Ibuot 17

Usụn̄ Ndikop Inemesịt

KPUKPRU nnyịn imama ndikop inemesịt, nte nnyịn imaha?— Edi ediwak owo inen̄ekede ikop inemesịt. Nte afo ọmọfiọk se idide ntak?— Koro mmọ ifiọkke se ikemede ndinam owo okop inemesịt. Mmọ ẹkere ke ndinyene ediwak n̄kpọ obụkidem edi usụn̄ ndikop inemesịt. Edi ke ini mmọ ẹnyenede mme n̄kpọ emi, inemesịt mmọ isibịghike.

Odu akpan n̄kpọ oro anamde owo okop inemesịt. Akwa Andikpep ọkọdọhọ ete: “Inemesịt okpon ke ndinọnọ akan ke ndibọbọ.” (Utom 20:35, NW) Ntre, nso idi usụn̄ ndikop inemesịt?— Ke akpanikọ, edi ndinọ mbon efen n̄kpọ nnyụn̄ nnam n̄kpọ nnọ mmọ. Nte afo ama ọfiọk oro?—

Ẹyak itịm ikere iban̄a emi. Nte Jesus ọkọdọhọ ete ke owo emi ọbọde enọ idikopke inemesịt?— Baba, enye iketịn̄ke oro. Nte afo usumaha ndibọ mme enọ?— Kpukpru owo ẹsima. Nnyịn imesikop inemesịt ke ini nnyịn ibọde ndiye n̄kpọ.

 Edi Jesus ọkọdọhọ ete ke inemesịt akam okpon akan ke ini nnyịn inọde-nọ. Ntre afo ọkpọdọhọ ke anie ọnọ mme owo ediwak n̄kpọ akan owo efen ekededi?— Edi Jehovah Abasi.

Bible ọdọhọ ete ke Abasi “ọnọ kpukpru owo uwem, ye ibifịk, ye kpukpru n̄kpọ.” Enye ọnọ nnyịn edịm heaven ye eyo n̄ko, man mme eto ẹkọri, nnyịn inyụn̄ inyene udia. (Utom 14:17; 17:25) Eyịghe idụhe Bible okotde Jehovah “Abasi inemesịt”! (1 Timothy 1:11, NW) Ndinọ mbon efen n̄kpọ edi kiet ke otu n̄kpọ oro anamde Abasi okop inemesịt. Ndien ke ini nnyịn inọde owo n̄kpọ, enye ekeme ndinam nnyịn ikop inemesịt n̄ko.

Idahaemi, nso ke nnyịn ikeme ndinọ mbon efen?— Ndusụk ini ẹsida uwak okụk ẹdep enọ. Edieke enye edide enọ oro afo edepde ke ufọkurua, ana afo ekpe okụk. Ntre edieke afo oyomde ndinọ owo utọ enọ oro, ekeme ndiyom afo enịm okụk tutu afo enyene okụk oro ekemde ndida ndep enọ oro.

Edi idịghe kpukpru enọ ke ana ededep ke ufọkurua. Ke uwụtn̄kpọ, ke usen emi eyo ofiopde, ndinọ owo akrasi mbịtmbịt mmọn̄ ọn̄wọn̄ esinen̄ede anam owo afiak okop inem idem. Ntre ke ini afo okoide mmọn̄ ọnọ owo emi itọn̄ asatde, afo emekeme ndinyene inemesịt emi otode edinọ enọ.

Usen kiet afo ye eka fo ẹmekeme nditem maimai. Oro ekpedi n̄kpọ inemesịt. Edi nso ke afo ekeme ndinam ye ndusụk maimai oro, emi akpanamde fi akam okop inemesịt akan ndidia kpukpru mmọ ikpọn̄?— Kamse, afo emekeme ndinọ kiet ke otu mme ufan fo ndusụk mmọ. Nte afo akpama ndinam oro ndusụk ini?—

Akwa Andikpep ye mme apostle esie ẹma ẹfiọk inemesịt emi odude  ke ndinọnọ. Nte afo ọmọfiọk se mmọ ẹkenọde mbon efen?— Enye ekedi mfọnn̄kan n̄kpọ ke ererimbot! Mmọ ẹma ẹfiọk akpanikọ aban̄ade Abasi, ndien mmọ ke idatesịt ẹma ẹbuana eti mbụk emi ye mbon en̄wen. Mmọ ẹma ẹnam emi ye unana ediyak owo ekededi ekpe mmọ okụk kaban̄a se mmọ ẹkenọde.

Usen kiet apostle Paul ye eti ufan esie Luke emi ekedide mbet ẹma ẹsobo n̄wan emi n̄ko okoyomde ndinyene inemesịt emi otode ke edinọnọ. Mmọ ẹkesobo ye enye ke mben akpa. Paul ye Luke ẹkeka do koro mmọ ẹma ẹkop ẹte ke enye edi itie akam. Ndien ke ata akpanikọ, ke ini mmọ ẹkekade ẹkesịm, mmọ ẹma ẹkụt nte ndusụk iban ẹbọn̄de akam.

