Obio Nineveh okodu ke Assyria, ndien mbon obio oro ẹma ẹdiọk etieti. Jehovah ama ọdọn̄ Jonah emi ekedide prọfet esie aka ọkọdọhọ mmọ ẹkabade esịt. Edi Jonah ama odụk nsụn̄ikan̄ aka ebiet en̄wen emi ẹkekotde Tarshish.

Nte mmọ ẹsụk ẹwatde ẹka akamba oyobio ama ọwọrọ; idem ama enyek mme awat nsụn̄ikan̄ oro. Mmọ ẹma ẹbọn̄ akam ẹbụp mme abasi mmọ m̀mê nso inam utọ n̄kpọ emi etịbe. Ke akpatre Jonah ama ọdọhọ mmọ ete: ‘Ami ndi ntak. N̄kefehe mbak ndinam se Jehovah ọkọdọhọde nnam. Ẹmen mi ẹtop ẹsịn ke inyan̄, ndien inyan̄ oyodobo.’ Mme awat nsụn̄ikan̄ oro ikoyomke nditop Jonah nsịn ke inyan̄, edi Jonah ama akpak mmọ ete ẹtop imọ ẹsịn. Ke ini mmọ ẹketopde enye ẹsịn, inyan̄ ama odobo.

Jonah ekekere ke imọn̄ ikpa. Enye ama ọbọn̄ akam ọnọ Jehovah nte enye osụk eden̄de aka. Jehovah ama anam akamba iyak ekemen Jonah emen, edi enye ikakpaha. Jonah ama esịne ke idịbi iyak oro ọbọn̄ akam ete: ‘Mmọn̄wọn̄ọ ke nyesikop uyo fo kpukpru ini.’ Jehovah ama ekpeme Jonah ke idịbi iyak oro ke ofụri usen ita, ekem anam iyak oro ọkpọhi enye odori ke obot.

Ndi Jehovah ndinyan̄a Jonah ọkọwọrọ ke Jonah idikaha utom oro aba? Ihih. Jehovah ama afiak ọdọhọ enye aka Nineveh.  Jonah ama aka isan̄ enye emi. Enye ama ọkọdọhọ ndiọi owo oro ete: ‘Usen 40 osụhọ Abasi ndisobo Nineveh.’ Edi se Jonah mîkodorike enyịn ama etịbe—mbon Nineveh ẹma ẹkpan̄ utọn̄ ẹnyụn̄ ẹkabade esịt. Edidem mmọ ama ọdọhọ mmọ ete: ‘Ẹfiori ẹkot Abasi, ẹnyụn̄ ẹkabade esịt. M̀mê oro ayanam enye etre ndisobo nnyịn.’ Ke ini Jehovah okokụtde ke mbon Nineveh ẹkabade esịt, enye ikosoboke mmọ aba.

N̄kpọ emi ama ayat Jonah etieti. Sese do! Jehovah ama enyene ime ye Jonah onyụn̄ atua enye mbọm, edi mbọm mbon Nineveh ikanamke Jonah. Utu ke oro, enye ama ọwọrọ ke obio oro eketie ke idak ekikop amiahade iso. Ekem ekikop oro akpa. N̄kpọ emi ama ayat Jonah tutu. Ntre Jehovah ama ọdọhọ enye ete: ‘Mbọm ekikop emi anam fi. Ndi ikpọfọnke mbọm kpukpru owo emi ẹdụn̄de ke Nineveh anam mi? Mma ntua mmọ mbọm, nnyụn̄ nsoboke mmọ.’ Nso ke oro ekekpep Jonah? Uwem mbon Nineveh ama ọsọn̄ urua akan ekikop oro.