Ibuot 44

Mme Ufan Nnyịn Ẹkpenyene Ndima Abasi

MME ufan ẹdi mme owo oro nnyịn isimade ndida nneme nneme nnyụn̄ ndu ọtọkiet. Edi, edi akpan n̄kpọ ndinyene nti orụk ufan. Afo ekere ke anie edi mfọnn̄kan ufan oro nnyịn ikemede ndinyene?— Ih, Jehovah Abasi.

Nte nnyịn ke akpanikọ imekeme ndidi ufan Abasi?— Ọfọn, Bible ọdọhọ ke Abraham, kpa eren emi okodude uwem anyan ini ko, ekedi “Ufan Abasi.” (James 2:23) Ndi afo ọmọfiọk ntak emi enye ekedide ufan Abasi?— Bible ọbọrọ ete ke Abraham ama osụk ibuot ọnọ Abasi. Enye ama osụk ibuot idem ke ini se ẹkedọhọde enye anam ọkọsọn̄de. Ntre man idi ufan Jehovah, ana nnyịn inam se inemde enye esịt, kpa nte Abraham akanamde ye nte Akwa Andikpep anamde kpukpru ini.—Genesis 22:1-14; John 8:28, 29; Mme Hebrew 11:8, 17-19.

 Jesus ọkọdọhọ mme apostle esie ete: ‘Mbufo ẹdi mme ufan Mi edieke mbufo ẹnamde n̄kpọ eke ntemede mbufo.’ (John 15:14) Sia kpukpru n̄kpọ oro Jesus eketịn̄de ọnọ mme owo ẹketode Jehovah, Jesus ọkọdọhọ ke mme ufan imọ ẹdi mme owo oro ẹnamde se Abasi ọdọhọde mmọ ẹnam. Ih, kpukpru ufan esie ẹma ẹma Abasi.

Ndusụk mme ata n̄kpet n̄kpet ufan Akwa Andikpep ẹkedi mme apostle esie, emi afo ekemede ndikụt ndise mmọ ke page 75 ke n̄wed emi. Mmọ ẹma ẹsan̄a ye enye ẹnyụn̄ ẹn̄wam enye ke utom ukwọrọikọ. Jesus ama abiat ekese ini ye iren emi. Mmọ ẹma ẹsidia udia ọtọkiet. Mmọ ẹma ẹsineme n̄kpọ ọtọkiet ẹban̄a Abasi. Ndien mmọ ẹma ẹsinam mme n̄kpọ eken ọtọkiet. Edi Jesus ama enyene ediwak ufan en̄wen. Enye ama esidu ye mmọ, ndien mmọ ẹma ẹsikop inem ndidu ọtọkiet.

Ubon kiet emi Jesus ekesimade ndidu ye mmọ ẹkedụn̄ ke ekpri obio Bethany, emi ọwọrọde esisịt ọkpọn̄ akwa obio Jerusalem. Ndi afo emeti mmọ?— Mmọ ẹkedi Mary ye Martha ye eyeneka mmọ  eren, Lazarus. Jesus okokot Lazarus ufan. (John 11:1, 5, 11) Ntak emi Jesus akamade ubon emi onyụn̄ amade ndidu ye mmọ ekedi nte ke mmọ ẹma ẹma Jehovah ẹnyụn̄ ẹnam n̄kpọ Esie.

Emi iwọrọke ite ke Jesus ikọfọnke ido ye mbon oro mîkanamke n̄kpọ Abasi. Enye ama ọfọn ido ye mmọ. Enye ama esikam aka ufọk mmọ onyụn̄ adia udia ye mmọ. Emi ama anam ndusụk owo ẹdọhọ ke Jesus ekedi “ufan mme ọbọ a-tax ye mme anamidiọk.” (Matthew 11:19, NW) Akpanikọ edi nte ke Jesus ikakaha ufọk mme owo emi koro enye akamade usụn̄ uwem mmọ. Enye akaka man ekeme nditịn̄ ikọ ye mmọ mban̄a Jehovah. Enye ama odomo ndin̄wam mmọ ẹkpụhọde mme idiọk usụn̄ mmọ ẹnyụn̄ ẹnam n̄kpọ Abasi.

Emi ama etịbe usen kiet ke obio Jericho. Jesus akasan̄a ebe aka Jerusalem. Akwa udịm owo ẹma ẹdu, ndien eren kiet emi ekerede Zacchaeus ama odu ke otu akwa udịm owo emi. Enye okoyom ndikụt Jesus. Edi Zacchaeus ekedi imụk owo, ndien enye ikekemeke ndikụt Jesus ke ntak akwa udịm owo oro. Ntre enye ama efehe ebe iso onyụn̄ ọdọk eto man enen̄ede okụt Jesus ke ini enye edisan̄ade ebe.

