Ibuot 21

Nte Nnyịn Ikpenyene Ndinam Inua Mban̄a N̄kpọ Ekededi?

NSO ke ndinam inua ọwọrọ? Nte afo ọmọfiọk?— Emi edi uwụtn̄kpọ kiet. Nte akanam afo omodomo ndinam n̄kpọ oro afo mûtịmke ufiọk? Eyedi afo ama odomo nditịgha bọl. Mîdịghe anaedi afo ama odomo ndiwat enan̄ukwak. Nte akanam owo ekededi asak fi onyụn̄ ọdọhọ ete, “Ha! Ha! Ha! Mmekeme ndinam ọfọn akan nte afo anamde”?— Ọfọn, owo oro akanam inua.

Esitie fi didie ke idem ke ini mbon en̄wen ẹnamde inua? Nte afo emesima?— Ndien afo ekere ke editie mbon en̄wen didie ke idem edieke afo anamde inua aban̄a idemfo?— Nte ọfọn ndidọhọ owo nte, “Ami mmọfọn n̄kan fi?”— Nte Jehovah esima mme owo oro ẹtịn̄de utọ ikọ oro?—

Akwa Andikpep ama ọfiọk mme owo oro ẹkekerede ke mmimọ imọfọn ikan mbon en̄wen. Mmọ ẹma ẹnam inua m̀mê ẹbụre mbụre ẹban̄a idemmọ ẹnyụn̄ ẹse kpukpru mbon eken ke usụhọde. Ntre usen kiet Jesus ama obụk mbụk kiet ọnọ mmọ man owụt mmọ nte ọdiọkde ndinam inua mban̄a idemmọ. Yak ikpan̄ utọn̄ inọ mbụk oro.

Mbụk oro aban̄a owo Pharisee ye ọbọ a-tax. Idahaemi, mme Pharisee ẹkedi mme andikpep ido ukpono, oro ẹkenamde nte n̄kpọ eke mmọ ẹkenen̄erede ẹfọn m̀mê ẹsana ẹkan mbon en̄wen. Owo Pharisee oro ke mbụk Jesus ama aka temple Abasi ke Jerusalem ndibọn̄ akam.

Jesus ama ọdọhọ ete ke ọbọ a-tax n̄ko ama aka temple oro ndibọn̄ akam. Ediwak owo ikamaha mme ọbọ a-tax. Mmọ ẹkekere ẹte ke mme ọbọ a-tax ẹkedomo nditụk mmimọ. Ndien edi akpanikọ nte ke ediwak mme ọbọ a-tax ikesinamke akpanikọ kpukpru ini.

 Ke temple, owo Pharisee oro ama ọtọn̄ọ ndibọn̄ akam nnọ Abasi ntem ete: ‘O Abasi, mmọkọm fi sia mmendịghe anamidiọk nte mbon eken. Ntụkke mme owo m̀mê ndinam ndiọi n̄kpọ eken. Ntiehe nte ọbọ a-tax oko. Ami ndi eti owo. Ntetre udia utịm ikaba ke urua man nnyene ekese ini ndikere mban̄a fi. Mmonyụn̄ nsisio ubak kiet ke itie duop ke kpukpru se nnyenede nnọ ke temple.’ Owo Pharisee oro ama enen̄ede ekere ke imọ ima ifọn ikan mbon en̄wen, nte enye ikekereke?— Ndien enye ama etịn̄ ọnọ Abasi aban̄a oro n̄ko.

Edi ọbọ a-tax iketiehe ntre. Enye ikakam imenekede enyịn esie ise heaven ke ini enye ọkọbọn̄de akam. Enye ama ada nsannsan onụk ibuot esie. Ọbọ a-tax oro ama enen̄ede atua n̄kpọfiọk aban̄a mme idiọkn̄kpọ esie, ndien enye ama amia esịt esie ke mfụhọ. Enye ikodomoke nditịn̄ nnọ Abasi adan̄a nte imọ ifọnde. Utu ke oro, enye ama ọbọn̄ akam ete: ‘O Abasi, tua mi idiọk owo mbọm.’

