Ibuot 6

Akwa Andikpep Ama Anam N̄kpọ Ọnọ Mbon En̄wen

NTE afo emesima owo anam eti n̄kpọ ọnọ fi?— Ọfọn, mbon efen ẹsima owo anam eti n̄kpọ ọnọ mmimọ n̄ko. Kpukpru nnyịn imesima. Akwa Andikpep ama ọfiọk oro, ndien enye ama esinam n̄kpọ ọnọ mme owo kpukpru ini. Enye ọkọdọhọ ete: ‘Ami n̄kedịghe man ẹnam n̄kpọ ẹnọ Mi, edi n̄kedi man nnam n̄kpọ nnọ owo.’—Matthew 20:28.

Ntre edieke nnyịn iyomde nditie nte Akwa Andikpep, nso ke ana nnyịn inam?— Ana nnyịn inam n̄kpọ inọ mbon en̄wen. Ana nnyịn inam nti n̄kpọ inọ mmọ. Edi akpanikọ nte ke ediwak owo isinamke emi. Ke nditịm ntịn̄, ekese owo ẹsiyom mbon en̄wen ẹnanam n̄kpọ ẹnọ mmimọ kpukpru ini. Ini kiet idem mme anditiene Jesus ẹma ẹkere n̄kpọ ke usụn̄ emi. Mmọ kiet kiet ẹkeyom ndidi andikpon n̄kan m̀mê ndidi ọwọrọiso owo.

Usen kiet Jesus akaka isan̄ ye mme mbet esie. Ke mmọ ẹma ẹkedụk obio Capernaum, ekperede Inyan̄ Galilee, kpukpru mmọ ẹma ẹdụk ufọk kiet. Do Jesus ama obụp mmọ mbụme ete: “Mbufo ẹkeneni nso ke usụn̄?” Mmọ ẹma ẹdop uyo koro ke usụn̄ mmọ ẹkeneni m̀mê anie ke otu mmimọ okpon akan.—Mark 9:33, 34.

 Jesus ama ọfiọk ete ke ikenenke mbet imọ ndomokiet ndikere ke imọ idi andikpon n̄kan. Ntre, nte nnyịn ikekpepde ke akpa ibuot n̄wed emi, enye ama enịm ekpri eyen ke ufọt mmọ onyụn̄ ọdọhọ ke mmọ ẹkpenyene ndisụhọde idem nte ekpri eyen oro. Edi kpa ye oro mmọ ikekpepke n̄kpọ. Ntre esisịt ini mbemiso enye akpade, Jesus ama ekpep mmọ n̄kpọ oro mmọ mîkefreke. Nso ke enye akanam?—

Ọfọn, ke adan̄aemi kpukpru mmọ ẹkediade udia ọtọkiet, Jesus ama adaha ọkpọn̄ okpokoro udia onyụn̄ osio ọfọn̄idem esie enịm. Enye ama ada ọfọn̄ ukwọhọdeidem awan̄ ke isịn esie. Ekem enye emen akpan̄kpan̄ esịn mmọn̄. Anaedi mme anditiene enye ẹma ẹkere m̀mê nso ke enye oyom ndinam.

Nte mmọ ẹkesede, Jesus ama asan̄a akanade kpukpru mmọ, onụhọ, onyụn̄ eyet mmọ ukot. Ekem enye ama ada ọfọn̄ ukwọhọdeidem oro ọkwọhọde mmọ ukot. Kam kere ban̄a oro! Nso edieke afo okpokodude do? Ekpeketie fi ke idem didie?—

Mme anditiene enye ikekereke ite ke ama enen Akwa Andikpep ndinam n̄kpọ nnọ mmimọ ke usụn̄ emi. Ama afịna mmọ. Ke akpanikọ, Peter ikenyịmeke Jesus anam usụhọde utom emi ọnọ imọ. Edi Jesus ọkọdọhọ ete ke ekedi akpan n̄kpọ ọnọ imọ ndinam emi.

Nnyịn isiwakke ndiyet kiet eken ukot mfịn. Edi ẹma ẹsinam emi ke ini Jesus okodude ke isọn̄. Nte afo ọmọfiọk ntak?— Ọfọn, ke obio oro Jesus ye mme anditiene enye ẹkedụn̄de, mme owo ẹkesisịne mme ana-in̄wan̄ ikpaukot. Ntre ke ini mmọ ẹsan̄ade ke ndedehe usụn̄, ntọn̄ ama esiyọhọ mmọ ukot. Ekedi edinam mfọnido ndiyet ntọn̄ ke ukot owo oro ekedide esen ke ufọk.

Edi isan̄ enye emi baba owo kiet ke otu mbet Jesus ikenyịmeke ndiyet ukot mmọ eken. Ntre Jesus ama anam oro ke idemesie. Ke ndinam emi, Jesus ama ekpep mme anditiene enye akpan ukpepn̄kpọ. Ama oyom mmọ ẹkpep ukpepn̄kpọ emi. Ndien enye edi ukpepn̄kpọ oro oyomde nnyịn ikpep mfịn.

