Ibuot 5

‘Emi Edi Eyen Mi’

KE INI nditọwọn̄ ẹnamde nti n̄kpọ, mbon oro ẹsede ẹban̄a mmọ ẹsikop inemesịt. Ke ini eyeneren m̀mê eyenan̄wan anamde n̄kpọ ọfọn, ete esie ke inemesịt esikeme ndisian mbon efen nte: “Eyen mi edi emi.”

Jesus esinam se inemde Ete esie esịt kpukpru ini. Ntre Ete esie enem esịt ye enye. Nte afo emeti se Ete Jesus akanamde usen kiet ke ini Jesus okodude ye mme anditiene enye ita?— Ih, Abasi ama etie ko ke heaven etịn̄ ikọ ọnọ mmọ ete: “Emi edi edima Eyen Mi, emi [nnemde esịt] ye enye; ẹkop uyo Esie.”—Matthew 17:5.

Jesus esikop inemesịt ndinam mme n̄kpọ oro ẹnemde Ete esie esịt kpukpru ini. Nte afo ọmọfiọk ntak? Koro enye enen̄ede ama Ete esie. Edieke owo anamde mme n̄kpọ n̄kukụre koro enye enyenede ndinam mmọ, emi esitie nte ọkpọsọn̄ n̄kpọ. Edi ke ini enye anamde ke unyịmesịt, emi esidi mmemmem n̄kpọ. Nte afo ọmọfiọk se ọwọrọde ndinam n̄kpọ ke unyịmesịt?— Enye ọwọrọ ndinen̄ede nyom ndinam n̄kpọ.

Idem mbemiso Jesus ekedide isọn̄, enye ama enyịme ndinam se ededi emi Ete esie ọdọhọde enye anam. Emi edi koro enye amade Ete esie, Jehovah Abasi. Jesus ama enyene utịbe utịbe ifet ke heaven ye Ete esie. Edi Abasi ama enyene akpan utom ọnọ Jesus ndinam. Man anam utom oro, Jesus ekenyene ndikpọn̄ heaven. Enye ekenyene ndimana nte nsekeyen ke isọn̄. Jesus ama enyịme ndinam emi koro Jehovah okoyomde enye anam emi.

Man amana nte nsekeyen ke isọn̄, ama oyom Jesus enyene eka. Nte afo ọmọfiọk owo emi enye ekedide?— Enyịn̄ esie ekedi Mary. Jehovah ama ọdọn̄ angel esie Gabriel ete oto heaven eketịn̄ ikọ ọnọ  Mary. Gabriel ama ọdọhọ Mary ete ke enye ayaman eyeneren. Ẹdikot eyen oro Jesus. Ndien anie edidi ete eyen oro?— Angel oro ọkọdọhọ ete ke Ete eyen oro edidi Jehovah Abasi. Ntak edi oro edikotde Jesus Eyen Abasi.

Afo ekere ke emi eketie Mary didie ke idem?— Nte enye ama ọdọhọ, “Ami nyomke ndidi eka Jesus”? Baba, Mary ama eben̄e idem ndinam se Abasi okoyomde. Edi didie ke Eyen Abasi ke heaven ekeme ndimana nte nsekeyen ke isọn̄? Didie ke emana Jesus okokpụhọde ye emana kpukpru nseknditọ eken? Nte afo ọmọfiọk?—

Ọfọn, Abasi okobot akpa ete ye eka nnyịn, Adam ye Eve, man mmọ ẹkeme ndidiana ọtọkiet ke utịbe utịbe usụn̄. Ke oro ebede, nsekeyen ekeme nditọn̄ọ ndikọri ke esịt idịbi eka esie. Mme owo ẹdọhọ ẹte ke emi edi utịben̄kpọ! Mmenịm ke akpanikọ nte ke afo emenyịme.

Idahaemi Abasi ama anam n̄kpọ oro akakam edide ata utịben̄kpọ akan. Enye ama emen uwem Eyen esie ke heaven edisịn ke idịbi Mary. Akananam Abasi ikanamke oro ke mbemiso, inyụn̄ inamke aba toto ke ini oro. Nte utịp utịben̄kpọ emi, Jesus ama ọtọn̄ọ ndikọri ke esịt idịbi Mary kpa nte nseknditọ eken ẹsikọride ke esịt idịbi eka mmọ. Ke oro ebede, Mary ama ọdọ Joseph.

Ke ini ekekemde Jesus ndimana, Mary ye Joseph ẹkeka obio Bethlehem. Edi mme owo ẹma ẹyọhọ Bethlehem. Ubet ndomokiet ikakam idụhe inọ Mary ye Joseph, ntre mmọ ẹkenyene ndidu ke ebiet  oro ẹkesidọn̄de mme ufene. Do ke Mary akaman eyen, ndien ẹma ẹsịn Jesus ke usịnudia ufene, nte afo ekemede ndikụt mi. Usịnudia ufene edi itie oro ẹsinịmde udia ẹnọ mme enan̄ ye mme unam efen ndidia.

