Kere ban̄a uwụtn̄kpọ emi ise: Ke ini Timothy osụk ebrede bọl ye mme ufan esie, bọl oro enye otopde ọtọ akrasi moto mbọhọidụn̄ mmọ obom.

Nso ke afo akpanam edieke ekpedide Timothy?

EWE KE OTU N̄KPỌ ITA EMI KE AKPANAM:

1. A. Fehe.

2. B. Kan̄ dori ufan fo.

3. C. Dọhọ enyene moto ke imọ ikobom akrasi moto esie, nyụn̄ kpe enye ubọk.

Ekeme ndidọn̄ fi ndifehe. Edi ti ke esifọn enyịme ndudue fo, inamke n̄kpọ m̀mê nso ke akabiat.

1. Edi nnennen n̄kpọ oro akpanamde.

   Bible ọdọhọ “[inam] akpanikọ ke kpukpru n̄kpọ.” —Mme Hebrew 13:18.

2. Ẹsisọp ndifen nnọ mbon emi ẹnyịmede ndudue mmọ.

   Bible ọdọhọ ke “owo eke edịpde idiọkn̄kpọ esie idikwe unen, edi owo eke ayararede onyụn̄ ọkpọn̄de mmọ, ẹyetua enye mbọm.”—Mme N̄ke 28:13.

3. Ata akpan ntak edi ke emi esinem Jehovah esịt.

   Bible ọdọhọ ke ‘owo abian̄a edi mbubiam ke iso Jehovah, edi Jehovah edi ata ufan ye ndinen owo.’—Mme N̄ke 3:32.

Ẹma ẹbọ Karina emi edide isua 20 moto ete esie, ke ntak emi enye akawatde idiọk uwat. Enye ama ekpe okụk afahade moto oro, itịn̄ke inọ ete esie. Ete esie ama edifiọk ke isua kiet ebede. Karina ọdọhọ ke ima inyene mfịna ye ete imọ ke ntak oro!

Nso ke emi ekpep fi? Karina ọdọhọ ete: “Edieke owo edịpde idiọkn̄kpọ emi enye anamde, ẹyesụk ẹyarade enye ini ama ekem!”

Bible ọdọhọ ke “kpukpru nnyịn idedue ediwak ini.” (James 3:2) Nte ima iketetịn̄, edieke enyịmede ndudue fo, oro owụt ke ọmọdiọn̄ọ idem onyụn̄ osụhọde idem. Ntre, sinyịme ndudue fo.

Kpep n̄kpọ to ndudue fo. N̄kaiferi emi ekerede Vera ọdọhọ ete: “Mmesidomo ndikpep n̄kpọ nto ndudue mi, nse ebiet oro n̄kemede ndikpụhọde, ye se n̄kpanamde mbak ndifiak nnam utọ ndudue oro.” Ẹyak ise nte afo ekemede ndinam emi.

Amawat moto-saikle ete fo ọkọtọ abiat. Nso ke afo akpanam?

• Men kenịm, kûsioro uyo. Bọn̄ akam ete fo okûfiọk.

• Tịn̄ ofụri se iketịbede nọ ete fo.

• Tịn̄ nọ ete fo, edi kan̄ dori owo en̄wen.

Ubehe udomo ke ntak emi mûkusịnke idem ukpep n̄wed. Nso ke afo akpanam?

• Dọhọ ke udomo oro ama ọsọn̄ akaha.

• Nyịme ke ukûsịnke idem ukpep n̄wed.

• Dọhọ ke andikpep asasua fi.

 Idahaemi, fiak se uwụtn̄kpọ iba oro isụk inọde ikụre do; da nte ke afo edi (1) ete fo, (2) andikpep fo. Akpada didie eyenọwọn̄ emi ọsọpde-sọp etịn̄ akpanikọ? Akpada didie eyenọwọn̄ emi osude nsu?

Idahaemi, domo nditi ndudue oro akanamde isua oko nyụn̄ bọrọ mbụme emi.

Nso ndudue ke akanam? Akanam didie n̄kpọ?

• Mma ndịp se n̄kanamde.

• Mma n̄kan̄ ndori owo en̄wen.

• Mma nsọsọp nnyịme ndudue mi.

Eketie fi didie ke idem ke ini mûkunyịmeke ndudue fo?

• Esịt ama enem mi ke owo ikayarakede mi!

• Esịt ama afịna mi sia n̄ketịn̄ke akpanikọ.

Nso idi nnennen n̄kpọ oro akpakanamde?

Nso ke ekekpep oto ndudue oro?

Nso isinam ndusụk owo ẹkûnyịme ndudue mmọ?

Mme owo ẹdida fi didie edieke mûsumaha ndinyịme ndudue fo, edi mmọ ẹdida fi didie edieke esinyịmede ndudue fo?—Luke 16:10.