Esịm n̄kpọ nte isua 70 tọn̄ọ ediwak nditọ Israel ẹkenyọn̄ọ Jerusalem, edi ndusụk mmọ ẹkesụk ẹdodụn̄ ke nsio nsio itie emi mbon Persia ẹkekarade. Ezra emi ekedide oku ekesịne ke otu oro. Enye ekesikpep mme owo Ibet Jehovah. Ini Ezra okopde ke mbon Jerusalem inịmke Ibet Abasi, enye ama oyom ndikan̄wam mmọ. Edidem Artaxerxes owo Persia ama ọdọhọ enye ete: ‘Abasi ọnọ fi ọniọn̄ man ekeme ndikpep mme owo Ibet esie. San̄a ye owo ekededi emi amade nditiene fi ka.’ Ezra ama osobo ye kpukpru mbon emi ẹkemade ndifiak nnyọn̄ Jerusalem. Mmọ ẹma ẹben̄e Jehovah ekpeme mmimọ ke usụn̄ isan̄ oro.

Mmọ ẹma ẹkesịm Jerusalem ke ọfiọn̄ inan̄ ebede. Mbọn̄ nditọ Israel ẹma ẹdọhọ Ezra ẹte: ‘Nditọ Israel ẹsọn̄ ibuot ye Jehovah ẹnyụn̄ ẹdọ iban emi ẹkponode nsunsu abasi.’ Nso ke Ezra akanam? Ezra ama ọtọn̄ọ edọn̄ ke iso kpukpru owo ọbọn̄ akam ete: ‘Jehovah, amanam ata ediwak n̄kpọ ọnọ nnyịn, edi nnyịn imanam idiọkn̄kpọ.’ Nditọ Israel ẹma ẹkabade esịt, edi mmọ ẹkesụk ẹyoyom un̄wam. Ezra ama emek mbiowo ye mme ebiereikpe ẹse ẹban̄a oro. Ke ufan̄ ọfiọn̄ ita, mmọ ẹma ẹbịn kpukpru mbon oro mîkokponoke Jehovah.

Isua 12 ama ebe. Ẹma ẹfiak ẹbọp ibibene Jerusalem ke ufọt ini oro. Ekem Ezra ama anam mme owo ẹsop idem ke an̄wa obio man okot Ibet Abasi ọnọ mmọ. Ke ini Ezra okụbọrede n̄wed Ibet, kpukpru owo ẹma ẹdaha ẹda. Enye ama otoro Jehovah, mmọ ẹnyụn̄ ẹmenede ubọk ke enyọn̄ man ẹwụt ke isịn ke uyo oro. Ezra ama okot Ibet oro onyụn̄ anam an̄wan̄a mmọ; kpukpru owo ẹma ẹnen̄ede ẹkpan̄ utọn̄. Mmọ ẹma ẹtua ẹnyụn̄ ẹdọhọ ke imafiak idue Jehovah. Edem usen oro, Ezra ama afiak okot Ibet Abasi ọnọ mmọ. Mmọ ẹma ẹkụt ke ekpere ini emi mmimọ ikpenịmde Usọrọ Mme Ataya. Ntre mmọ ẹma ẹsọsọp ẹtịm idem ẹnọ usọrọ oro.

 Ofụri usen itiaba emi ẹkenịmde usọrọ oro, mmọ ẹma ẹdara etieti ẹnyụn̄ ẹkọm Jehovah ke ndinam n̄kpọ in̄wan̄ mmọ ọfọn. Akpatre ini emi usọrọ emi ekenemde ntem ekedi ke eyo Joshua. Ke usọrọ oro ama okokụre, mme owo ẹma ẹsop idem ẹbọn̄ akam ẹte: ‘Jehovah, afo ama osio nnyịn ke ufụn, ọbọk nnyịn ke desat, ekem ọnọ nnyịn ediye isọn̄ emi. Edi ima isọn̄ ibuot ye afo ediwak ini. Afo ama ọdọn̄ mme prọfet fo utom ọnọ nnyịn, edi nnyịn ikakpan̄ke utọn̄. Kpa ye oro, afo osụk eme ime ye nnyịn. Ama anam se ọkọn̄wọn̄ọde ọnọ Abraham. Idahaemi imọn̄wọn̄ọ ke iyokop uyo fo.’ Mmọ ẹma ẹwet un̄wọn̄ọ emi ẹsịn ke n̄wed, ndien mbọn̄, nditọ Levi, ye mme oku ẹfịk ufịkn̄kpọ mmọ.