Ibuot 37

Nditi Jehovah Ye Eyen Esie

YAK idọhọ ke owo ọnọ fi san̄asan̄a enọ. Ekpetie fi didie ke idem?— Nte afo ọkpọdọhọ sọsọn̄ọ ndien ekem efre ofụri ofụri aban̄a owo emi ọkọnọde fi enọ oro? Mîdịghe nte afo ekpesiti enye ye se enye akanamde ọnọ fi?—

Jehovah Abasi ama ọnọ nnyịn utịbe enọ. Enye ama ọnọ Eyen esie edi isọn̄ man edikpa ọnọ nnyịn. Nte afo ọmọfiọk ntak emi Jesus ekenyenede ndikpa nnọ nnyịn?— Emi edi ata akpan n̄kpọ oro akpanade nnyịn ifiọk.

Nte nnyịn ikekpepde ke Ibuot 23, Adam ama anam idiọkn̄kpọ ke ini enye akabiatde mfọnmma ibet Abasi. Ndien nnyịn ima ida idiọkn̄kpọ ito Adam, kpa ete kpukpru nnyịn. Ntre, afo ekere ke nso ke nnyịn iyom?— Nnyịn iyom obufa ete, yak idọhọ ntre, kpa enye emi okodude mfọnmma uwem ke isọn̄. Afo ekere ke anie ekeme ndidi utọ ete oro nnọ nnyịn?— Jesus.

Jehovah ọkọnọ Jesus edi isọn̄ man enye akabade etie nte ete nnyịn ke itie Adam. Bible ọdọhọ ete: “Adam, akpa owo, akabade edi ukpọn̄ emi odude uwem; akpatre Adam edi spirit emi ọnọde uwem.” Anie ekedi akpa Adam?— Edi owo emi Abasi akadade ntanisọn̄ obot. Anie edi udiana-akpa Adam?— Jesus. Bible owụt emi ke ini ọdọhọde ete: ‘Akpa owo [Adam] okoto isọn̄, eke ntanisọn̄; udiana-akpa owo [Jesus] oto ke heaven.’—1 Corinth 15:45, 47; Genesis 2:7.

Sia Abasi akadade uwem Jesus ke heaven edisịn ke idịbi Mary, Jesus ikadaha idiọkn̄kpọ ndomokiet ito Adam. Ntak edi oro Jesus ekedide mfọnmma owo. (Luke 1:30-35) Ntak n̄ko edi oro angel ọkọdọhọde mme ekpemerọn̄ ke ini Jesus akamanade ete: ‘Andinyan̄a  amana ọnọ mbufo mfịn.’ (Luke 2:11) Edi man edi Andinyan̄a nnyịn, nso ke okoyom Jesus oro ekedide nsek ebem iso anam?— Ama oyom enye ọkọri edi akwa owo, ukem nte Adam. Do Jesus ama ekeme ndikabade ndi ‘udiana-akpa Adam.’

Jesus, kpa Andinyan̄a nnyịn, ayakabade n̄ko edi “Nsinsi Ete” nnyịn. Nte ẹkotde enye edi oro ke Bible. (Isaiah 9:6, 7) Ih, mfọnmma owo oro Jesus ekeme ndidi ete nnyịn ke itie Adam, emi akakabarede edi anana-mfọnmma ke ini enye akanamde idiọkn̄kpọ. Ke usụn̄ emi nnyịn imekeme ndimek ndinyene ‘udiana-akpa Adam’ nte ete nnyịn. Nte ededi, Jesus ke idemesie edi Eyen Jehovah Abasi.

Ebede ke ndikpep n̄kpọ mban̄a Jesus, nnyịn imekeme ndinyịme enye nte Andinyan̄a nnyịn. Nte afo emeti se oyomde ẹnyan̄a nnyịn ẹsio?— Ih, oyom ẹnyan̄a nnyịn ẹsio ke idiọkn̄kpọ ye n̄kpa oro nnyịn ikadade ito Adam. Ẹkot mfọnmma uwem oro Jesus akawade m̀mê akayakde ọnọ kaban̄a nnyịn ufak. Jehovah ọkọnọ ufak oro man ẹkeme ndimen mme idiọkn̄kpọ nnyịn mfep.—Matthew 20:28; Rome 5:8; 6:23.

