Enyene ekpri eyenan̄wan Israel emi mbonekọn̄ Syria ẹkemụmde ẹkpọn̄ ubon mmọ ke Israel ẹmen ẹka Syria. Enye ama ekedi ofụn ọnọ n̄wan etubom ekọn̄ Syria emi ẹkekotde Naaman. Eyen oro iketreke ndikpono Jehovah kpa ye oro mme owo do ẹkesikponode abasi ubọk owo.

Naaman ama ọdọn̄ọ idiọk udọn̄ọ emi ẹkotde akpamfia; ubiak ikesidịghe ekpri. Eyen oro ama enen̄ede oyom ndin̄wam enye. Enye ama ọdọhọ n̄wan Naaman ete: ‘Mmọdiọn̄ọ owo emi ekemede ndinam idem ọsọn̄ ebe fo. Enyene prọfet Jehovah ke Israel emi ekerede Elisha. Enye ekeme ndinam idem ọsọn̄ ebe fo.’

N̄wan Naaman ama ọdọhọ Naaman se eyen oro eketịn̄de. Naaman ama enen̄ede oyom usọbọ, ntre enye ama adaha aka ufọk Elisha ke Israel. Naaman ekekere ke Elisha ọyọwọrọ edikọm imọ nte akwaowo. Edi utu ke Elisha ndiwọrọ ndikụt enye  iso ye iso, enye ama ọdọn̄ isụn̄utom esie ọkọdọhọ Naaman ete: ‘Ka keyere mmọn̄ ke Akpa Jordan utịm ikatiaba, ndien udọn̄ọ fo oyokụre.’

Ikọ oro ama abiak Naaman etieti. Enye ama ọdọhọ ete: ‘N̄kekere ke prọfet emi oyokot enyịn̄ Abasi esie onyụn̄ anam utịbe utịbe n̄kpọ yak udọn̄ọ mi okụre. Edi enye etetie ọdọn̄ ẹdidọhọ mi n̄keyere mmọn̄ ke akpa ke Israel. Imenyene nti akpa ke Syria. Ndi n̄kpekemeke ndika do n̄keyere mmọn̄?’ Naaman ama ayat esịt ọnyọn̄.

Mme asan̄autom Naaman ẹma ẹn̄wam enye okpụhọde ekikere. Mmọ ẹma ẹdọhọ enye ẹte: ‘Ndi ukpunamke se ededi emi ẹdọhọde fi anam man idem ọsọn̄ fi? Ata ekpri n̄kpọ ke prọfet oro ọdọhọ fi anam. Ntak mûnamke?’ Naaman ama okop uyo mmọ onyụn̄ aka ọkọduọ odụk mmọn̄ Akpa Jordan utịm ikatiaba. Ọyọhọ utịm ikatiaba emi enye ọwọrọde ke mmọn̄ oro edi, udọn̄ọ esie ama okụre ofụri ofụri. Esịt ama enem enye tutu enye afiak ọkọkọm Elisha. Enye ama ọdọhọ ete: ‘Mmọdiọn̄ọ ndien ke Jehovah edi ata Abasi.’ Ekere ke eketie ekpri eyenan̄wan Israel oro didie ke idem ini Naaman ọkọnyọn̄de edi, idọn̄ọke aba?