Moses okodụn̄ ke Midian isua 40. Enye ama ọdọ n̄wan do onyụn̄ obon nditọ. Usen kiet ke ini enye ekemende erọn̄ esie aka yak ẹketa mbiet ekpere Obot Sinai, enye ama okụt ata n̄kpọ n̄kpaidem. Enye ama okụt nte ikan̄ asakde ke eto n̄kukịm, edi itaha eto oro! Ke ini Moses akasan̄ade aka ndise se itịbede, enye ama okop uyo ọdọhọde ete: ‘Moses! Kûsan̄a ukpere. Sio ikpaukot fo, koro ebiet emi afo adade edi edisana isọn̄.’ Jehovah akada angel esie etịn̄ ikọ oro ye Moses.

Ndịk ama anam Moses tutu enye ofụk iso esie. Uyo oro ama ọdọhọ enye ete: ‘Mmokụt ufen emi nditọ Israel ẹbọde. Nyanyan̄a mmọ nsio ke Egypt nnyụn̄ mmen mmọ n̄ka eti isọn̄. Afo edida mmọ usụn̄ iwọrọ ke Egypt.’ Ndi ukereke ke n̄kpọ oro ama akpa Moses idem?

Moses ama obụp ete: ‘Mmọ ẹma ẹbụp mi m̀mê anie ọdọn̄ mi, nso ke nditịn̄?’ Abasi ama ọbọrọ enye ete: ‘Dọhọ ke Jehovah, Abasi Abraham, Abasi Isaac, ye Abasi Jacob ọdọn̄ fi.’ Edi Moses ama ọdọhọ ete: ‘Ndinam didie edieke mmọ mînịmke se ntịn̄de?’ Jehovah ama owụt Moses ke imọ iyan̄wam enye. Enye ama ọdọhọ Moses otop esan̄ esie enịm ke isọn̄. Esan̄ oro ama oforo urụkikọt! Ke ini Moses omụmde isịm urụkikọt oro, enye ama afiak oforo esan̄. Jehovah ama ọdọhọ enye ete: ‘Ama anam utịben̄kpọ emi owụt mmọ, mmọ ẹyeda oro ẹdiọn̄ọ ke ami ndọn̄ fi.’

Moses ama ọdọhọ ete: ‘Ndiọn̄ọke nditịn̄ ikọ ọfọn.’ Jehovah ama ọdọhọ enye ete: ‘Nyeteme fi se editịn̄de, nyonyụn̄ ndọhọ Aaron eyenuka an̄wam fi.’ Moses ama emen ubon esie adaha Egypt sia enye ama ọdiọn̄ọ ke Jehovah ayan̄wam imọ.