Mbon Assyria ẹma ẹda obio ubọn̄ esien Israel duop ẹnyene. Idahaemi Sennacherib, edidem mmọ, oyom ndida Judah n̄ko. Enye ama ọtọn̄ọ ndida mme obio Judah kiet kiet. Edi Jerusalem ke enye ekenen̄ede oyom. Sennacherib ikọdiọn̄ọke ke Jehovah idiyakke n̄kpọ anam Jerusalem.

Hezekiah edidem Judah ama ọnọ Sennacherib ata ediwak okụk man enye osion̄o idem ọkpọn̄ Jerusalem. Kpa ye oro Sennacherib ọkọbọde okụk oro, enye ama osụk ọdọn̄ ọkpọsọn̄ udịmekọn̄ esie ẹka en̄wan ye Jerusalem. Idem ama enyek mme owo ke Jerusalem sia mbonekọn̄ Assyria ke ẹkekpat ẹdi sụn̄sụn̄. Edi Hezekiah ama ọdọhọ mmọ ete: ‘Ẹkûyak idem enyek mbufo. Mbon Assyria ẹkop odudu, edi Jehovah ayanam nnyịn ikop odudu ikan mmọ.’

Sennacherib ama ọdọn̄ Rabshakeh isụn̄utom esie aka Jerusalem akasak mmọ. Rabshakeh ama akada ekpere Jerusalem ofiori ete: ‘Jehovah idikemeke ndin̄wam mbufo. Ẹkûyak Hezekiah abian̄a mbufo. Idụhe abasi emi ekemede ndinyan̄a mbufo nsio nnyịn ke ubọk.’

Hezekiah ama obụp Jehovah se imọ ikpanamde. Jehovah ama ọbọrọ enye ete: ‘Kûyak se Rabshakeh etịn̄de anam fi ndịk. Sennacherib ididaha Jerusalem.’ Ekem Sennacherib ama ọnọ leta ẹsọk Hezekiah ete: ‘Kam sụk ibuot nọ mi. Jehovah idikemeke ndinyan̄a fi.’ Hezekiah ama ọbọn̄ akam ete: ‘Jehovah mbọk, nyan̄a nnyịn man kpukpru owo ẹdiọn̄ọ ke afo ikpọn̄ edi ata Abasi.’ Jehovah ama ọdọhọ enye ete: ‘Edidem Assyria ididụkke Jerusalem emi. Nyekpeme obio mi.’

Sennacherib ama enen̄ede enịm ke imọ imọn̄ ida Jerusalem inyene. Edi okoneyo usen kiet  Jehovah ama ọdọn̄ angel kiet okowot mbonekọn̄ Assyria 185,000 ke edem Jerusalem. Ẹma ẹwot nti mbonekọn̄ Edidem Sennacherib ẹnyụn̄ ẹkan Sennacherib. Enye ama emen iso ndọk ọnyọn̄. Jehovah ama anyan̄a Hezekiah ye Jerusalem kpa nte enye ọkọn̄wọn̄ọde. Ekpedi ama odu ke Jerusalem, ndi ọkpọkọbuọt idem ye Jehovah?