Paul ama ọtọn̄ọ ndibụk eti mbụk aban̄ade Jehovah Abasi ye Obio Ubọn̄ esie nnọ iban emi. Kiet ke otu mmọ ekekere Lydia, ndien enye ama enen̄ede akpan̄ utọn̄. Ke oro ebede, Lydia ama oyom ndinam n̄kpọ man owụt ke imọ ima inen̄ede ima eti mbụk oro imọ ikokopde. Ntre enye ama eben̄e Paul ye Luke ete: ‘Edieke mbufo ẹbatde ẹte ndi owo akpanikọ nnọ Jehovah, ẹdi ke ufọk mi ẹditie do.’ Ndien enye ada mmọ aka ufọk esie.—Utom 16:13-15.

Lydia ama enem esịt mme asan̄autom Abasi emi ndidi ufọk esie. Enye ama ama mmọ koro mmọ ẹma ẹn̄wam enye ndikpep n̄kpọ mban̄a Jehovah ye Jesus ye nte mme owo ẹkemede ndidu uwem ke nsinsi. Ama enem enye esịt ndikeme ndinọ Paul ye Luke udia ẹdia ye itie ndiduọk odudu. Ntre Lydia ama okop inemesịt ke se enye ọkọnọde koro enye ama enen̄ede oyom ndinọ. Oro edi n̄kpọ oro nnyịn ikpetide. Owo ekeme ndinyịk nnyịn ndinọ enọ. Edi edieke nnyịn mînen̄ekede iyom ndinam emi, ndinọ enọ oro idinamke nnyịn ikop inemesịt.

Ke uwụtn̄kpọ, nso edieke afo ekenyenede ndusụk inịn̄e inịn̄e uyo oro afo oyomde ndita? Edieke n̄kpọdọhọde fi nte ke afo enyene ndibụn̄ enye nnọ eyenọwọn̄ efen, nte esịt ekpenem fi ndibụn̄ nnọ?— Edi nso edieke afo ekenyenede ndusụk inịn̄e inịn̄e uyo ke ini afo okosobode ufan emi afo amade ata etieti? Edieke afo ekerede ke idemfo ndibụn̄ inịn̄e inịn̄e uyo emi nnọ ufan fo, nte oro ikpanamke fi okop inemesịt?—

 Ndusụk ini nnyịn imesima owo etieti tutu nnyịn iyom ndinọ enye kpukpru n̄kpọ inyụn̄ isụhọke baba n̄kpọ kiet inọ idem nnyịn. Nte ima oro nnyịn inyenede inọ Abasi ọkọride, oro edi se nnyịn ikpanamde ye Abasi.

Akwa Andikpep ama ọfiọk n̄wan emi ekedide ubuene emi eketiede ntre. Enye okokụt n̄wan emi ke temple ke Jerusalem. Enye ekenyene n̄kpri okụk iba kpọt; oro edi kpukpru se enye ekenyenede. Edi enye ama esịn okụk iba oro ke ekebe nte etịbe, m̀mê enọ, ke temple. Owo ndomokiet ikenyịkke enye ndinam oro. Ata ediwak owo do ikakam ifiọkke se enye akanamde. Enye akanam oro koro enye okoyomde ndinam ntre ye koro enye ekenen̄erede ama Jehovah. Esịt ama enem enye ke ndikeme ndinọ enọ.—Luke 21:1-4.

Ediwak usụn̄ ẹdu emi nnyịn ikemede ndinọ enọ. Nte afo emekeme ndikere mban̄a ndusụk mmọ?— Edieke nnyịn inọde enọ koro nnyịn inen̄erede iyom ndinọ, nnyịn iyokop inemesịt. Ntak edi oro Akwa Andikpep ọdọhọde nnyịn ete: “Ẹnọ owo n̄kpọ.” (Luke 6:38, NW) Edieke nnyịn inamde emi, nnyịn iyanam mbon en̄wen ẹnem esịt. Ndien nnyịn iyenem esịt ikan kpukpru owo!

Yak ikot n̄kpọ efen efen iban̄a nte edinọ enọ adade inemesịt edi, ke Matthew 6:1-4; Luke 14:12-14; ye 2 Corinth 9:7.

[Ndise ke page 92]

Ntak emi Jehovah edide “Abasi inemesịt”?

[Ndise ke page 93]

Nso ikeme ndinam fi okop inemesịt akan edidia kpukpru maimai fo ikpọn̄?

 [Ndise ke page 94]

Nso ke Lydia ọdọhọ Paul ye Luke?

[Ndise ke page 94]

Ntak emi Lydia okopde inemesịt ndinọ Paul ye Luke n̄kpọ?

[Ndise ke page 96]

Ntak oro ubuene n̄wan emi ekenemde esịt ndinọ kpukpru se enye ekenyenede?