Jesus ye mme mbet esie ẹto Galilee ẹbe Akpa Jordan, ẹsan̄a usụk usụk ẹbe ke Perea. Akpatre ini emi Jesus akakade Perea, enye ama anam mme Pharisee ẹdiọn̄ọ nte Abasi adade usiondọ. (Luke 16:18) Edi idahaemi mmọ ẹfiak ẹmen nneme usiondọ ẹdi man ẹdomo Jesus.

Moses ọkọdọhọ ke ebe ekeme ndisio n̄wan esie ndọ edieke “okụtde enye mbubiam n̄kpọ” ke idem. (Deuteronomy 24:1) Mme Jew ẹnyene nsio nsio ekikere ẹban̄a se ebe ekemede ndida nsio n̄wan esie ndọ. Ndusụk mmọ ẹkere ke n̄kpri n̄kpọ ẹkeme ndinam ẹsio n̄wan ndọ. Ntem mme Pharisee ẹbụp Jesus ẹte: “Nte ibet enyịme owo osio n̄wan esie ndọ ke ntak ekededi?”—Matthew 19:3.

Jesus itịn̄ke se mme owo ẹkerede, utu ke oro enye etịn̄ nte Abasi ọkọtọn̄ọde ndọ. Enye ọdọhọ mmọ ete: “Nte mbufo ikokotke ite ke enye emi okobotde mmọ toto ke editọn̄ọ okobot mmọ eren ye n̄wan onyụn̄ ọdọhọ ete: ‘Ke ntak emi erenowo ọyọkpọn̄ ete ye eka esie onyụn̄ akadiana ye n̄wan esiemmọ, ndien mmọ mbiba ẹyekabade ẹdi obụk kiet’? Ntre mmọ idịghe aba owo iba, edi ẹdi obụk kiet. Mmọdo, se Abasi ama akadian yak baba owo kiet okûdian̄ade.” (Matthew 19:4-6) Ke ini Abasi ọkọtọn̄ọde ndọ Adam ye Eve, enye ikọdọhọke ke mmọ ẹkeme ndidian̄ade ndọ oro nte ini akade.

Mme Pharisee inyịmeke se Jesus etịn̄de emi, ntre mmọ ẹbụp enye ẹte: “Ntak, ndien, Moses eketemede ete ẹnọ n̄wed usiondọ ẹnyụn̄ ẹsio n̄wan ndọ?” (Matthew 19:7) Jesus ọbọrọ mmọ ete: “Ntak isọn̄esịt mbufo akanam Moses enyịme mbufo ẹsio iban mbufo ndọ, edi oro ikedịghe ntre toto ke editọn̄ọ.” (Matthew 19:8) “Editọn̄ọ” emi Jesus etịn̄de aban̄a ikedịghe ke eyo Moses, ekedi ke ini emi Abasi ọkọtọn̄ọde ndọ ke Eden.

Jesus ada ifet emi ekpep mmọ akpan n̄kpọ emi: “Ndọhọ mbufo nte owo ekededi eke osiode n̄wan esie ndọ, ke mîtoho ke ntak use [Greek, por·neiʹa], onyụn̄ ọdọde efen, esịn efịbe.” (Matthew 19:9) N̄kukụre ntak emi N̄wed Abasi enyịmede ẹsio ndọ edi oburobụt ido idan̄.

Se Jesus etịn̄de anam mme mbet esie ẹdọhọ ẹte: “Edieke n̄kpọ etiede ntem ye owo ye n̄wan esie, ifọnke owo ndidọ ndọ.” (Matthew 19:10) Ana owo emi oyomde ndidọ ndọ eti ke Abasi asasua usiondọ!

Jesus etịn̄ n̄kpọ n̄ko aban̄a mbon emi mîdọhọ ndọ. Enye ọdọhọ ke ndusụk owo ẹkemana nte eunuch toto ke idịbi eka mmọ, oro edi ikemeke ndinam idan̄; ndusụk owo anam mmọ ẹdi eunuch, oro edi, ẹsio mmọ osio; ndien mme owo ẹdu emi ẹnamde idemmọ eunuch, oro edi, iyomke ndinam idan̄. Mmọ ẹnam emi man mmọ ẹkeme ndisịn ofụri esịt mmọ ke utom Abasi. Jesus ọdọhọ mbon emi ẹkpan̄de utọn̄ ẹnọ enye ete: “Yak owo eke ekemede ndinam [emi] anam.”—Matthew 19:12.

Idahaemi mme owo ẹmen nditọwọn̄ ẹsọk Jesus. Edi mme mbet ẹsua ẹnọ mmọ sia mmọ iyomke nditọ emi ẹfịna Jesus. Ke ini Jesus okụtde se mme mbet esie ẹnamde, esịt ayat enye, enye onyụn̄ ọdọhọ mmọ ete: “Ẹyak n̄kpri nditọ ẹtiene mi; ẹkûdomo ndikpan mmọ, koro obio ubọn̄ Abasi enyenede mmọ eke ẹtiede ntem. Ke akpanikọ ke ndọhọ mbufo, Owo ekededi eke mîbọhọ obio ubọn̄ Abasi nte ekpri eyen ididụkke ke esịt.”—Mark 10:14, 15; Luke 18:15.

Ata akpan n̄kpọ ke Jesus ekpep emi! Edieke nnyịn mîsụhọkede idem inyụn̄ inyịme ẹkpep nnyịn Ikọ Abasi nte nditọwọn̄, nnyịn ididụkke Obio Ubọn̄ Abasi. Jesus emen nditọ emi akama onyụn̄ ọdiọn̄ mmọ man owụt ke imọ imama mmọ. Ntre n̄ko ke enye enen̄ede ama kpukpru mbon emi “[ẹbọde] obio ubọn̄ Abasi nte ekpri eyen.”—Luke 18:17.