Ibuot 8

Mbon En̄wen Ẹkon̄ Ẹkan Nnyịn

MMENỊM ke akpanikọ nte ke afo eyenyịme ete ke mbon en̄wen ẹkon̄, m̀mê ẹkpon, ẹnyụn̄ ẹnyene odudu ẹkan mi ye afo. Afo ọkpọdọhọ ke anie okon̄ akan nnyịn?— Jehovah Abasi. Nso kaban̄a Eyen esie, kpa Akwa Andikpep? Nte enye okon̄ akan nnyịn?— Ih, enye okon̄.

Jesus ama odụn̄ ye Abasi ke heaven. Enye ekedi spirit, m̀mê angel. Nte Abasi ama obot mme spirit, m̀mê mme angel efen?— Ih, enye ama obot ediwak miliọn mme angel. Mme angel emi n̄ko ẹkon̄ ẹnyụn̄ ẹnen̄ede ẹnyene odudu ẹkan nnyịn.—Psalm 104:4; Daniel 7:10.

Nte afo emeti enyịn̄ angel oro eketịn̄de ikọ ọnọ Mary?— Enye ekekere Gabriel. Enye ama ọdọhọ Mary ete ke nsekeyen esie edidi Eyen Abasi. Abasi ama esịn uwem Eyen esie eke spirit ke idịbi Mary man Jesus ekeme ndimana nte nsekeyen ke isọn̄.—Luke 1:26, 27.

Nte afo emenịm utịben̄kpọ oro ke akpanikọ? Nte afo emenịm ke akpanikọ nte ke Jesus ama odụn̄ ye Abasi ke heaven?— Jesus ọkọdọhọ ke imọ ima idụn̄. Enye akasan̄a didie ọfiọk emi? Ọfọn, ke ini enye ekedide ekpri eyen, eyedi Mary ama etịn̄ ọnọ enye se Gabriel ọkọdọhọde. N̄ko, etie nte Joseph ama etịn̄ ọnọ Jesus ete ke Abasi ekedi ata Ete esie.

Ke ini Jesus akanade baptism, Abasi ama etie ke heaven ọdọhọ ete: ‘Emi edi Eyen Mi.’  (Matthew 3:17) Ndien ke okoneyo oro mbemiso enye akpade, Jesus ama ọbọn̄ akam ete: “Ete da ubọn̄, eke n̄kenyenede ye Afo ndien ererimbot edidu, nọ Mi.” (John 17:5) Ih, Jesus okoyom ndifiak nnyọn̄ n̄kodụn̄ ye Abasi ke heaven. Didie ke enye ekeme ndidụn̄ do?— N̄kukụre usụn̄ edi Jehovah Abasi ndifiak nnam enye edi owo eke spirit, m̀mê angel.

Idahaemi nyom ndibụp fi akpan mbụme kiet. Nte kpukpru angel ẹfọn? Nso ke afo ekere?— Ọfọn, ini kiet ko, kpukpru mmọ ẹma ẹfọn. Emi ekedi koro Jehovah okobot mmọ, ndien kpukpru n̄kpọ oro enye anamde ẹfọn. Edi ekem kiet ke otu mme angel oro ama akabade ọdiọk. Didie ke oro eketịbe?

Man inyene ibọrọ, ana nnyịn iti ini oro Abasi okobotde akpa eren ye n̄wan, Adam ye Eve. Ndusụk owo ẹdọhọ ke mbụk mmọ edi ata nsu. Edi Akwa Andikpep ama ọfiọk ke enye ekedi akpanikọ.

Ke ini Abasi okobotde Adam ye Eve, enye ama esịn mmọ ke ediye in̄wan̄ ke ebiet oro ẹkotde Eden. Enye ekedi itie inemesịt, kpa Paradise. Mmọ ẹkpekekeme ndinyene ediwak nditọ, akamba ubon, ẹnyụn̄ ẹdụn̄ ke paradise ke nsinsi. Edi akpan ukpepn̄kpọ ama odu oro okoyomde mmọ ẹkpep. Enye edi ukpepn̄kpọ oro nnyịn ima iketetịn̄ iban̄a ke mbemiso. Yak ise m̀mê nnyịn imeti enye.

