Okoneyo usen kiet, Nebuchadnezzar ama adaba enyene-ndịk ndap. Enye ama okot mme ọfiọkn̄kpọ owo esie ete ẹdinam ndap oro an̄wan̄a imọ. Owo mmọ ndomokiet ikekemeke. Ke akpatre, enye ama etịn̄ ndap oro ọnọ Daniel.

Nebuchadnezzar ama ọdọhọ Daniel ete: ‘N̄kokụt eto kiet ke ndap. Eto oro ama ọkọri, ọniọn̄ esịm ikpaenyọn̄ tutu ẹkeme ndida ke ofụri isọn̄ n̄kụt enye. Eto oro ama enyene ndiye ikọn̄ ye ediwak mfri. Unam ẹma ẹsina ke idak esie, inuen ẹnyụn̄ ẹbọp efọk ke mme n̄kọk esie. Ekem angel kiet ama oto heaven edi edifiori ete: “Ẹkek eto oro ẹduọk ẹnyụn̄ ẹkpok n̄kọk esie. Edi ẹsụhọ etak esie ye orụn̄ esie, ẹnyụn̄ ẹda ubọpn̄kpọ ukwak ye okpoho ẹbọp enye. Ẹyenam esịt esie akabade eke unam utu ke eke owo, tutu ini itiaba ebe. Kpukpru owo ẹyeda oro ẹdiọn̄ọ ke Abasi edi Andikara, ke enye ekeme ndimen ukara nnọ owo ekededi emi enye oyomde.”’

Ndịk ama anam Daniel ini Jehovah anamde ndap oro an̄wan̄a enye. Enye ama ọdọhọ edidem ete: ‘O edidem, ndap emi aban̄a fi. Ubaha ekpedide aban̄a mme asua fo. Afo edi akamba eto oro ẹkekekde ẹduọk do. Ukara ọyọwọrọ fi ke ubọk, afo oyonyụn̄ ata mbiet ke ikọt nte unamikọt. Edi afo ayafiak edi edidem sia angel oro ọkọdọhọ ẹsana etak ye orụn̄ eto oro ẹyak.’

Ke isua kiet ama ekebe, Edidem Nebuchadnezzar ama asan̄a ke enyọn̄ ufọk ubọn̄ esie ese nte Babylon eyede onyụn̄ ọdọhọ ete: ‘Sese utọ akwa obio emi mbọpde. Se nte n̄wọrọde etop!’ Enye iketịn̄ke ikọ emi ima ke ini uyo otode heaven ọdọhọ enye ete: ‘Nebuchadnezzar! Ukara ọwọrọ fi ke ubọk.’

Kpa idahaoro, ibuot ama ebe enye, enye onyụn̄ ọtọn̄ọ ndinam n̄kpọ nte unamikọt. Ẹma ẹbịn enye ẹsio ke ufọk ubọn̄ esie; enye ama okodụn̄ ke ikọt ye mme unam. Idet esie  ama ọniọn̄ nte ntan̄ ntrukpom, mbara esie onyụn̄ ebiet mbara inuen.

Ke isua itiaba ama ekebe, Nebuchadnezzar ama afiak ọdiọn̄ọ idem, Jehovah onyụn̄ anam enye afiak edi edidem Babylon. Enye ama ọdọhọ ete: ‘Itoro enyene Jehovah, Edidem enyọn̄. Mmọdiọn̄ọ ndien ke Jehovah edi Andikara. Enye anam mbon ntan̄idem ẹsụhọde idem, onyụn̄ ekeme ndimen ukara nnọ owo ekededi emi enye oyomde.’