Ke ini Nebuchadnezzar ekemende nditọ mbọn̄ Judah esịm Babylon, enye ama emek Ashpenaz emi ekedide etubom mme adaidaha ke okụre esie ete ese aban̄a mmọ. Enye ama ọdọhọ Ashpenaz asat nditọwọn̄ emi ẹyede idem ẹkan ẹnyụn̄ ẹdiọn̄ọde n̄kpọ ẹkan man ẹkpep mmọ n̄kpọ isua ita. Se ẹdikpepde mmọ ayan̄wam mmọ ẹkama ikpọ itie ke Babylon. Ẹyekpep mmọ ndisem, ndikot, nnyụn̄ n̄wet usem Akkadian emi ẹkesisemde ke Babylon. Mmọ ẹdidia ukem udia emi edidem ye mbon ufọk esie ẹsidiade. Daniel, Hananiah, Mishael, ye Azariah ẹma ẹtiene ẹsịne ke otu nditọ oro. Ashpenaz ama osio mmọ obufa enyịn̄ Babylon; enye okosio mmọ Belteshazzar, Shadrach, Meshach,  ye Abednego. Ndi se ẹkekpepde mmọ ama anam mmọ ẹtre ndinam n̄kpọ Jehovah?

Mmọ mbinan̄ ẹma ẹbiere ke mmimọ iditreke ndikop uyo Jehovah. Mmọ ẹma ẹdiọn̄ọ ke ifọnke idia udia ufọk edidem sia Ibet Jehovah ama akpan mme Jew ndidia ndusụk udia oro. Mmọ ẹma ẹdọhọ Ashpenaz ẹte: ‘Mbọk kûnọ nnyịn udia edidem.’ Enye ama ọdọhọ mmọ ete: ‘Edieke edidem okụtde nte idem ọdiọkde mbufo ke ntak emi mbufo mîdiaha udia esie, enye oyowot mi.’

Daniel ama ọdọhọ ete oro ete: ‘Nọ nnyịn n̄kpọ in̄wan̄ ye mmọn̄ kpọt ke usen duop. Ekem se nnyịn ye nditọ eken emi ẹdiade udia edidem m̀mê mmanie ke idem edisọn̄ ikan.’ Ete oro ama enyịme.

Ke usen duop ama ekebe, idem ama eye Daniel ye mme ufan esie ita akan kpukpru nditọ eken. Jehovah ama enem esịt ye mmọ sia mmọ ẹma ẹnam se enye amade. Enye ama anam Daniel ekeme ndikabade n̄kukụt ye ndap.

Ke ẹma ẹkekpep kpukpru nditọ oro n̄kpọ ẹma, Ashpenaz ama emen mmọ ebịne edidem. Edidem ama eneme nneme ye kpukpru mmọ onyụn̄ okụt ke Daniel, Hananiah, Mishael, ye Azariah ẹdiọn̄ọ n̄kpọ ẹkan kpukpru nditọ eken. Enye ama ọdọhọ mmọ mbinan̄ ẹnam utom ke ufọk ubọn̄ esie. Ke ini anade ẹnam akpan n̄kpọ, mmọ ke enye ekesima ndibụp se ẹkpenamde. Jehovah ama anam mmọ ẹdiọn̄ọ n̄kpọ ẹkan kpukpru mme ọfiọkn̄kpọ owo edidem ye mbiaibọk esie.

Kpa ye oro Daniel, Hananiah, Mishael, ye Azariah ẹkedude ke idụt en̄wen, mmọ ikefreke Jehovah. Ndi ayaka iso anam n̄kpọ Jehovah idem ke ini ete ye eka fo mîdụhe ye afo?