Ibuot 33

Jesus Ekeme Ndikpeme Nnyịn

KE INI Jesus ọkọkọride okpon onyụn̄ ọfiọkde nte ẹkekpemede imọ ke ini ikedide eyenọwọn̄, nte afo emekere ke enye ama ọbọn̄ akam ọnọ Jehovah onyụn̄ ọkọm enye?— Afo ekere ke nso ke Jesus ọkọdọhọ Mary ye Joseph ke ini enye ekedide edifiọk ke mmọ ẹma ẹnịm imọ uwem ebe ke ndimen imọ n̄ka Egypt?—

Nte ededi, Jesus idịghe aba nsekeyen. Enye ikam idụn̄ke ke isọn̄ nte enye okodụn̄de ini kiet ko. Edi nte afo omokụt mfịn nte ke etie nte ndusụk owo ẹda Jesus n̄kukụre nte nsekeyen emi esịnede ke usịnudia ufene?— Emi esidi ntre ke ini Christmas emi ẹsikụtde mme ndise oro ẹwụtde Jesus nte nsekeyen ke ediwak itie.

Idem okposụkedi Jesus mîdụhe aba ke isọn̄, nte afo emenịm ke akpanikọ ete ke enye ke odu uwem?— Ih, ẹma ẹnam enye eset ke n̄kpa, ndien idahaemi enye edi okopodudu Edidem ke heaven. Afo ekere ke nso ke enye ekeme ndinam man ekpeme mbon oro ẹnamde n̄kpọ ẹnọ enye?— Ọfọn, ke ini Jesus okodude ke isọn̄, enye ama owụt nte imọ ikemede ndikpeme mbon oro ẹmade imọ. Yak ise nte enye akanamde oro usen kiet ke ini enye akanamde isan̄ ke ubom ye mme mbet esie.

 Edi ufọt uwemeyo. Jesus ekekpep n̄kpọ ofụri usen oro ekpere Inyan̄ Galilee, emi edide akwa n̄kpọdiọhọ mmọn̄ emi ọniọn̄de ke n̄kpọ nte kilomita 20 onyụn̄ atarade ke n̄kpọ nte kilomita 12. Idahaemi enye ọdọhọ mme mbet esie ete: “Ẹyak iwat ibe ika ke edem inyan̄ oko.” Ntre mmọ ẹdụk ubom ẹnyụn̄ ẹtọn̄ọ ndiwat mbe inyan̄ oro. Jesus okop mmemidem etieti, ntre enye aka etakubom okosụhọde ana ke udoribuot. Ibịghike enye ede ọkpọsọn̄ idap.

Mme mbet ẹtaba idap ẹwat ubom. Kpukpru n̄kpọ ẹfọn ke ndusụk ini, edi ekem oyobio ọtọn̄ọ. Enye efịme ọkpọsọn̄ ọkpọsọn̄, ndien mbufụt mmọn̄ aka iso ndikpon. Mbufụt mmọn̄ ọtọn̄ọ ndidụk ubom, ndien mmọn̄ ọtọn̄ọ ndiyọhọ ubom oro.

Mme mbet ẹkop ndịk nte ke mmimọ imọn̄ isịp. Edi Jesus ikopke ndịk. Enye ke osụk ede idap ke etakubom. Ke akpatre, mme mbet ẹdemede enye ke idap, ẹnyụn̄ ẹdọhọ ẹte: ‘Andikpep, Andikpep, nyan̄a nnyịn; nnyịn imọn̄ ikpan̄a ke ntak oyobio emi.’ Ke okopde oro, Jesus adaha ada onyụn̄ etịn̄ ikọ ọnọ ofụm ye oyobio. Enye ọdọhọ ete: “Dobo, na sụn̄.”

 Inikiet inikiet oyobio oro etre, ndien mmọn̄ oro ana sụn̄. Idem akpa mme mbet. Akananam mmọ ikwe n̄kpọ ekededi eke etiede ntre. Mmọ ẹtọn̄ọ ndidọhọ kiet eken ẹte: “Anie nan̄a edi emi? Enye owụk kpa ofụm ye mmọn̄, ndien mmọ ẹkop uyo Esie.”—Luke 8:22-25; Mark 4:35-41.

Nte afo ọmọfiọk owo emi Jesus edide?— Nte afo ọmọfiọk ebiet emi enye adade akwa odudu esie oto?— Mme mbet ikpenyeneke ndikop ndịk ke ini Jesus okodude do ye mmọ, koro Jesus ikedịghe ikpîkpu owo. Enye ama ekeme ndinam mme utịbe utịbe n̄kpọ emi owo efen mîkekemeke ndinam. Yak ntịn̄ n̄kpọ efen emi enye akanamde ini kiet ke inyan̄ emi oyobio efịmede nnọ fi.

Edi ndusụk ini ke ukperedem, ke usen efen. Ke ini esịmde mbubịteyo, Jesus ọdọhọ mme mbet esie ete ẹdụk ubom ẹnyụn̄ ẹbem imọ iso ẹbe ẹka edem inyan̄ oko. Ekem Jesus ọdọk enyọn̄ obot ke idemesie ikpọn̄. Enye edi ndobo ndobo itie emi enye ekemede ndibọn̄ akam nnọ Ete esie, Jehovah Abasi.