Ke akpanikọ, nnyịn iyomke ndifre se Abasi ye Eyen esie ẹkenamde ẹnọ nnyịn, ndi imoyom?— Jesus ama owụt mme anditiene enye akpan usụn̄ kiet oro ekemede ndin̄wam nnyịn nditi se enye akanamde. Yak ineme iban̄a emi.

 Da nte ke afo odu ke ufọkenyọn̄ ke Jerusalem. Okoneyo edi emi. Jesus ye mme apostle esie ẹtie ke okpokoro. Ọfọp unam erọn̄, mbatmbat eboho uyo, ye ndatndat wine ẹdoro ke okpokoro oro. Mmọ ẹdia akpan udia. Nte afo ọmọfiọk ntak?—

Udia emi edi nditi mmọ mban̄a se Jehovah akanamde ke ediwak isua ikie oro ẹkebede ke ini ikọt esie, Israel, ẹkedide ifịn ke Egypt. Ke ini oro Jehovah ama ọdọhọ ikọt esie ete: ‘Ẹwot eyenerọn̄ ke ufọk kiet kiet ẹnyụn̄ ẹda iyịp esie ẹyet ke obubọk usụn̄ ufọk mbufo.’ Ekem enye ama ọdọhọ ete: ‘Ẹdụk ke ufọk mbufo ẹnyụn̄ ẹta erọn̄ oro.’

 Nditọ Israel ẹma ẹnam oro. Ndien kpa ke okoneyo oro, angel Abasi ama asan̄a ebe ke isọn̄ Egypt. Angel oro ama owot akpan ke ata ediwak ufọk. Edi ke ini angel oro okokụtde iyịp eyenerọn̄ ke obubọk usụn̄, enye ama ebe ọkpọn̄ ufọk oro. Eyenọwọn̄ ndomokiet ikakpaha ke mme ufọk oro. Pharaoh, kpa edidem Egypt ama okop ndịk aban̄a se angel Jehovah akanamde. Ntre Pharaoh ama ọdọhọ nditọ Israel ete: ‘Ẹsana mbufo ẹyak. Ẹwọn̄ọ ke Egypt!’ Ke oro, mmọ ẹtan̄ mbiomo mmọ ẹdori ke mme camel ye enan̄-mbiomo mmọ ẹnyụn̄ ẹnyọn̄ọ.

Jehovah ikoyomke ikọt esie ẹfre nte enye akanamde mmọ ẹbọhọ. Ntre enye ama ọdọhọ ete: ‘Ini kiet ke isua, mbufo ẹnyene ndidia ukem udia emi mbufo ẹdiade okoneyo emi.’ Mmọ ẹkekot akpan udia emi Passover. Nte afo ọmọfiọk ntak?— Koro ke okoneyo oro angel Abasi ama ‘ebe’ ọkpọn̄ mme ufọk oro ẹkedade iyịp ẹnịm idiọn̄ọ.—Exodus 12:1-13, 24-27, 31.

Jesus ye mme apostle esie ke ẹkere ẹban̄a emi ke ini mmọ ẹdiade Passover oro. Ke oro ebede, Jesus anam ata akpan n̄kpọ kiet. Nte ededi, mbemiso enye anamde oro, ẹma ẹnam Judas, kpa apostle oro mîkanamke akpanikọ, ọwọrọ. Ekem Jesus emen kiet ke otu nyọhọ nsụhọ eboho uyo oro, ọbọn̄ akam, obụn̄ enye, onyụn̄ ayak ọnọ mme mbet esie. Enye ọdọhọ ete: “Ẹbọ, ẹta.” Ekem enye ọdọhọ mmọ ete: ‘Uyo emi ada aban̄a ikpọkidem Mi oro ndinọde ke ini n̄kpade kaban̄a mbufo.’