Ke ini Jesus esịmde eto oro, enye ama emenede enyịn onyụn̄ ọdọhọ ete: ‘Sọp sụhọde di, koro mmọn̄  ndi ufọk fo mfịn.’ Edi Zacchaeus ekedi owo inyene emi akanamde ndioi n̄kpọ. Ntak emi Jesus okoyomde ndika ufọk utọ owo oro?—

Ikedịghe koro Jesus akamade usụn̄ uwem owo emi. Enye akaka do man eneme nneme ye Zacchaeus aban̄a Abasi. Enye ama okụt nte owo oro ekesịnde ọkpọsọn̄ ukeme ndikụt imọ. Ntre enye ama ọfiọk ete ke ekeme ndidi Zacchaeus ayakpan̄ utọn̄. Emi ekedi eti ini ndineme nneme ye enye mban̄a usụn̄ oro Abasi ọdọhọde mme owo ẹdu uwem.

Ntre, nso itịbe idahaemi nte utịp?— Zacchaeus ama mme ukpepn̄kpọ Jesus. Enye enen̄ede atua n̄kpọfiọk ke ndikabian̄a mme owo, ndien enye ọn̄wọn̄ọ ndikpe okụk oro enye mîkenyeneke unen ndibọ. Ekem enye akabade edi anditiene Jesus. Ini oro ndien ke Jesus ye Zacchaeus ẹkabade ẹdi ufan.—Luke 19:1-10.

Edieke nnyịn ikpebede Akwa Andikpep, ndi nnyịn iyaka ikese mme owo oro mîdịghe mme ufan nnyịn?— Ih. Edi nnyịn idikaha ufọk mmọ koro nnyịn imade usụn̄ uwem mmọ. Ndien nnyịn iditieneke mmọ inam ndiọi n̄kpọ. Nnyịn idika ikese mmọ man ikeme nditịn̄ ikọ ye mmọ mban̄a Abasi.

 Edi mme n̄kpet n̄kpet ufan nnyịn ẹdi mbon oro nnyịn isinen̄erede ima ndidu ọtọkiet. Man ẹdi nti orụk ufan, ana mmọ ẹdi mbon oro Abasi amade. Eyedi ndusụk mmọ ikam ifiọkke enye emi Jehovah edide. Edi nnyịn imekeme ndin̄wam mmọ edieke mmọ ẹyomde ndikpep n̄kpọ mban̄a enye. Ndien ke ini oro mmọ ẹdide ẹdima Jehovah nte nnyịn imade, nnyịn imekeme ndikabade ndi n̄kpet n̄kpet ufan.

Usụn̄ efen odu ndifiọk m̀mê owo eyedi eti ufan. Se mme n̄kpọ oro enye esinamde. Ndi enye esinam mbon en̄wen idiọkn̄kpọ ndien ekem asak? Oro ifọnke, nte ọfọn?— Ndi enye esiwak ndinyene mfịna ye mme owo? Nnyịn iyomke ndinyene mfịna ye enye, ndi imoyom?— Mîdịghe nte enye esikokoi anam ndiọi n̄kpọ ndien ekem ekere ke imọ imọfiọk n̄kpọ sia owo mîmụmke imọ? Idem ọkpọkọm owo ikomụmke enye, Abasi ama okụt se enye akanamde, nte ikekwe? Nte afo emekere ke mme owo oro ẹnamde mme utọ n̄kpọ emi ẹyedi nti ufan nnyịn?—

Mbọk da Bible fo di. Yak ise se enye etịn̄de aban̄a nte mme ufan nnyịn ẹkemede nditụk uwem nnyịn. Itie N̄wed Abasi oro odu ke 1 Corinth ibuot 15, ufan̄ikọ 33. Nte afo omokụt enye?— Enye okot ete: “Ẹkûbian̄a idem mbufo ke n̄kpọ emi. Idiọk nsan̄a ababiat eti ido.” Emi ọwọrọ nte ke edieke nnyịn isan̄ade ye mme idiọk owo, nnyịn iyakabade idiọk. Ndien edi akpanikọ n̄ko nte ke nti ufan ẹsin̄wam nnyịn ndinyene nti edu.

Ẹyak nnyịn ikûdede ifre nte ke ata akpan Owo ke uwem nnyịn edi Jehovah. Nnyịn iyomke ndibiat itie ufan nnyịn ye enye, nte imoyom?— Ntre ana nnyịn idu ke ukpeme ndinam ufan ye mbon oro ẹmade Abasi kpọt.

Ẹwụt nte nti orụk ufan ẹdide akpan n̄kpọ ke Psalm 119:115; Mme N̄ke 13:20; 2 Timothy 2:22; ye 1 John 2:15.

[Ndise ke page 227]

Ntak emi Abraham ekedide “Ufan Abasi”?

[Ndise ke page 228]

Ntak emi Jesus ekesiwakde ndidu ye ubon emi ke ini akade Jerusalem? Nte afo ọmọfiọk enyịn̄ mmọ?

[Ndise ke page 229]

Ntak emi Zacchaeus ọdọkde eto emi?

[Ndise ke page 230]

Ntak emi Jesus akade ekese Zacchaeus, ndien nso ke Zacchaeus ọn̄wọn̄ọ ndinam?