 Mme mbet ẹdụk ubom ẹnyụn̄ ẹtọn̄ọ ndiwat mbe inyan̄ oro. Edi ibịghike oyobio ọtọn̄ọ ndifịme. Enye ofụme ọkpọsọn̄ ọkpọsọn̄. Idahaemi eyo okụt. Mmọ ẹfịt afara ẹnyụn̄ ẹtọn̄ọ ndiwat ke uden̄. Edi mmọ ikaha anyan koro ọkpọsọn̄ oyobio ke eberi mmọ. Ubom oro ke enyen̄e aka iso enyen̄e afiak edem ke akwa mbufụt mmọn̄ oro, ndien mmọn̄ adaha odụk ubom. Mmọ ẹdomo ọkpọsọn̄ ukeme ndisịm mbenesụk, edi mmọ ikemeke.

Jesus osụk odu ikpọn̄ ke obot. Enye odu do ke anyan ini. Edi idahaemi enye ekeme ndikụt nte ke mme mbet esie ẹdu ke afanikọn̄ ke akwa mbufụt mmọn̄ oro. Ntre enye osụhọde ke obot oro edi mbeninyan̄ oro. Jesus oyom ndin̄wam mme mbet esie, ntre enye ọtọn̄ọ ndisan̄a ke enyọn̄ mbufụt mmọn̄ oro mbịne mmọ!

Nso ikpetịbe edieke afo okpodomode ndisan̄a ke enyọn̄ mmọn̄?— Afo ekpeden̄, ndien afo emekeme ndin̄wọn̄ mmọn̄ n̄kpa. Edi Jesus edi san̄asan̄a owo. Enye enyene san̄asan̄a odudu. Jesus enyene ndisan̄a anyan usụn̄ man esịm ubom oro. Ntre edi n̄kpọ nte usiere ke ini mme mbet ẹkụtde nte Jesus asan̄ade ke enyọn̄ mmọn̄ ebịne mmọ. Edi mmọ ikemeke ndinịm se mmọ ẹkụtde. Ndịk anam mmọ etieti, ndien mmọ ẹfiori n̄kpo ke ntak ndịk. Ekem Jesus ọdọhọ mmọ ete: “Ẹsọn̄ esịt; edi Ami; ẹkûfehe ndịk.”

Ke ndondo oro Jesus ọdọkde odụk ubom, oyobio oro etre. Idem afiak akpa mme mbet. Mmọ ẹnụhọ ẹnọ Jesus ẹnyụn̄ ẹdọhọ ẹte: “Ke akpanikọ Afo edi Eyen Abasi.”—Matthew 14:22-33; John 6:16-21.

Nte ikpedịghe utịben̄kpọ ndikpodu uwem ke ini oro nnyụn̄ n̄kụt nte Jesus anamde mme n̄kpọ ntre?— Nte afo ọmọfiọk ntak emi Jesus akanamde mme utịben̄kpọ oro?— Enye akanam mme n̄kpọ oro koro enye akamade mme mbet esie okonyụn̄ oyomde ndin̄wam mmọ. Edi enye n̄ko ekesinam mme n̄kpọ oro man owụt akwa odudu emi enye ekenyenede edinyụn̄ adade anam n̄kpọ ke ini iso nte Andikara Obio Ubọn̄ Abasi.

 Idem mfịn Jesus esiwak ndida odudu esie n̄kpeme mme anditiene enye mbiọn̄ọ mme ukeme oro Satan esịnde man etre mmọ nditịn̄ nnọ mbon efen mban̄a Obio Ubọn̄ Abasi. Edi Jesus idaha odudu esie ikpeme mme mbet esie mbak mmọ ididuọ udọn̄ọ m̀mê ndikọk mmọ ke ini ẹdọn̄ọde. Idem kpukpru mme mbet Jesus ẹma ẹkpan̄a ke akpatre. Ẹma ẹwot James eyeneka John, ndien ẹma ẹsịn John ke ufọk-n̄kpọkọbi.—Utom 12:2; Ediyarade 1:9.

Ukem oro ke edi mfịn. Edide mme owo ẹnam n̄kpọ ẹnọ Jehovah m̀mê inamke, kpukpru mmọ ẹkeme ndidọn̄ọ ẹnyụn̄ ẹkpan̄a. Edi ibịghike, mme n̄kpọ ẹyekpụhọde ke ini Jesus akarade nte Edidem ukara Abasi. Owo ndomokiet idikopke ndịk ke ini oro, koro Jesus ayada odudu esie ọdiọn̄ kpukpru mbon oro ẹkopde uyo esie.—Isaiah 9:6, 7.

Mme itien̄wed efen emi ẹwụtde akwa odudu Jesus, kpa enye emi Abasi anamde edi Andikara ke Obio Ubọn̄ Abasi, ẹdi Daniel 7:13, 14; Matthew 28:18; ye Ephesus 1:20-22.

[Mme ndise ke page 172]

Didie ke afo ese Jesus—nte okopodudu Edidem m̀mê nsekeyen emi ananade un̄wam?

[Ndise ke page 173]

Nso ke Jesus ọdọhọ ofụm ye oyobio?

[Ndise ke page 174]

Ntak emi Jesus ekesinamde mme utịben̄kpọ?

[Ndise ke page 176]

Didie ke Jesus ekpeme mme anditiene enye mfịn?