Kere ban̄a uwụtn̄kpọ emi ise: Ke mbubreyo Wednesday, Joe emi edide isua 17, anam kpukpru se ẹkedọn̄de enye ama, ndien idahaemi enye oyom ndiduọk odudu! Enye odomo TV onyụn̄ osụhọde etetie ke n̄kpọitie emi enye esimade.

Kpa idahaoro, ete esie ọbọp iso odụk edidọhọ enye ete,

“Joe! Etie ese TV, utu ke ndin̄wam eyenuka anam utomufọk esie! Ntak emi mûsunamke se ẹdọhọde fi?”

Joe asiama onyụn̄ ọdọhọ, “Owo isiyakke owo ọduọk odudu ke ufọk emi!”

Ete esie esịk ekpere enye onyụn̄ ọdọhọ ete: “Semi, nso ke etịn̄?”

Joe ọbọp iso onyụn̄ ọdọhọ ete: “Ntịn̄ke n̄kpọ ndomokiet.”

Esịt enen̄ede ayat ete esie. Enye ọdọhọ Joe ete, “Kûsutịn̄ ikọ ntre ye ami!”

Edieke afo ekpedide Joe, nso ke akpanam mbak utọ n̄kpọ emi editịbe?

Ndineme nneme ye ete ye eka fo etie nte ndiwat moto. Edieke awatde ekesịm ebiet emi ẹfiọkde n̄kpọ ke usụn̄, udûfiakke unyọn̄, edi oyoyom usụn̄ en̄wen asan̄a.

 KE UWỤTN̄KPỌ:

Eyenan̄wan kiet emi ekerede Leah ọdọhọ ete: ‘Esisọn̄ mi ndineme nneme ye ete mi. Ndusụk ini, esidi ke nneme nneme ye enye, ntise enye ọdọhọ, “O mbọk kûyat esịt, ọkọdọhọ didie?”’

ENYENE N̄KPỌ ITA ORO LEAH EKEMEDE NDINAM.

1. A. Etịn̄ ikọ ayat esịt ye ete esie.

   ‘Daddy, ọwọrọ ofụri se ntetịn̄ emi ukpan̄ke utọn̄!’

2. B. Odop uyo adaha ọkpọn̄ ete esie.

   Leah odop uyo, iyomke-yom nditịn̄ mfịna esie aba.

3. C. Ebet tutu ini oro ọfọnde, ndien afiak eneme n̄kpọ oro.

   Leah aka ebịne ete esie ini en̄wen, mîdịghe ewet mfịna esie ke leta ọnọ ete esie.

Ewe ke afo okpoyom Leah anam?

KERE SE IDITỊBEDE: Edieke Leah emekde A, ekeme ndidi ete esie idifiọkke ntak emi enye ayatde esịt, sia enyene se enye ekerede, ntak edi oro enye mîkpan̄ke utọn̄ inọ Leah. Leah ndiyat esịt ye ete esie idinamke ete esie enyịme ndikpan̄ utọn̄ nnọ enye, idinyụn̄ iwụtke ke enye okpono ete esie. (Ephesus 6:2) Omokụt do ke ndimek A inyeneke ufọn ndomokiet.

Kpa ye oro edide B emem akan ndinam, idịghe enye ọfọn akan. Ntak-a? Sia edieke Leah mîtịn̄ke mfịna esie inọ ete esie, ete esie idifiọkke se ifịnade enye, idinyụn̄ ikemeke ndin̄wam enye. Ntre, ndidop uyo ndaha inyeneke ufọn ndomokiet.

Edieke Leah emekde C, enye idiyakke n̄kpọ ndomokiet akpan enye ndineme nneme ye ete esie, edi oyodomo ndineme n̄kpọ oro ini en̄wen. Ndien edieke Leah emekde ndiwewet mfịna esie ke leta nnọ ete esie, emi ekeme ndinam esịt osụhọ enye.

Ndiwewet mfịna esie ke leta ekeme n̄ko ndinam enye enen̄ede etịn̄ se isịnede enye ke esịt. Ete Leah ọyọfiọk se Leah okoyomde nditịn̄ ke ini enye okotde leta oro, ndien emi ekeme ndinam enye enen̄ede ọfiọk mfịna eyen esie. N̄kọ omokụt do ke ndimek C ọyọfọn ye Leah ye ete esie. Edide enye eneme n̄kpọ emi iso ye iso ye ete esie m̀mê ewewet ke leta, enye anam item Bible emi, “ẹyak nnyịn ibịne mme n̄kpọ oro ẹnamde emem odu.”—Rome 14:19.

Nso en̄wen ke Leah ekeme ndinam?

Kere ise n̄kpọ en̄wen emi enye akpanamde nyụn̄ wet ke idak emi. Wet n̄ko se oro ekemede ndida ndi.

Ti ke idịghe kpukpru ini ke se etịn̄de esin̄wan̄a ete ye eka fo nte afo oyomde an̄wan̄a mmọ.

KE UWỤTN̄KPỌ:

Ete ye eka fo ẹbụp fi se inamde fi, afo ete, “N̄kpọ inamke mi.”

Ete ye eka fo ẹkeme ndikere ke ikọ fo ọwọrọ: “Nyomke nditịn̄ nnọ mbufo. Ẹsana mi ẹyak nyọ uwa idemmi. Idin̄wan̄ake mbufo n̄kpetetịn̄ nnọ mbufo.”

Yak idọhọ ke enyene n̄kpọ emi enen̄erede afịna fi, ndien ete ye eka fo ẹyom ndin̄wam fi, edi afo ọdọhọ mmọ ete: “Ẹkûfịna idem. Ekpri n̄kpọ ke edi.”

• Ekere ke se etịn̄de oro edin̄wan̄a didie ete ye eka fo?

• Nso idi nnennen n̄kpọ emi ọkpọbọrde mmọ?