 Nte afo ọmọfiọk se ukpepn̄kpọ oro edide?— Ke Jesus ama akafiak esịne ọfọn̄idem esie onyụn̄ afiak etetie ke itie esie ke okpokoro, enye ama anam an̄wan̄a ete: ‘Nte mbufo ẹmefiọk se n̄kanamde nnọ mbufo? Mbufo ẹkot Mi Andikpep ye Ọbọn̄, ndien ẹmetịm ẹkot, koro ndide se ẹdọhọde. Edieke Ami ndien, emi ndide Ọbọn̄ ye Andikpep, n̄keyetde mbufo ukot, mbufo nde ẹkpenyene ndiyet kiet eken ukot.’—John 13:2-14.

Mi Akwa Andikpep okowụt ete ke imọ ikoyom mme anditiene imọ ẹnam n̄kpọ ẹnọ kiet eken. Enye ikoyomke mmọ ẹkere ẹban̄a idemmọ kpọt. Enye ikoyomke mmọ ẹkere nte ke mmimọ imedi n̄kpọ ikaha ntre ke mbon en̄wen ẹkpenyene ndinanam n̄kpọ nnọ mmimọ kpukpru ini. Enye okoyom mmọ ẹnyịme ndinam n̄kpọ nnọ mbon en̄wen.

Nte oro ikedịghe eti ukpepn̄kpọ?— Nte afo eyetie nte Akwa Andikpep onyụn̄ anam n̄kpọ ọnọ mbon en̄wen?— Kpukpru nnyịn imekeme ndinam n̄kpọ nnọ mbon en̄wen. Emi ayanam mmọ ẹnem esịt. Edi ke ọfọnde akan kpukpru, emi ayanam Jesus ye Ete esie ẹnem esịt.

Isọn̄ke ndinam n̄kpọ nnọ mbon en̄wen. Edieke afo etịmde ese, afo oyokụt ediwak n̄kpọ oro afo ekemede ndinam nnọ mbon en̄wen. Kere idahaemi: Nte n̄kpọ ndomokiet odu oro afo ekemede ndinam man  an̄wam eka fo? Afo ọmọfiọk ete ke enye anam ediwak n̄kpọ ọnọ fi ye mbonubon eken. Nte afo emekeme ndin̄wam enye?— Ntak mûbụpke enye?

Ndusụk afo emekeme nditịm okpokoro udia mbemiso ubon ẹdiade udia. Mîdịghe anaedi afo emekeme nditan̄ mme usan ke okpokoro ke ubon ẹma ẹkedia n̄kpọ ẹma. Ndusụk nditọwọn̄ ẹsimen mbio ẹkeduọn̄ọ kpukpru usen. Se ededi oro afo ekemede ndinam, afo edinam n̄kpọ ọnọ mbon en̄wen, idem kpa nte Jesus akanamde.

Nte afo emenyene n̄kpri nditọeka iren ye iban emi afo ekemede ndinam n̄kpọ nnọ? Ti, Jesus, kpa Akwa Andikpep, ama anam n̄kpọ ọnọ idem mme anditiene enye. Ke ndinam n̄kpọ nnọ n̄kpri nditọeka fo, afo edikpebe uwụtn̄kpọ Jesus. Nso ke afo ekeme ndinam nnọ mmọ?— Ndusụk afo emekeme ndin̄wam mmọ ẹkpep nditan̄ mme n̄kpọmbre mmọ nnịm ke  ini mmọ ẹbrede mbre ẹma. Mîdịghe eyedi afo emekeme ndin̄wam mmọ ẹsịne ọfọn̄. Mîdịghe ndusụk afo emekeme ndin̄wam mmọ ndibri bed. Nte afo emekeme ndikere mban̄a n̄kpọ efen ekededi oro afo ekemede ndinam nnọ mmọ?— Mmọ ẹyema fi edieke anamde mme n̄kpọ emi, kpa nte mme anditiene Jesus ẹkemade enye.

Ke ufọkn̄wed n̄ko afo emekeme ndinam n̄kpọ nnọ mbon en̄wen. Ekeme ndidi nsan̄a ubet ukpepn̄kpọ fo m̀mê andikpep fo. Edieke mme n̄wed ẹbọhọde owo ẹduọn̄ọ, edidi mfọnido afo ndin̄wam enye ntan̄. Afo emekeme ndinyịme ndikwọhọde obukpọk m̀mê ndinam n̄kpọ efen nnọ andikpep fo. Idem ndiberede usụn̄ufọk nnọ owo edi edinam mfọnido.

Ke ndusụk idaha, nnyịn iyokụt nte ke mme owo idikọmke nnyịn ke ini inamde n̄kpọ inọ mmọ. Nte afo ekere ke emi akpanam nnyịn itre ndinam eti n̄kpọ?— Baba-o! Ediwak owo ikọkọmke Jesus ke nti utom esie. Edi oro ikanamke enye etre ndinam eti n̄kpọ.

Ntre ẹyak nnyịn ikûdede itre ndinam n̄kpọ nnọ mbon en̄wen. Ẹyak iti Akwa Andikpep, Jesus, inyụn̄ idomo nditiene uwụtn̄kpọ esie kpukpru ini.

Kaban̄a mme itien̄wed efen efen oro ẹban̄ade edin̄wam mbon en̄wen, kot Mme N̄ke 3:27, 28; Rome 15:1, 2; ye Galatia 6:2.

[Ndise ke page 37]

Nso ke mme anditiene Jesus ẹkeneni ẹban̄a?

[Ndise ke page 39]

Nso ukpepn̄kpọ ke Jesus ekekpep mme anditiene enye?

[Mme ndise ke page 40, 41]

Nso ke afo ekeme ndinam man an̄wam mbon en̄wen?