Jesus ndinọ ediwak tọsịn owo udia ke utịbe utịbe usụn̄ anam mme owo ẹdọhọ ke enye “ke akpanikọ edi prọfet oro ekenyenede ndidi ke ererimbot,” ke enye onyụn̄ edi Messiah ndien ke ukara esie ọyọfọn etieti. (John 6:14; Deuteronomy 18:18) Ntem mmọ ẹduak ndimụm enye nnam edidem.

Edi Jesus ọfiọk se mmọ ẹduakde ndinam. Ntre, enye osio otuowo unyọn̄ onyụn̄ ọdọhọ mbet esie ẹdụk ubom, edi m̀mọ̀n̄ ke enye ọdọhọ mmọ ẹka? Mmọ ẹyom ndika Bethsaida ekem ẹkebe do ẹka Capernaum. Edi Jesus ọdọk obot man eketie ikpọn̄ ọbọn̄ akam okoneyo oro.

Jesus ada okụt ubom mmọ nsannsan ke ini ekperede ndisịm usiere. Ọkpọsọn̄ ofụm ye awawa ke ẹnyen̄e ubom, ndien ‘ọsọn̄ mme mbet ndiwat koro ofụm ọbiọn̄ọde mmọ.’ (Mark 6:48) Jesus osụhọde ke obot oro edisan̄a ke enyọn̄ mmọn̄ ebịne mmọ. Mmọ ẹwawat “ke n̄kpọ nte itiat ita m̀mê inan̄.” (John 6:19) Ke ini etiede mmọ nte Jesus ọmọn̄ asan̄a ebe, mmọ ẹfiori ẹte: “Edi mbiet!”—Mark 6:49.

Jesus ọdọhọ mmọ ete: “Ẹsọn̄ esịt, ami ke edi; ẹkûfehe ndịk.” Peter ọdọhọ ete: “Ọbọn̄, edieke edide afo, dọhọ mi nsan̄a ke enyọn̄ mmọn̄ ntiene fi.” Jesus ọdọhọ enye ete: “Di!” Peter ọwọrọ ke ubom, asan̄a ke enyọn̄ mmọn̄ ebịne Jesus. Edi ke ini Peter esede oyobio, ndịk anam enye, ndien enye ọtọn̄ọ ndiden̄. Enye ofiori ete: “Ọbọn̄, nyan̄a mi!” Jesus anyanade ubọk omụm enye onyụn̄ ọdọhọ ete: “Afo owo ekpri mbuọtidem, ntak emi eyịkde?”—Matthew 14:27-31.

Mmọ mbiba ẹdọk ẹdụk ubom, ndien oyobio odobo. Idem akpa mbet Jesus. Edi ikpanaha idem akpa mmọ! Edieke mmọ ẹkpeketide utịben̄kpọ emi Jesus akanamde hour ifan̄ emi osụk ebede, ndida uyo ye iyak ifan̄ nnọ ediwak tọsịn owo udia, idem ikpakpaha mmọ ndikụt Jesus asan̄ade ke enyọn̄ mmọn̄ onyụn̄ anamde oyobio odobo. Mmọ ẹnụhọ ẹnọ enye, ẹdọhọ enye ẹte: “Ke akpanikọ, afo edi Eyen Abasi.”—Mark 6:52; Matthew 14:33.

Ibịghike mmọ ẹdisịm Gennesaret, emi isọn̄ esifọnde n̄kpọ. Ediye obio emi odu ekpere Capernaum. Mmọ ẹnịm ubom ke esụk Gennesaret ẹwọrọ ẹdọk. Mbon obio emi ẹsọsọp ẹdiọn̄ọ Jesus, ndien mmọ ye mbon emi ẹdụn̄de ẹkpere Gennesaret ẹda mbon udọn̄ọ ẹsọk enye. Ke ini mbon udọn̄ọ oro ẹtụkde mben ọfọn̄ Jesus, idem ọsọn̄ mmọ.

Edi otuowo emi Jesus akadade uyo ye iyak ọnọ udia ẹdikụt ke Jesus ama ọnyọn̄. Ke ini n̄kpri ubom ẹtode Tiberias ẹdibehe, mmọ ẹdụk ẹka Capernaum ndiyom enye. Ke ini mmọ ẹkụtde enye, mmọ ẹbụp enye ẹte: “Rabbi, ini ewe ke afo ekedisịm mi?” (John 6:25) Jesus asua ọnọ mmọ, iyonyụn̄ ikụt ntak emi enye asuade ọnọ mmọ.