UKPEPN̄KPỌ 5
Samuel Ama Aka Iso Anam Se Inende
Toto ke ini emi Samuel ekedide eyenọwọn̄, enye okodụn̄ onyụn̄ anam utom ke tent utuakibuot, emi mme owo ẹkesikade ẹketuak ibuot ẹnọ Jehovah. Ndi ọmọdiọn̄ọ nte Samuel akasan̄ade edidụn̄ ke tent utuakibuot? Yak ineme kan̄a iban̄a Hannah emi ekedide eka Samuel.
Hannah ama enen̄ede oyom eyen ke ata anyan ini edi enye ikenyeneke eyen ndomokiet. Ntre enye ama ọbọn̄ akam ọnọ Jehovah oyom eyen. Enye ama ọn̄wọn̄ọ ọnọ Abasi ete ke edieke imọ inyenede eyen erenowo, ke imọ iyọnọ enye okodụn̄ ke tent utuakibuot anam n̄kpọ Abasi. Jehovah ama ọbọrọ akam esie onyụn̄ ọnọ enye eyen erenowo. Hannah ama osio eyen oro Samuel. Ke ini Samuel ekedide isua ita m̀mê inan̄, Hannah ama emen enye aka tent utuakibuot kpa nte enye ọkọn̄wọn̄ọde. Do ke Samuel okodu anam n̄kpọ Abasi.
Eli ekedi akwa oku ke tent utuakibuot. Nditọiren esie mbiba ẹkenam utom do n̄ko. Ti ete ke tent utuakibuot ekedi itie ukpono Abasi, ndien akpakana mme owo ẹnam nti n̄kpọ do. Edi nditọ Eli ẹkesinam ata ndiọi n̄kpọ. Samuel ama okụt se mmọ ẹkesinamde. Ndi Samuel ama etiene nditọ Eli anam ndiọi n̄kpọ?— Ihih, enye ama aka iso anam se inende, kpa nte ete ye eka esie ẹkekpepde enye.
Afo ekere ke nso ke Eli akpakanam nditọ esie?— Enye ọkpọkọnọ mmọ ufen. Enye ikpakayakke mmọ ẹnam utom aba ke tent utuakibuot. Edi Eli ikanamke oro, emi akanam Jehovah ayat esịt ye enye ye nditọ esie mbiba. Jehovah ama ebiere ndimia Eli ye nditọ esie ufen.
Samuel ama etịn̄ se Jehovah ọkọdọhọde enye etịn̄ ọnọ Eli
Okoneyo usen kiet ke ini Samuel edede idap, enye okop owo okotde enye: ‘Samuel!’ Enye ama efehe ebịne Eli, edi Eli ọdọhọ enye ete: ‘N̄kokotke fi.’ Ẹma ẹfiak ẹkot Samuel ikaba en̄wen. Ke ẹma ẹkefiak ẹkot enye ọyọhọ ikata, Eli eteme Samuel ete edieke enye afiakde okop ẹkotde enye, yak enye ọdọhọ ete: ‘Mbọk Jehovah tịn̄, koro ami ke n̄kpan̄ utọn̄.’ Se Samuel okonyụn̄ anamde edi oro. Ekem Jehovah ọdọhọ Samuel ete: ‘Dọhọ Eli ete ke mmọn̄ mmia enye ye nditọ esie ufen ke ntak idiọkn̄kpọ oro mmọ ẹnamde.’ Ndi emekere ke ama emem utom Samuel nditobo Eli etop emi?— Ihih, ikememke. Edi okposụkedi emi ndịk akanamde Samuel, enye ama osụk etịn̄ se Jehovah ọkọdọhọde enye etịn̄. Se Jehovah eketịn̄de ama osu. Ẹma ẹwot nditọ Eli mbiba, ndien Eli ama akpa n̄ko.
Samuel ama enịm eti uwụtn̄kpọ ọnọ nnyịn. Enye ama anam se inende okposụkedi emi enye okokụtde mbon en̄wen ẹnamde se idiọkde. Nso ke afo akpanam? Ndi afo eyetie nte Samuel onyụn̄ aka iso anam se inende? Edieke anamde emi, afo ayanam Jehovah ye ete ye eka fo ẹnem esịt.