 Jehovah ama ọdọhọ Adam ye Eve ete ke mmọ ẹkeme ndidia kpukpru mfri eto in̄wan̄ oro mmọ ẹyomde ndidia. Edi eto kiet ama odu oro mîkanaha mmọ ẹdia. Abasi ama etịn̄ ọnọ mmọ se iditịbede edieke mmọ ẹdiade. Enye ọkọdọhọ ete: ‘Mbufo ẹyekpa n̄kpa.’ (Genesis 2:17; 3:3) Ntre, nso ikedi ukpepn̄kpọ oro okoyomde Adam ye Eve ẹkpep?—

Enye ekedi ukpepn̄kpọ n̄kopitem. Ih, uwem ọkọn̄ọ ke n̄kopitem nnọ Jehovah Abasi! Ikekemke Adam ye Eve n̄kukụre ndidọhọ ke mmimọ iyokop uyo esie. Mmọ ẹkenyene ndinanam emi n̄wụt. Edieke mmọ ẹkpekekopde uyo Abasi, mmọ ẹkpekenyene ndiwụt ke mmimọ imama enye inyụn̄ iyom enye edi Andikara mmimọ. Do mmọ ẹkpekedụn̄ ke nsinsi ke Paradise. Edi edieke mmọ ẹdiade eto oro, nso ke oro okpowụt?—

Enye okpowụt nte ke mmọ inen̄ekede iwụt esịtekọm iban̄a se Abasi ọkọnọde mmọ. Nte afo okpokokop uyo Jehovah edieke afo okpokodude do?— Ke ntọn̄ọ, Adam ye Eve ẹma ẹkop. Edi ekem owo kiet oro okokon̄de akan mmọ ama abian̄a Eve. Enye ama anam Eve ọsọn̄ ibuot ye Jehovah. Anie ekedi oro?—

Bible ọdọhọ ke urụkikọt eketịn̄ ikọ ọnọ Eve. Edi  afo ọmọfiọk ete ke urụkikọt ikemeke nditịn̄ ikọ. Ntre didie ke enye ekekeme nditịn̄ ikọ?— Angel kiet akanam etie nte ke urụkikọt eketịn̄ ikọ. Edi angel oro ekenen̄ede etịn̄ ikọ. Angel oro ama ọtọn̄ọ ndikere ndiọi n̄kpọ. Enye okoyom Adam ye Eve ẹtuak ibuot ẹnọ imọ. Enye okoyom mmọ ẹkop uyo imọ. Enye okoyom ndida itie Abasi.

Ntre idiọk angel oro ama esịn ndiọi ekikere ke esịt Eve. Ebede ke urụkikọt, enye ama ọdọhọ Eve ete: ‘Abasi iketịn̄ke akpanikọ inọ mbufo. Mbufo idikpaha edieke ẹdiade eto oro. Mbufo ẹyenyene ifiọk nte Abasi.’ Nte afo ekpekenịm se uyo oro ọkọdọhọde?—

Eve ama ọtọn̄ọ ndiyom n̄kpọ oro Abasi mîkọnọhọ enye. Enye ama adia mfri eto oro ẹkekpande. Ekem enye ama ọnọ Adam ndusụk. Adam ikenịmke se urụkikọt oro eketịn̄de. Edi udọn̄ esie ndidụn̄ ye Eve ama okpon akan ima oro enye akamade Abasi. Ntre enye ama adia eto oro n̄ko.—Genesis 3:1-6; 1 Timothy 2:14.

