Ndima Nditọete:

Ima emi imade Abasi ye mme owo esinam ‘ika ikanam mme owo ke kpukpru idụt ẹdi mbet Jesus, inyụn̄ inịm mmọ baptism.’ (Matt. 28:19, 20; Mark 12:28-31) Ata ima enen̄ede enyene odudu. Edieke inyenede ata ima, iyekeme ndin̄wam mbon oro “ẹnyenede eti esịt oro edinamde mmọ ẹnyene nsinsi uwem” ẹdima Abasi.​—Utom 13:48.

Akpa akpa, ikesimomụm se idikwọrọde idọn̄ ke ibuot, ima ikụt owo nnyịn ikwọrọ inọ inyụn̄ inọ enye n̄wed nnyịn idaha. Edi idahaemi, ọfọn inen̄ede ikpep nte ikpenemede Ikọ Abasi ye mme owo. Idiwụt ke imama mme owo edieke itịn̄de iban̄a mme n̄kpọ emi ẹdinemde-nem mmọ. Oro ọwọrọ ke ndusụk ini imekeme ndikpụhọde se ikoyomde ndikwọrọ nnọ owo ke ima ikese nte n̄kpọ etiede ye owo oro isobode ye se enye edimade. Didie ke ekpri ediye n̄wed emi ekeme ndin̄wam nnyịn inam oro?

Ediye ekpri n̄wed emi enyene ukpepn̄kpọ 12. Mme ukpepn̄kpọ emi ẹwụt mme edu oro akpanade inyene man ima mme owo inyụn̄ inam mmọ ẹdi mbet Jesus. Ẹda ukpepn̄kpọ kiet kiet ẹto itie Bible oro etịn̄de edu oro Jesus ye mme mbet esie ẹkenyenede ke ini mmọ ẹkwọrọde ikọ. Ẹnam n̄wed emi man ikụt nsio nsio usụn̄ oro ikpowụtde ke imama mme owo idịghe ndimomụm se iyomde ndikwọrọ ndọn̄ ke ibuot. Kpa ye oro oyomde inyene kpukpru mme edu emi ke ini idade nsio nsio usụn̄ ikwọrọ ikọ, iyeneme nte ndusụk mme edu emi ẹdinen̄erede ifọn ke ini iyomde nditọn̄ọ nneme, ke ini inamde mfiakn̄ka, m̀mê ke ini ikpepde owo Bible.

Nte ekpepde ukpepn̄kpọ kiet kiet ke n̄wed emi, nen̄ede kere ban̄a nte okpowụtde mme edu emi ke ini ọkwọrọde ikọ ọnọ mme owo ke edem mbufo. Nam ofụri se ekekeme man enen̄ede ama Jehovah ye mme owo. Ima edinen̄ede in̄wam fi anam mme owo ẹdi mbet Jesus.

Imenen̄ede ikop inemesịt nte ikemede ndidiana kiet ye mbufo nnam utom Abasi. (Zeph. 3:9) Yak Jehovah enen̄ede ọdiọn̄ mbufo nte ẹkade iso ndima mme owo nnyụn̄ nnam mmọ ẹdi mbet Jesus!