Mbon Egypt ẹma ẹnam nditọ Israel ẹdi ifịn ẹnyụn̄ ẹnọ mmọ ọkpọsọn̄ utom. Jehovah ama ọdọn̄ Moses ye Aaron ẹkedọhọ Pharaoh ẹte: ‘Yak ikọt mi ẹnyọn̄ọ man mmọ ẹketuak ibuot ẹnọ mi ke wilderness.’ Pharaoh ama ọbọrọ usọn̄enyịn usọn̄enyịn ete: ‘Se Jehovah etịn̄de oro ibeheke mi, ndiyakke nditọ Israel ẹnyọn̄ọ.’ Enye ama ọnọ nditọ Israel utom emi ọsọn̄de akan akpa. Jehovah ama ebiere ndikpep Pharaoh n̄kpọ. Ndi ọmọdiọn̄ọ se Jehovah akanamde? Jehovah ama amia Egypt Ufen Duop. Enye ama ọdọhọ Moses ete: ‘Pharaoh imaha ndinam se ndọhọde. Enye ayaka Akpa Nile usenubọk n̄kpọn̄. Ka bịne enye do kọdọhọ enye ke sia enye mîmaha ndiyak ikọt mi ẹnyọn̄ọ, ke Akpa Nile ayakabade iyịp.’ Moses ama anam nte Jehovah ọkọdọhọde. Pharaoh ama ada enyịn esie okụt nte Aaron adade esan̄ amia Akpa Nile ndien mmọn̄ oro akabade iyịp. Iyak ẹma ẹkpan̄a, akpa ọtọn̄ọ nditebe, mme owo ikonyụn̄ ikemeke ndin̄wọn̄ mmọn̄ oro. Kpa ye oro, Pharaoh ikayakke nditọ Israel ẹnyọn̄ọ.

 Ke usen itiaba ebede, Jehovah ama afiak ọdọn̄ Moses ọkọdọhọ Pharaoh ete: ‘Edieke mûyakke ikọt mi ẹnyọn̄ọ, nyanam mfọt ẹyọhọ Egypt.’ Pharaoh ikosụk inyịmeke, ntre Aaron ama emenede esan̄ esie anyan ke mmọn̄ Egypt, ndien mfọt ẹtọn̄ọ ndiyọhọ kpukpru itie. Mfọt ama ọyọhọ ufọk mme owo, ọdọk bed mmọ, onyụn̄ ọdọn̄ọ usan mmọ. Ofụri obio ekedi mfọt mfọt! Pharaoh ama ọdọhọ Moses ekpe Jehovah ubọk yak ufen oro etre onyụn̄ ọn̄wọn̄ọ ke imọn̄ iyak nditọ Israel ẹnyọn̄ọ. Ntre Jehovah ama anam ufen oro etre, nditọ Egypt ẹnyụn̄ ẹtan̄ okpo mfọt ẹbok ke eboho ke eboho. Ofụri itie ama etebe. Kpa ye oro, Pharaoh ikosụk iyakke mmọ ẹnyọn̄ọ.

Ekem Jehovah ama ọdọhọ Moses ete: ‘Dọhọ Aaron ada esan̄ esie eyịbi ke isọn̄, ndien ntan ayakabade mbufụk.’ Inikiet inikiet, mbufụk ama ọyọhọ kpukpru ebiet. Ndusụk ikọt Pharaoh ẹma ẹdọhọ enye ke ‘ufen enye emi oto Abasi.’ Edi Pharaoh ikosụk iyakke nditọ Israel ẹnyọn̄ọ.