Ke ini Jesus ye mme mbet esie ẹkpọn̄de Judea, mmọ ẹsan̄a Samaria ẹka Galilee. Ọkpọsọn̄ isan̄ anam idem emem mmọ. Ke n̄kpọ nte n̄kanika duopeba uwemeyo, mmọ ẹduọk odudu ke obube mmọn̄ Jacob ẹkpere Sychar. Etie nte Jacob ke idemesie eketịbi obube emi, mîdịghe ekeme ndidi enye ekekpekpe mbon en̄wen ẹtịbi obube emi ẹnọ enye ke ediwak isua emi ẹkebede. Tutu esịm emi, obube emi odu ke obio emi ẹkotde Nablus.

Ke ini Jesus ọduọkde odudu ke mben obube emi, mbet esie ẹdụk obio ẹka ndidep udia. Ekem n̄wan Samaria kiet edi ndikoi mmọn̄. Jesus ọdọhọ enye ete: “Nọ mi mmọn̄ n̄n̄wọn̄.”—John 4:7.

Mme Jew isan̄ake n̄kpọ ye mbon Samaria ke ntak idiọk usua oro mmọ ẹnyenede ye kiet eken. Idem akpa n̄wan mbon, oro anam enye obụp Jesus ete: “Afo emi edide Jew anam didie eben̄e mi mmọn̄, ke ini ndide n̄wan Samaria?” Jesus ọbọrọ enye ete: “Edieke afo ọkpọfiọkde enọ mfọn Abasi ye owo emi ọdọhọde fi ete, ‘Nọ mi mmọn̄ n̄n̄wọn̄,’ afo ekpeben̄e enye, ndien enye ọkpọnọ fi odu-uwem mmọn̄.”

N̄wan oro ọdọhọ enye ete: “Ete, afo ukam unyeneke bọket ndida n̄koi mmọn̄, obube mmọn̄ onyụn̄ otụn̄ọ. M̀mọ̀n̄, ndien, ke afo edida odu-uwem mmọn̄ emi? Ndi afo okpon akan ete ete nnyịn Jacob, emi ọkọnọde nnyịn obube mmọn̄ emi, emi enye ke idemesie ọkọrọ ye nditọ esie ye mme ufene esie ẹkesin̄wọn̄de mmọn̄ ke esịt?”—John 4:9-12.

Jesus ọbọrọ enye ete: “Kpukpru owo eke ẹn̄wọn̄de mmọn̄ emi ẹyefiak ẹkop nsatitọn̄. Owo ekededi emi ọn̄wọn̄de mmọn̄ eke ndinọde enye idikopke aba nsatitọn̄ tutu amama, edi mmọn̄ eke ndinọde enye ayakabade edi idịm mmọn̄ ke esịt esie emi otopde ọwọrọ ndinọ nsinsi uwem.” (John 4:13, 14) Ke akpanikọ, Jesus eben̄e idem ndineme ikọ Abasi, emi etiede nte odu-uwem mmọn̄ ye n̄wan Samaria emi, okposụkedi emi idem ememde enye.

N̄wan oro ọdọhọ enye ete: “Ete, nọ mi mmọn̄ emi, mbak ndikop nsatitọn̄, ndinyụn̄ n̄ka iso ndi ebiet emi ndikoi mmọn̄.” Etie nte Jesus oyom ndikpụhọ nneme ke itie emi, enye anam enye ọdọhọ mma oro ete: “Ka kokot ebe fo di.” N̄wan oro ọbọrọ ete: “Nnyeneke ebe.” Anaedi idem enen̄ede akpa enye ke adan̄a nte Jesus ọfiọkde imọ eketre ke ini Jesus ọdọhọde enye ete: “Afo emetịm etịn̄ ete, ‘Nnyeneke ebe.’ Koro afo ama enyenyene ebe ition, ndien eren oro afo enyenede idahaemi idịghe ebe fo.”—John 4:15-18.

Se Jesus etịn̄de emi enen̄ede an̄wan̄a n̄wan emi, ntre enye ọdọhọ Jesus ke n̄kpaidem ete: “Ete, mmokụt nte afo edi prọfet.” Didie ke ikọ emi owụt ke n̄wan emi oyom Jesus eneme ikọ Abasi ọnọ imọ? Mma oro aka iso ọdọhọ ete: “Mme ete ete nnyịn [mbon Samaria] ẹkesituak ibuot ke obot emi; [oro edi, Obot Gerizim emi odude ekpere do,] edi mbufo [mme Jew] ẹdọhọ ẹte ke Jerusalem edi ebiet emi owo akpatuakde ibuot.”—John 4:19, 20.

Edi Jesus aka iso anam an̄wan̄a ke idịghe ebiet oro owo atuakde ibuot ọnọ Abasi akam edi akpan n̄kpọ. Enye ọdọhọ ete: “Ini ke edi eke mbufo  mîdituakke ibuot inọ Ete ke obot emi m̀mê ke Jerusalem. Edi, ini ke edi, ini oro onyụn̄ edi emi, eke ata mme andituak ibuot ẹdituakde ibuot ẹnọ Ete ke spirit ye ke akpanikọ, koro edi utọ mme owo emi ke Ete oyom ete ẹtuak ibuot ẹnọ imọ.”—John 4:21, 23, 24.

Idịghe ebiet oro ata mme andituak ibuot ẹtuakde ibuot edi akpan n̄kpọ ọnọ Ete, akam edi nte mmọ ẹnamde oro. N̄wan oro ama se enye okopde, ntre enye ọdọhọ ete: “Mmọfiọk nte ke Messiah emi ẹkotde Christ ke edi. Ini ekededi oro enye edide edisịm, enye eyetịn̄ kpukpru n̄kpọ in̄wan̄-in̄wan̄ ọnọ nnyịn.”—John 4:25.

