndifiak ndinam n̄kpọ esie, ndien Jehovah osụk amama enye.”