Ibuot 16

Nso Inen̄ede Idi Akpan N̄kpọ?

AMA odu owo emi ekedide ebịne Jesus usen kiet. Enye ama ọfiọk ete ke Jesus ọfiọk n̄kpọ etieti, ntre enye ama ọdọhọ Jesus ete: ‘Andikpep, dọhọ eyeneka mi ọnọ mi ndusụk inyene.’ Owo oro ekekere ke akpana imọ inyene ndusụk ke otu inyene oro.

Edieke afo ekpekedide Jesus, nso ke afo ekpeketịn̄?— Jesus ama okụt ete ke owo emi ama enyene mfịna. Edi mfịna ikedịghe nte ke enye okoyom se eyeneka esie ekenyenede. Mfịna owo emi ekedi nte ke enye ikọfiọkke se ikenen̄erede idi akpan n̄kpọ ke uwem.

Ẹyak nnyịn ikere iban̄a emi. Nso ikpedi ata akpan n̄kpọ inọ nnyịn? Nte enye ekpedi ndinyene ndiye n̄kpọmbre, mbufa ọfọn̄, m̀mê mme n̄kpọ ntre?— Baba, odu n̄kpọ emi edide akpan n̄kpọ akan. Ndien emi edi ukpepn̄kpọ oro Jesus okoyomde ndikpep. Ntre enye ama ọnọ mbụk kiet aban̄a owo oro ekefrede Abasi. Nte afo akpama ndikop mbụk emi?—

Owo emi ama enyene inyene etieti. Enye ama enyene isọn̄ ye mme ufọkudia. Mme n̄kpọ oro enye ọkọtọde ẹma ẹkọri etieti. Enye ikenyeneke itie ke mme ufọkudia esie ndibon kpukpru mfri emi. Ntre, nso ke enye edinam? Ọfọn, enye ama ekere ete: ‘Ami Nyowụri mme ufọkudia mi nnyụn̄ mbọp se ikponde ikan. Ndien nyọdọn̄ kpukpru mfri ye kpukpru inyene mi ke mbufa ufọkudia emi.’

Owo inyene emi ekekere ete ke emi ama esịne ifiọk. Enye ekekere ete ke imọ ima ifiọk n̄kpọ etieti ke ndikọ uwak n̄kpọ mbon. Enye ama ọdọhọ  idemesie ete: ‘Ami mmobon ediwak nti n̄kpọ. Mmọ ẹyekem mi ke ediwak isua. Ntre idahaemi mmekeme ndiduọk odudu. Ami nyadia, n̄n̄wọn̄, nnyụn̄ nnem idem mi esịt.’ Edi ekikere owo inyene emi ama akwan̄a. Nte afo ọmọfiọk se ikakwan̄ade?— Enye ekekere aban̄a idemesie ye inemesịt esie kpọt. Enye ama efre Abasi.

Ntre Abasi ama etịn̄ ikọ ye owo inyene emi. Enye ọkọdọhọ ete: ‘Afo ndisịme owo. Afo ọmọn̄ akpa okoneyo emi. Idahaemi anie edinyene mme n̄kpọ oro afo ọkọkọde obon?’ Nte owo inyene oro ekeme ndida mme n̄kpọ oro nnam n̄kpọ ke enye ama akakpa?— Ihih, owo efen edinyene mme n̄kpọ oro. Jesus ọkọdọhọ ete: “Ntem ke etie ye owo eke ọkọde inyene ọnọ idem esie edi mînyeneke inyene ke n̄kan̄ Abasi.”—Luke 12:13-21.

Nte afo omoyom nditie nte owo inyene oro?— Akpan uduak esie ke uwem ekedi ndinyene mme n̄kpọ obụkidem. Oro ekedi ndudue. Enye okoyom ediwak n̄kpọ kpukpru ini. Edi enye ikenyeneke “inyene ke n̄kan̄ Abasi.”

 Ediwak owo ẹtie nte owo inyene oro. Kpukpru ini mmọ ẹyom ndinyene ediwak n̄kpọ. Edi emi ekeme ndida n̄kesịm ikpọ mfịna. Ke uwụtn̄kpọ, afo emenyene mme n̄kpọmbre, nte unyeneke?— Siak ndusụk n̄kpọmbre oro afo enyenede nọ mi.— Nso edieke kiet ke otu mme ufan fo enyenede bọl m̀mê eyen ọkpọ m̀mê ndusụk n̄kpọmbre efen oro afo mûnyeneke? Nte ọkpọfọn afo ndidomo ndifịna ete ye eka fo man ẹdep ukem oro ẹnọ fi?—

N̄kpọmbre ekeme nditie nte ata akpan n̄kpọ. Edi nso isitịbe inọ enye ke esisịt ini ebede?— Enye esikabade akani. Enye ekeme ndibiara, ndien ekem afo ukam uyomke enye aba. Ke akpanikọ, afo emenyene n̄kpọ oro ọsọn̄de urua akan mme n̄kpọmbre. Nte afo ọmọfiọk se enye edide?—

Enye edi uwem fo. Uwem fo edi ata akpan n̄kpọ koro ke uwem mîdụhe, afo ukemeke ndinam n̄kpọ ndomokiet. Edi uwem fo ọkọn̄ọ ke ndinam se inemde Abasi esịt, nte idịghe ntre?— Ntre yak nnyịn ikûtie nte ndisịme owo inyene oro ekefrede Abasi.