Afo ekere ke anie ke otu owo iba emi ekenem Abasi esịt? Nte ekedi owo Pharisee, emi ekekerede ke imọ imenen̄ede ifọn? Mîdịghe nte ekedi ọbọ a-tax emi akatuade n̄kpọfiọk aban̄a mme idiọkn̄kpọ esie?—

Jesus ọkọdọhọ ete ke ọbọ a-tax ama enem Abasi esịt. Ntak-a? Jesus ama anam an̄wan̄a ete: ‘Koro ẹyesụhọde owo ekededi emi odomode ndinam nte ke imọ imọfọn ikan mbon en̄wen. Edi ẹyemenede owo eke osụhọrede idem.’—Luke 18:9-14.

Nso ke Jesus ekekpep ke mbụk esie?— Enye ekekpep ete ke akwan̄a ndikere nte  ke nnyịn imọfọn ikan mbon en̄wen. Nnyịn imekeme ndidọhọ nte ke nnyịn ikereke ke imọfọn ikan mbon en̄wen, edi ebede ke usụn̄ oro nnyịn inamde n̄kpọ, nnyịn imekeme ndiwụt nte ke nnyịn imekere ntre. Nte akanam afo amanam n̄kpọ ntre?— Kere ban̄a apostle Peter.

Ke ini Jesus ọkọdọhọde mme apostle esie ete ke kpukpru mmọ ẹyekpọn̄ imọ ke ini ẹmụmde imọ, Peter ama anam inua ete: ‘Idem ọkpọkọm kpukpru owo ẹkpọkpọn̄ fi, ami ndikpọn̄ke fi tutu amama!’ Edi Peter ikenenke. Enye ama ọbuọt idem ke idemesie akaha. Enye ama ọkpọn̄ Jesus. Nte ededi, enye ama akabade esịt, nte nnyịn idikpepde ke Ibuot 30 ke n̄wed emi.—Matthew 26:31-33.

Yak ikere iban̄a uwụtn̄kpọ eyomfịn. Ekeme ndidi ẹbụp fi ye nsan̄a ufọkn̄wed fo ndusụk mbụme ke ufọkn̄wed. Nso edieke afo ekemede ndinọ mme ibọrọ usọp usọp, edi nsan̄a ufọkn̄wed fo ikemeke? Ke akpanikọ, esịt esinem fi ke ini afo ọfiọkde mme ibọrọ. Edi nte ọkpọfọn ndimen idemfo ndomo ye owo oro mîsọpke inọ ibọrọ?— Nte ọfọn ndidomo ndinam nte ke imọfọn ikan ebe ke ndisụhọde owo enye eken itie?—

Oro edi se owo Pharisee oro akanamde. Enye ama anam inua ete ke imọ imọfọn ikan ọbọ a-tax oro. Edi Akwa Andikpep ọkọdọhọ ete ke owo Pharisee oro ikenenke. Edi akpanikọ nte ke owo kiet ekeme ndinam ndusụk n̄kpọ ọfọn akan owo efen. Edi oro inamke enye enen̄ede ọfọn akan.

Ntre edieke nnyịn ifiọkde n̄kpọ ikan owo en̄wen, nte oro edi eti ntak ndinam inua?— Kere ban̄a emi. Nte nnyịn ikobot mfre nnyịn?— Baba, Abasi ọkọnọ nnyịn owo kiet kiet mfre. Ndien nnyịn ikekpep ekese n̄kpọ oro nnyịn idiọn̄ọde ito owo en̄wen. Ekeme ndidi nnyịn ikokot mme n̄kpọ oro ke n̄wed. Mîdịghe ekeme ndidi owo eketịn̄ ọnọ nnyịn aban̄a mmọ. Idem ọkpọkọm nnyịn inam n̄kpọ oro ke idem nnyịn, nnyịn ikasan̄a didie inam enye?— Ih, ikada mfre oro Abasi ọkọnọde nnyịn inam.