Mi ke Jesus etịn̄ ata ọkpọikọ ọnọ enye ete: “Ami emi ntịn̄de ikọ mi ye afo ndi enye.” (John 4:26) Kam kere ban̄a oro! N̄wan emi ekedi ndikoi mmọn̄ uwemeyo emi. Jesus ọfọn enye utọ mfọn emi. Enye etịn̄ n̄kpọ emi akanam enye mîtịn̄ke inọ mbon en̄wen ọnọ enye ke imọ idi Messiah.

Mbet Jesus ẹda udia oro mmọ ẹkekade ndidep ke Sychar ẹnyọn̄ ẹdi. Mmọ ẹkụt nte enye osụk etiede ke mben obube mmọn̄ Jacob emi mmọ ẹkedahade ẹkpọn̄ enye, ke eneme nneme ye n̄wan Samaria. Ke ini mmọ ẹdide ẹdisịm, n̄wan oro ọkpọn̄ n̄kpọ mmọn̄ esie do odụk obio.

Ke ini n̄wan oro esịmde Sychar, enye ọtọn̄ọ nditịn̄ mme n̄kpọ oro Jesus eketịn̄de ọnọ enye nnọ mbon en̄wen. Enye ọdọhọ mmọ ete: “Ẹdi, ẹdise owo oro asiande mi kpukpru n̄kpọ oro n̄kanamde.” Man n̄wan emi anam mme owo ẹkere n̄kpọ, enye obụp ete: “M̀mê enye akpakam edi Christ?” (John 4:29) Mbụme oro edi ata akpan mbụme oro mme owo ẹsimade ndineme mban̄a toto ke eyo Moses. (Deuteronomy 18:18) Emi anam mme owo ke obio emi ẹwọn̄ọ ẹdise Jesus.

Mme mbet Jesus ke ẹkpak enye ẹte adia udia oro mmọ ẹdepde ẹdi. Edi enye ọbọrọ mmọ ete: “Mmenyene udia ndidia eke mbufo mîfiọkke.” Idem akpa mbet esie ndikop utọ ikọ emi, ntre mmọ ẹbụp kiet eken ẹte: “Nte owo ama ada udia ọsọk enye adia?” Jesus etịn̄ ikọ emi  anamde mbet esie ẹkere n̄kpọ tutu esịm emi ete: “Udia mi edi ndinam uduak enye emi ọkọdọn̄de mi nnyụn̄ nnam utom esie mma.”—John 4:32-34.

Utom oro Jesus etịn̄de aban̄a mi idịghe eke ukpen̄e wheat emi oyomde nditọn̄ọ ke n̄kpọ nte ọfiọn̄ inan̄ oro ẹdidide. Edi utom oro Jesus etịn̄de aban̄a edi ndamban̄a ukpen̄e. Enye ọdọhọ ete: “Ẹmenede enyịn ẹse in̄wan̄, ẹte n̄kpọ ẹdat se ẹkpen̄ede. Kan̄a ke emi andikpen̄e ukpen̄e ke ọbọ n̄kpọ eyenutom onyụn̄ atan̄ mfri obon ọnọ nsinsi uwem, man andisuan ye andikpen̄e ẹkpedara ọtọkiet.”—John 4:35, 36.

Anaedi Jesus okụt ke nneme imọ ye n̄wan Samaria enyene ufọn. Ediwak mbon Sychar ẹbuọt idem ye Jesus ke ntak n̄kpọ oro n̄wan oro etịn̄de ọnọ mmọ. N̄wan oro ọdọhọ mmọ ete: “Enye ama asian mi kpukpru n̄kpọ oro n̄kanamde.” (John 4:39) Ntem ke ini mmọ ẹtode Sychar ẹdisịm enye ke obube mmọn̄ oro, mmọ ẹdọhọ enye etie ye mmimọ onyụn̄ aka iso ekpep mmimọ n̄kpọ. Jesus enyịme onyụn̄ etie ye mmọ do ke Samaria usen iba.

Nte mmọ ẹkpan̄de utọn̄ ẹnọ Jesus, ediwak mmọ ẹbuọt idem ye enye. Mmọ ẹdọhọ n̄wan oro ẹte: “Idịghe aba se afo eketịn̄de anam nnyịn inịm ke akpanikọ; koro nnyịn ke idem nnyịn imokop imonyụn̄ ifiọk ite ke akpanikọ owo emi edi andinyan̄a ererimbot.” (John 4:42) Ke akpanikọ, edinam n̄wan emi owụt nnyịn nte ikemede ndikwọrọ ikọ nnọ mbon en̄wen mban̄a Christ, inam mmọ ẹbụp mbụme ẹnyụn̄ ẹma ndikpep n̄kpọ efen efen.

Ti ete ke ọfiọn̄ inan̄ ayak ndikpen̄e barley, ndien ẹsiwak ndinam emi ke ini ndaeyo ke n̄kan̄ emi. Edi n̄kpọ nte November m̀mê December osụk edi emi. Emi ọwọrọ ke ọtọn̄ọde ke Passover eke isua 30 eyo Christ, Jesus ye mme mbet esie ẹda n̄kpọ nte ọfiọn̄ itiaita ẹkpep mme owo n̄kpọ ẹnyụn̄ ẹnịm mmọ baptism. Idahaemi mmọ ẹsan̄a enyọn̄-enyọn̄ ẹbe ẹnyọn̄ edem mmọ ke Galilee. Nso iditịbe do?