Mme n̄kpọ n̄kpaidem ẹma ẹtịbe ke okoneyo oro Jesus akamanade. Angel kiet ama ekese ndusụk mme ekpemerọn̄ oro ẹkedude ẹkpere Bethlehem. Enye ama asian mmọ nte ke Jesus ekedi akpan owo. Angel oro ọkọdọhọ ete: ‘Sese, mmada eti mbụk oro edinamde mme owo ẹkop inemesịt nsọk mbufo. Mfịn Owo amana emi edinyan̄ade mme owo.’—Luke 2:10, 11.

Angel oro ọkọdọhọ mme ekpemerọn̄ ete ke mmọ ẹkeme ndikụt Jesus ke Bethlehem, nte anade ke usịnudia ufene. Ekem, inikiet inikiet, mme angel eken ke heaven ẹma ẹdiana ye akpa angel oro ke  nditoro Abasi. Mme angel oro ẹkekwọ ẹte: ‘Ubọn̄ enyene Abasi, emem onyụn̄ odu ke isọn̄ ke otu owo emi Enye enende iso ye mmọ.’—Luke 2:12-14.

Ke ini mme angel ẹma ẹkedaha, mme ekpemerọn̄ ẹma ẹka Bethlehem ẹkekụt Jesus. Do mmọ ẹma ẹsian Joseph ye Mary ẹban̄a kpukpru nti ikọ oro mmọ ẹkekopde. Nte afo emekeme ndikere nte Mary okokopde inemesịt ke enye ndikenyịme ndidi eka Jesus?

Ke ukperedem, Joseph ye Mary ẹma ẹmen Jesus ẹka Nazareth. Ebiet oro ke Jesus ọkọkọri ọwọrọ owo. Ke ini enye ama okokpon, enye ama ọtọn̄ọ akwa utom unọ ukpep esie. Emi ekedi ubak utom oro Jehovah Abasi okoyomde Eyen  esie anam ke isọn̄. Jesus ama enyịme ndinam utom oro koro enye ama enen̄ede ama Ete esie eke heaven.

Mbemiso Jesus ọkọtọn̄ọde utom esie nte Akwa Andikpep, John Andinịm owo Baptism ama enịm enye baptism ke Akpa Jordan. Do n̄kpọ ndyọ kiet ama etịbe! Nte Jesus ọkọwọrọde ke mmọn̄, Jehovah ama etie ke heaven etịn̄ ikọ ete: “Emi edi edima Eyen Mi, emi esịt enemde Mi eti-eti ye Enye.” (Matthew 3:17) Nte esịt isinemke fi ke ini ete ye eka fo ẹsiande fi ẹte ke mmimọ imama fi?— Nnyịn imekeme ndinịm ke akpanikọ nte ke Jesus ama enem esịt n̄ko.

Jesus ama anam se inende kpukpru ini. Enye ikanamke nte idi owo oro enye mîkedịghe. Enye ikasianke mme owo ite ke imọ ikedi Abasi. Angel Gabriel akasian Mary ete ke ẹdikot Jesus Eyen Abasi. Jesus ke idemesie ọkọdọhọ ke imọ idi Eyen Abasi. Ndien enye ikasianke mme owo ite ke imọ imọfiọk n̄kpọ ikan Ete imọ. Enye ọkọdọhọ ete: “Ete omokpon akan Mi.”—John 14:28.

Idem ke heaven, ke ini Ete Jesus ọkọnọde enye utom ndinam, Jesus ama anam. Enye ikọdọhọke ite ke imọ iyanam utom oro edi ọkpọn̄ akanam n̄kpọ efen. Enye ama ama Ete esie. Ntre enye ama akpan̄ utọn̄ ke se Ete esie eketịn̄de. Ekem ke ini Jesus ekedide isọn̄, enye ama anam se Ete esie eke heaven ọkọdọn̄de enye anam. Enye ikabiatke ini esie inam n̄kpọ efen. Eyịghe idụhe nte Jehovah enemde esịt ye Eyen esie!

Nnyịn n̄ko imoyom ndinem Jehovah esịt, nte nnyịn iyomke?— Do nnyịn inyene ndiwụt nte ke nnyịn imenen̄ede ikpan̄ utọn̄ inọ Abasi, nte Jesus akakpan̄de. Abasi etịn̄ ikọ ọnọ nnyịn ebe ke Bible. Ikpenenke ndinam nte ke imakpan̄ utọn̄ inọ Abasi edi ekem inịm ke akpanikọ inyụn̄ inam mme n̄kpọ oro ẹtuahade ye Bible, nte ekpenen?— Ndien ti, nnyịn iyokop inemesịt ndinem Jehovah esịt edieke nnyịn inen̄erede ima enye.

Idahaemi kot mme itien̄wed efen ke Bible emi ẹwụtde se oyomde nnyịn ifiọk inyụn̄ inịm ke akpanikọ iban̄a Jesus: Matthew 7:21-23; John 4:25, 26; ye 1 Timothy 2:5, 6.

[Ndise ke page 33]

Nso ke angel Gabriel akasian Mary?

[Ndise ke page 34]

Ntak ẹkesịnde Jesus ke usịnudia ufene?

[Ndise ke page 35]

Nso eti mbụk ke kiet ke otu mme angel emi okobụk ọnọ mme ekpemerọn̄?