Jesus ke osụk aka ke usụn̄ Perea emi enye oyomde ndisan̄a ndụk Jerusalem. Akparawa kiet emi edide imọ owo efehe ebịne enye editọn̄ọ edọn̄ ke iso esie. Akparawa emi edi “andikara.” Etie nte enye edi “akwa owo emi etiede ibuot ke synagogue” mîdịghe edi owo Sanhedrin. Enye obụp Jesus ete: “Eti Andikpep, ndinam nso man nnyene nsinsi uwem?”—Luke 8:41; 18:18; 24:20.

Jesus ọbọrọ enye ete: “Ntak emi afo okotde mi eti? Owo ndomokiet idịghe eti, ke mîbọhọke kiet, kpa Abasi.” (Luke 18:19) Etie nte “eti” emi akparawa emi okokotde Jesus mi ekedi udorienyịn̄ emi mme rabbi ẹsimade mme owo ẹkot mmimọ. Okposụkedi emi Jesus ọdiọn̄ọde ndikpep owo n̄kpọ, enye ọdọhọ ete oro ke Abasi ikpọn̄ ke ẹkpekot “Eti.”

Jesus afiak ọdọhọ enye ete: “Edieke afo oyomde ndinyene uwem, ka iso nịm mme ewụhọ.” Akparawa oro obụp Jesus ete: “Mme ewụhọ ewe?” Jesus asiak n̄kpọ ition ke Ibet Duop emi aban̄ade uwotowo, efịbe, uyịpinọ, utie ntiense nsu, ye owo ndikpono ete ye eka esie. Ekem enye adian ibet emi edide ata akpan ibet ete: “Afo enyene ndima mbọhọidụn̄ fo nte idemfo.”—Matthew 19:17-19.

Akparawa oro ọdọhọ ete: “Mma nnenịm kpukpru emi; nso isụhọ aba ndinam?” (Matthew 19:20) Ekeme ndidi enye ekere ke enyene ọwọrọetop n̄kpọ en̄wen emi anade imọ inam, emi edinamde imọ inyene nsinsi uwem. Se enye etịn̄de oro anam Jesus “ama enye” sia enye okụt ke akparawa oro obụp mbụme emi ke ofụri esịt. (Mark 10:21) Edi enyene n̄kpọ emi mîdiyakke akparawa oro anam se Jesus oyomde nditịn̄.

Ufan emi ama inyene esie akakaha, ndien Jesus ọdọhọ ete: “N̄kpọ kiet osụhọ fi ndinam: Ka, kanyam se ededi oro afo enyenede nyụn̄ yak nọ mme ubuene, ndien afo eyenyene n̄kpọuto ke heaven, nyụn̄ ditiene mi.” Ke akpanikọ, ete oro ekeme ndideme okụk esie nnọ mme ubuene emi  mîdikemeke ndinọ enye n̄kpọ, onyụn̄ akabade edi mbet Jesus. Edi etie nte mbọm esie anam Jesus nte enye asan̄ade adaha mfụhọ mfụhọ. Ima emi enye akamade “ediwak inyene” esie iyakke enye okụt se idide ata inyene. (Mark 10:21, 22) Jesus ọdọhọ ete: “Edidi ọkpọsọn̄ n̄kpọ didie ntem mbon emi ẹnyenede okụk ndibe ndụk obio ubọn̄ Abasi!”—Luke 18:24.

Se Jesus osụk etịn̄de emi ye se enye edifiakde itịn̄ akpa mbet esie idem. Enye ọdọhọ ete: “Ke akpanikọ, edi mmemmem n̄kpọ camel ndibe ke odudu abiabon akan owo inyene ndidụk obio ubọn̄ Abasi.” Emi anam mme mbet ẹbụp ẹte: “Anie ndien ekeme ndibọhọ?” Ndi n̄kpọ emi ẹyomde owo anam man ẹnyan̄a enye enen̄ede ọsọn̄ tutu idịghe se owo ndomokiet ekemede ndinam? Jesus ese mbet esie onyụn̄ ọbọrọ ete: “Se owo mîkemeke ndinam, Abasi ekeme ndinam.”—Luke 18:25-27.

Peter etịn̄ ikọ ndiwụt ke mmimọ itiehe nte owo inyene oro. Enye ọdọhọ Jesus ete: “Sese! Nnyịn ima ikpọn̄ kpukpru n̄kpọ itiene fi; nso ndien ke nnyịn idinyene?” Jesus etịn̄ nte ẹdidiọn̄de mmọ ke mmọ ndidi mbet imọ. Enye ọdọhọ ete: “Ke ini ẹdifiakde ẹbot mme n̄kpọ, ke ini Eyen owo osụhọrede etie ke ebekpo ubọn̄ esie, mbufo emi ẹtienede mi ẹyesụhọde n̄ko ẹtie ke ebekpo duopeba, ẹkpe ikpe ẹnọ esien Israel duopeba.”—Matthew 19:27, 28.

Se Jesus etịn̄de editịbe ke ini iso, ke ini ẹdinamde kpukpru n̄kpọ ke isọn̄ afiak eketie nte eketiede ke In̄wan̄ Eden. Ẹyenam Peter ye mme mbet eken ẹtiene Jesus ẹkara isọn̄ emi edidide Paradise ini oro. Utọ edidiọn̄ emi akan se ededi emi mmọ ẹyakde atak mmọ!

Edi idịghe ke ini iso kpọt ke ẹdidiọn̄ mmọ. Mmọ ẹtọtọn̄ọ idahaemi ẹbọ ndusụk edidiọn̄. Jesus ọdọhọ ete: “Idụhe baba owo kiet emi ọkọkpọn̄de ufọk m̀mê n̄wan m̀mê nditọeka m̀mê ete ye eka m̀mê nditọ ke ntak obio ubọn̄ Abasi emi mîdibọhọ se iwakde ikan oro ke ini emi, ye nsinsi uwem ke editịm n̄kpọ emi edidide.”—Luke 18:29, 30.

Ebiet ekededi emi mme mbet ẹkade, mmọ ẹyekụt nditọete mmọ emi ẹmade mmọ ẹnyụn̄ ẹkperede mmọ ẹkan ata ata nditọeka. Edi etie nte akparawa emi edide imọ owo mi idibọhọ utọ edidiọn̄ emi, idinyụn̄ idụkke Obio Ubọn̄ heaven.

Jesus adian do ete: “Edi ediwak owo emi ẹdide akpa ẹyedi akpatre, akpatre ẹyenyụn̄ ẹdi akpa.” (Matthew 19:30) Nso ke ikọ oro ọwọrọ?

Akparawa emi edide imọ owo mi esịne ke otu mbon emi ẹdide “akpa,” sia enye etiene edi adaiso mme Jew. Sia edide enye esinịm ibet Abasi, enye owụt ke imama Abasi, ẹnyụn̄ ẹdori enyịn ke akpana utọ owo emi enen̄ede anam n̄kpọ Abasi. Edi inyene esie edi akpan n̄kpọ akan n̄kpọ en̄wen ekededi ke uwem esie. Mme usụhọde owo itiehe ntem. Mmọ ẹkụt ke se Jesus ekpepde edi akpanikọ, ke ukpepn̄kpọ emi edinam mmimọ inyene nsinsi uwem. Mmọ ẹkedi mme “akpatre” edi idahaemi mmọ ẹdidi “akpa.” Mmọ ẹdori enyịn nditiene Jesus ntie ke ebekpo n̄kara isọn̄ emi edidide Paradise.