Nditọwọn̄ idịghe n̄kukụre mbon oro ẹkemede ndinam ndisịme n̄kpọ  nte owo inyene oro. Ekese ikpọ owo ẹsinam n̄ko. Ndusụk mmọ ẹsiwak ndiyom se iwakde ikan se mmọ ẹnyenede. Mmọ ẹkeme ndinyene udia oro ekemde ke usen, ọfọn̄, ye ufọkidụn̄. Edi mmọ ẹyom se ikande oro. Mmọ ẹyom ediwak ọfọn̄. Ẹnyụn̄ ẹyom ikpọ ufọk. Mme n̄kpọ emi ẹkpa ediwak okụk. Ntre mmọ ẹnam utom ọkpọsọn̄ man ẹnyene ediwak okụk. Ndien nte mmọ ẹnyenede okụk awak, kpa ntre ke mmọ ẹyom ndinyene awak akan.

Ndusụk ikpọ owo ẹnen̄ede ẹsịn ifịk ndinyene okụk tutu mmọ inyeneke ini ndidu ye ubon mmọ. Ndien mmọ inyeneke ini inọ Abasi. Nte okụk mmọ ekeme ndinịm mmọ uwem?— Baba, ikemeke. Nte mmọ ẹkeme ndida okụk mmọ nnam n̄kpọ ke mmọ ẹma ẹkekpan̄a?— Ihih. Emi edi koro mme akpan̄kpa ikemeke ndinam baba n̄kpọ kiet.—Ecclesiastes 9:5, 10.

Nte emi ọwọrọ ete ke ifọnke ndinyene okụk?— Baba. Nnyịn imekeme ndida okụk ndep udia ye ọfọn̄. Bible ọdọhọ ete ke enye ọnọ ukpeme. (Ecclesiastes 7:12) Edi edieke nnyịn imade okụk, do nnyịn iyenyene mfịna. Nnyịn iditie nte ndisịme owo inyene oro ọkọkọde inyene obon ọnọ idemesie edi mînyeneke inyene ke n̄kan̄ Abasi.

Ndinyene inyene ke n̄kan̄ Abasi ọwọrọ nso?— Enye ọwọrọ ndinịm Abasi akpa ke uwem nnyịn. Ndusụk owo ẹdọhọ ke mmimọ imenịm Abasi ke akpanikọ. Mmọ ẹkere ke ukụre se ẹyomde edi ndinịm ke akpanikọ. Edi nte mmọ ẹnen̄ede ẹnyene inyene ke n̄kan̄ Abasi?— Ihih, mmọ ẹtie nte owo inyene emi ekefrede Abasi.

Jesus akananam ifreke Ete esie eke heaven. Enye ikodomoke ndinyene ediwak okụk. Ndien enye ikenyeneke ediwak n̄kpọ obụkidem. Jesus ama ọfiọk se ikedide ata akpan n̄kpọ ke uwem. Nte afo ọmọfiọk se oro edide?— Enye edi ndinyene inyene ke n̄kan̄ Abasi.

Tịn̄ nọ mi ise, didie ke nnyịn ikeme ndinyene inyene ke n̄kan̄ Abasi?— Nnyịn ikeme ndinyene inyene ke n̄kan̄ Abasi ebe ke ndinam se inemde enye esịt. Jesus ọkọdọhọ ete: ‘Ami nnanam se inemde Enye esịt  kpukpru ini.’ (John 8:29) Abasi esinem esịt ke ini nnyịn inamde mme n̄kpọ oro enye oyomde nnyịn inam. Idahaemi tịn̄ nọ mi, mme n̄kpọ ewe ke afo ekeme ndinam man enem Abasi esịt?— Afo emekeme ndikot Bible, aka mme mbono esop Christian, ọbọn̄ akam ọnọ Abasi, onyụn̄ an̄wam mbon efen ndikpep n̄kpọ mban̄a enye. Mmọ emi ẹdi mme n̄kpọ oro ẹdide akpan n̄kpọ ẹkan ke uwem.

Sia Jesus ekenyenede inyene ke n̄kan̄ Abasi, Jehovah ama ese aban̄a enye. Enye ama ọnọ Jesus utịp ndidu uwem ke nsinsi. Edieke nnyịn itiede nte Jesus, Jehovah ayama nnyịn onyụn̄ ese aban̄a nnyịn n̄ko. Ntre nnyịn ikpakam itie nte Jesus inyụn̄ idehede itie nte owo inyene emi ekefrede Abasi.

Ndusụk itie Bible emi ẹwụtde nte ẹkemede ndise mme n̄kpọ obụkidem ke nnennen usụn̄ ẹdi emi: Mme N̄ke 23:4; 28:20; 1 Timothy 6:6-10; ye Mme Hebrew 13:5.

[Ndise ke page 87]

Nso mfịna ke owo emi ekenyene?

[Ndise ke page 88]

Nso ke owo inyene emi ekere?

[Ndise ke page 89]

Nso ke afo enyene emi ọfọnde akan mme n̄kpọmbre?

[Mme ndise ke page 91]

Nso ke eyen emi anam emi enen̄erede edi akpan n̄kpọ?