 Ke ini owo esịnde ọkpọsọn̄ ukeme ndinam n̄kpọ, ọfọn afo nditịn̄ ikọ oro edinamde enye enem esịt. Dọhọ enye ete ke imọ imama se enye anamde. Eyedi afo amakam ekeme ndin̄wam enye anam ọfọn akan oro. Nte oro idịghe se afo akpamade mme owo ẹnam ẹnọ fi?—

Ndusụk owo ẹnyene odudu ẹkan mbon en̄wen. Nso edieke afo enyenede odudu akan eyeneka fo? Nte oro ọnọ fi ntak ekededi ndinam inua?— Baba, inọhọ. Edi udia oro nnyịn idiade anam nnyịn inyene odudu. Ndien Abasi ọnọ un̄wana utịn ye edịm ye kpukpru n̄kpọ eken oro ẹyomde man udia ọkọri, nte idịghe enye ọnọ?— Ntre, ndien, nnyịn ikpenyene ndikọm Abasi edieke nnyịn inyenede odudu.—Utom 14:16, 17.

Owo nnyịn ndomokiet isimaha ndikop nte owo anamde inua aban̄a idemesie, nte imesima?— Yak iti mme ikọ Jesus emi: ‘Kpa nte afo oyomde mbon efen ẹnam ye afo, nam kpa ntre ye mmọ.’ Edieke nnyịn inamde oro, nnyịn tutu amama iditiehe nte owo Pharisee oro akanamde inua aban̄a idemesie ke mbụk oro Akwa Andikpep okobụkde.—Luke 6:31.

 Ini kiet owo ama okot Jesus eti. Nte Akwa Andikpep ama enyịme ete, ‘Ih, ndi eti’?— Baba, enye ikenyịmeke. Utu ke oro, enye ọkọdọhọ ete: “Enye emi edide eti idụhe, ke mîbọhọke Kiet, kpa Abasi.” (Mark 10:18) Idem okposụkedi Akwa Andikpep ekedide mfọnmma owo, enye ikanamke inua iban̄a idemesie. Utu ke oro, enye ọkọnọ Ete esie, kpa Jehovah, ofụri itoro.

Ntre, nte owo ndomokiet odu emi nnyịn ikemede ndinam inua mban̄a?— Ih, odu. Nnyịn imekeme ndinam inua mban̄a Andibot nnyịn, Jehovah Abasi. Ke ini nnyịn ikụtde ediye utịn asiahade m̀mê mme utịbe utịbe edibotn̄kpọ eken, nnyịn imekeme ndidọhọ owo ite, ‘Utịbe Abasi nnyịn, kpa Jehovah, anam emi!’ Yak nnyịn kpukpru ini iben̄e idem nditịn̄ mban̄a ikpọ n̄kpọ oro Jehovah ama akananam edinyụn̄ anamde ke ini iso.

Kot se N̄wed Abasi etịn̄de aban̄a edinam inua, nyụn̄ kpep nte nnyịn ikpefepde ndinam inua mban̄a idem nnyịn: Mme N̄ke 16:5, 18; Jeremiah 9:23, 24; 1 Corinth 4:7; ye 1Co 13:4.

[Ndise ke page 113]

Ntak emi Abasi ekenemde esịt ye ọbọ a-tax edi mînemke ye owo Pharisee?

[Ndise ke page 115]

Nte ndifiọk n̄kpọ n̄kan owo en̄wen ekeme ndinam fi ọfọn akan?

[Ndise ke page 115]

Ntak mîfọnke ndinam inua edieke nnyịn inyenede odudu ikan owo efen?

[Ndise ke page 116]

Nso ke eyeneren emi anam inua aban̄a?