Etie nte Jesus osụk odu ke Samaria mîdịghe odu ke Galilee. Idahaemi mme Pharisee ẹbụp enye ẹban̄a nte Obio Ubọn̄ edidide, sia mmọ ẹkerede ke ẹyesịn editịm etieti ke Obio Ubọn̄ ama edi. Edi Jesus ọdọhọ ete: “Obio ubọn̄ Abasi idịghe nte ẹkụtde ke enyịn, mme owo idinyụn̄ idọhọke ite, ‘Se enye mi!’ mîdịghe, ‘Se enye ko!’ Koro, sese! obio ubọn̄ Abasi odu ke otu mbufo.”—Luke 17:20, 21.

Ndusụk owo ẹkeme ndikere ke Jesus ọdọhọ ke Obio Ubọn̄ odu ke esịt mme asan̄autom Abasi. Edi utọ n̄kpọ oro ikpekemeke nditịbe, sia Obio Ubọn̄ mîdụhe ke esịt mme Pharisee emi Jesus eketịn̄de ikọ emi ọnọ. Edi Obio Ubọn̄ odu ke otu mmọ sia Jesus, kpa Edidem emi Abasi emekde ndikara ke Obio Ubọn̄ oro odu do ye mmọ.—Matthew 21:5.

Jesus ekpep mme mbet esie n̄kpọ efen efen aban̄a nte Obio Ubọn̄ emi edidide, edi etie nte enye anam emi ke mme Pharisee ẹma ẹkedaha. Enye ebem iso etịn̄ aban̄a ini emi enye edikarade ke Obio Ubọn̄ ete: “Mme usen ẹyedi eke mbufo ẹdiyomde ndikụt kiet ke otu usen Eyen owo edi mbufo idikwe.” (Luke 17:22) Ikọ Jesus ọwọrọ ke Eyen owo edikara ke Obio Ubọn̄ ke ini iso. Mbemiso enye ọtọn̄ọ ukara emi, ọyọdọn̄ ndusụk mbet ndikụt nte enye akarade, edi ana mmọ ẹbet tutu Eyen owo edi ke ini emi Abasi ekenịmde.

Jesus aka iso ete: “Mme owo ẹyedọhọ mbufo ẹte, ‘Se enye ko!’ mîdịghe, ‘Se enye mi!’ Ẹkûwọrọ ẹka, ẹkûnyụn̄ ẹfen̄e ẹtiene mmọ. Koro kpa nte emịnen̄mịnen̄ ọwọrọde oto n̄kan̄ ikpaenyọn̄ kiet ayama esịm n̄kan̄ ikpaenyọn̄ eken, ntre ke edidi ye Eyen owo.” (Luke 17:23, 24) Nso idinam mme mbet Christ ẹkûtiene mbon oro mîdịghe ata messiah? Jesus ọkọdọhọ ke ini ata Messiah edidide, ke editie nte emịnen̄mịnen̄ emi mme owo ẹkemede ndida ke nsio nsio ebiet n̄kụt. Mbon emi ẹkamade enyịn ẹse se ikade iso ke ererimbot ẹyekeme ndikụt ke Jesus ọtọn̄ọ ndikara ke heaven.

Jesus etịn̄ se iketịbede ke eset man anam mbet esie ẹdiọn̄ọ nte mme owo ẹdinamde n̄kpọ ke ini enye editọn̄ọde ndikara ke ini iso. Enye ọdọhọ ete: “Kpa nte ekedide ke mme usen Noah, kpasụk ntre ke edidi n̄ko ke usen Eyen owo . . . Kpasụk nte okonyụn̄ edide ke eyo Lot: mmọ ẹkedia n̄kpọ, ẹnyụn̄ ẹn̄wọn̄ n̄kpọ, mmọ ẹdep, ẹnyụn̄ ẹnyam, mmọ ẹtọ in̄wan̄, ẹnyụn̄ ẹbọp ufọk. Edi ke usen oro Lot ọwọrọde ke Sodom, ikan̄ ye sulphur ẹto enyọn̄ ẹdep ẹdisobo mmọ kpukpru. Kpasụk ntre ke edidi ke usen oro Eyen owo ediyararede idem.”—Luke 17:26-30.

Jesus idọhọke ke ẹkesobo mbon eyo Noah ye mbon eyo Lot sia mmọ ẹkesinamde se kpukpru owo ẹsinyụn̄ ẹnamde ke uwem, oro edi, ndidia n̄kpọ, nnyụn̄ n̄n̄wọn̄, ndep n̄kpọ, nnyam n̄kpọ, ntọ in̄wan̄, nnyụn̄ mbọp ufọk. Noah ye Lot ye ikọtufọk mmọ ẹma ẹsinam mme n̄kpọ emi. Edi mme owo  ẹkenam emi emi inyụn̄ inamke n̄kpọ Abasi. Mmọ ikọdiọn̄ọke nte ini emi mmọ ẹkedude uwem ọkọdiọkde eketre. Ntre, Jesus ọdọhọ mbet esie ete ẹsịn idem ẹnam n̄kpọ Abasi. Enye eteme mmọ se mmọ ẹdinamde man ẹnyan̄a mmọ ke ini Abasi edisobode ndiọi owo ke ini iso.

Inaha mme mbet esie ẹyak mme n̄kpọ emi mmọ ẹma ẹkekpọn̄ ke ererimbot anam mmọ ẹfre ndinam n̄kpọ Abasi. Jesus ọdọhọ mmọ ete: “Ke usen oro yak owo eke odude ke enyọn̄ ufọk edi emi mme n̄kpọ esie ẹdude ke esịt ufọk okûsụhọde aka nditan̄ mmọ; kpasụk ntre n̄ko owo eke odude ke in̄wan̄ okûfiak aka ebịne mme n̄kpọ oro ẹdude ke edem. Mbufo ẹti n̄wan Lot.” (Luke 17:31, 32) N̄wan Lot ama akabade adaha inụn̄.

Jesus aka iso etịn̄ nte n̄kpọ editiede ke ini Eyen owo edikarade. Enye ọdọhọ mme mbet esie ete: “Ke okoneyo oro irenowo iba ẹyena ke n̄kpana kiet; ẹyeda kiet, edi ẹkpọn̄ enye eken.” (Luke 17:34) Ọwọrọ ke ẹyenyan̄a ndusụk owo, mbon eken ẹtak.

Mme mbet Jesus ẹbụp enye ẹte: “Ọbọn̄, ke m̀mọ̀n̄?” Enye ọbọrọ mmọ ete: “Ebiet eke okpo anade, do n̄ko ke mme ntrukpom ẹdisop idem.” (Luke 17:37) Ndusụk owo ẹditie nte ntrukpom emi esisọpde ada okụt n̄kpọ sia mmọ ẹyediọn̄ọ enye emi edide ata ata Christ m̀mê Eyen owo ẹnyụn̄ ẹtiene enye. Ini oro n̄ko, Jesus ayanam mme mbet emi ẹbuọtde idem ye enye ẹdiọn̄ọ akpanikọ emi edinyan̄ade mmọ.