Ekem Jesus emen cup ndatndat wine. Ke ama ọkọbọn̄ akam efen ndinọ ekọm, enye ayak ọnọ mmọ onyụn̄ ọdọhọ ete: “Mbufo kpukpru ẹda ẹn̄wọn̄.” Ndien enye ọdọhọ mmọ ete: ‘Wine emi ada aban̄a iyịp Mi. Ibịghike mmọn̄ nduọk iyịp Mi man mbufo ẹbọhọ mme idiọkn̄kpọ mbufo. Ẹka iso ẹnam emi nditi Mi.’—Matthew 26:26-28; 1 Corinth 11:23-26.

 Ndi afo ama etịm ọfiọk ete ke Jesus ọkọdọhọ ke mme mbet ẹkpenyene ndinam emi nditi imọ?— Mmọ ididiaha aba Passover. Utu ke oro, mmọ ẹdidia akpan udia emi ini kiet ke isua man ẹti Jesus ye n̄kpa esie. Ẹkot udia emi Udia Mbubịteyo Ọbọn̄. Mfịn nnyịn isiwak ndikot enye Editi. Ntak-a?— Koro enye anam nnyịn iti se Jesus ye Ete esie, Jehovah Abasi, ẹkenamde ẹnọ nnyịn.

Uyo oro ekpenyene ndinam nnyịn ikere iban̄a ikpọkidem Jesus. Enye ama enyịme ndinọ ikpọkidem oro man nnyịn ikeme ndinyene nsinsi uwem. Ndien nso kaban̄a ndatndat wine oro?— Enye ekpenyene nditi nnyịn nte iyịp Jesus ọsọn̄de urua. Enye enen̄ede ọsọn̄ urua akan iyịp eyenerọn̄ Passover oro ke Egypt. Nte afo ọmọfiọk ntak?— Bible ọdọhọ ke iyịp Jesus ekeme ndinam ẹfen mme idiọkn̄kpọ nnyịn. Ndien ke ini ẹmende kpukpru idiọkn̄kpọ nnyịn ẹfep, nnyịn ididọn̄ọke, idisọn̄ke, idinyụn̄ ikpaha aba. Nnyịn ikpenyene ndikere mban̄a oro ke ini idụkde Editi.

Ndi kpukpru owo ẹkpeta uyo ẹnyụn̄ ẹn̄wọn̄ wine oro ke Editi?— Ọfọn, Jesus ama ọdọhọ mbon oro ẹkediade ẹnyụn̄ ẹn̄wọn̄de ete: ‘Mbufo ẹyenyene udeme ke Obio Ubọn̄ Mi ẹnyụn̄ ẹtie ke ebekpo ke heaven ye Ami.’ (Luke 22:19, 20, 30) Emi ọkọwọrọ ke mmọ ẹyeka heaven man ẹkedi ndidem ye Jesus. Ntre mbon oro ẹnyenede idotenyịn ndikara ye Jesus ke heaven kpọt ẹkpeta uyo ẹnyụn̄ ẹn̄wọn̄ wine oro.

Edi idem mbon oro mîtaha uyo mînyụn̄ in̄wọn̄ke wine oro ẹkpenyene ndidụk Editi. Nte afo ọmọfiọk ntak?— Koro Jesus ọkọnọ uwem esie kaban̄a nnyịn n̄ko. Ke ndidụk Editi, nnyịn iwụt ke nnyịn ifreke. Nnyịn iti utịbe enọ Abasi.

Mme itie N̄wed Abasi oro ẹwụtde nte ufak Jesus edide akpan n̄kpọ ẹsịne 1 Corinth 5:7; Ephesus 1:7; 1 Timothy 2:5, 6; ye 1 Peter 1:18, 19.

[Ndise ke page 193]

Didie ke Adam ye Jesus ẹkebiet kiet eken, ndien ntak ekedide akpan n̄kpọ nte mmọ ẹbiet kiet eken?

[Ndise ke page 194]

Didie ke iyịp eyenerọn̄ ekekpeme nditọ Israel?

[Ndise ke page 194]

Nso ke iyịp Jesus, emi Jesus ekemende odomo ye wine, ekeme ndinam nnọ nnyịn?