Nso ikedi utịp?— Adam ye Eve ẹma ẹkabade ẹdi mme anana mfọnmma, ẹkọri ẹsọn̄, ẹnyụn̄ ẹkpan̄a. Ndien sia mmọ ẹkedide mme anana mfọnmma, kpukpru nditọ mmọ ẹkedi mme anana mfọnmma n̄ko ndien ke akpatre  ẹkọri ẹsọn̄ ẹnyụn̄ ẹkpan̄a. Abasi ikosụhu nsu! Uwem ọkọn̄ọ ke ndikop uyo esie. (Rome 5:12) Bible etịn̄ ọnọ nnyịn ete ke ẹkot angel oro okosude nsu ọnọ Eve Satan kpa Devil, ndien ẹkot mme angel eken oro ẹkekabarede ẹdiọk mme demon.—James 2:19; Ediyarade 12:9.

Idahaemi, nte afo emekeme ndifiọk ntak emi eti angel oro Abasi okobotde akakabarede ọdiọk?— Ekedi koro enye ama ọtọn̄ọ ndikere ndiọi n̄kpọ. Enye okoyom ndidi Andikon̄ N̄kan. Enye ama ọfiọk ete ke Abasi ama ọdọhọ Adam ye Eve ẹnyene nditọ, ndien enye okoyom kpukpru mmọ ẹtuak ibuot ẹnọ imọ. Devil oyom ndinam kpukpru owo ẹsọn̄ ibuot ye Jehovah. Ntre enye odomo ndisịn ndiọi ekikere ke esịt nnyịn.—James 1:13-15.

Devil ọdọhọ ke idụhe owo ndomokiet oro enen̄erede ama Jehovah. Enye ọdọhọ ete ke ami ye afo imaha Abasi ye nte ke nnyịn inen̄ekede iyom ndinam se Abasi ọdọhọde. Enye ọdọhọ ke nnyịn ikop uyo Jehovah n̄kukụre ke ini kpukpru n̄kpọ ẹsan̄ade ke usụn̄ oro nnyịn imade. Ndi Devil enen? Ndi nnyịn itie ntre?

Akwa Andikpep ọkọdọhọ ete ke Devil edi osu nsu! Jesus ama owụt ke imọ imenen̄ede ima Jehovah ebe ke ndikop uyo Esie. Ndien Jesus ikokopke uyo Abasi n̄kukụre ke ini ekedide mmemmem ndinam ntre. Enye akanam emi kpukpru ini, idem ke ini mbon efen ẹkenamde n̄kpọ ọsọn̄ ye enye. Enye ama anam akpanikọ ọnọ Jehovah tutu esịm n̄kpa. Oro edi ntak emi Abasi akanamde enye eset ke n̄kpa man odu uwem ke nsinsi.

Ntre anie ke afo ọkpọdọhọ ke edi n̄kponn̄kan asua nnyịn?— Satan kpa Devil. Nte afo emekeme ndikụt enye?— Ke akpanikọ ukemeke! Edi nnyịn imọfiọk ite ke enye odu ye nte ke enye okon̄ onyụn̄ enen̄ede enyene odudu akan nnyịn. Edi, anie okon̄ akan Devil?— Jehovah Abasi. Ntre nnyịn imọfiọk ite ke Abasi ekeme ndikpeme nnyịn.

Kot ban̄a Owo emi nnyịn ikpatuakde ibuot inọ: Deuteronomy 30:19, 20; Joshua 24:14, 15; Mme N̄ke 27:11; ye Matthew 4:10.

[Ndise ke page 47]

Eyedi Mary ye Joseph ẹketịn̄ nso ẹnọ Jesus?

[Ndise ke page 48, 49]

Didie ke Adam ye Eve ẹkpekekeme ndidụn̄ ke nsinsi ke Paradise?

[Ndise ke page 50]

Anie akanam urụkikọt etịn̄ ikọ ọnọ Eve?

[Mme ndise ke page 50]

Nso iketịbe inọ Adam ye Eve ke mmọ ẹma ẹkesọn̄ ibuot ye Abasi?