Edima Ọkwọrọikọ:

Da nte ke afo edi kiet ke otu mme apostle emi ẹdade ke Obot Olive. Jesus ọwọrọ ada fi ke iso. Ke ndondo oro enye oyomde ndidọk n̄ka heaven, enye ọdọhọ ete: “Mbufo ẹyebọ odudu ke ini edisana spirit edide edidoro mbufo ke idem, ndien mbufo ẹyetie ntiense ẹban̄a mi ke Jerusalem ye ke ofụri Judea ye Samaria tutu esịm ata utịt ikpehe isọn̄.” (Utom 1:8) Nso ke afo akpanam?

Ekeme ndidi afo ekpekere ke utom oro okpon akaha. Emekeme ndikere ete, ‘Didie ke nnyịn emi idide n̄kpata owo ifan̄ kpọt idikeme ndikwọrọ ikọ “tutu esịm ata utịt ikpehe isọn̄”?’ Afo emekeme nditi se Jesus eketịn̄de ke okoneyo oro ekesierede usen emi ẹkewotde enye ete: “Ofụn ikponke ikan eteufọk esie. Edieke mmọ ẹkekọbọde mi, mmọ ẹyekọbọ mbufo n̄ko; edieke mmọ ẹkenamde ikọ mi, mmọ ẹyenam eke mbufo n̄ko. Edi mmọ ẹdinam mbufo kpukpru n̄kpọ emi ke ntak enyịn̄ mi, koro mmọ mîfiọkke enye emi ọkọdọn̄de mi.” (John 15:20, 21) Ke ini etiede ekere ikọ oro, emekeme ndibụp idemfo ete, ‘Ndikeme didie ndika iso nsịn idem n̄kwọrọ ikọ edieke ẹkọbọde mi ntre?’

Nte n̄kpọ onyụn̄ etiede ye nnyịn edi oro. Utom nnyịn nte Mme Ntiense Jehovah edi ndisịn idem n̄kwọrọ ikọ nnọ “mme owo ke kpukpru idụt” tutu esịm “ata utịt ikpehe isọn̄.” (Matt. 28:19, 20) Didie ke ikeme ndinam utom emi akpan akpan ke ini mme owo ẹkọbọde nnyịn nte Jesus ọkọdọhọde?

N̄wed Utom Mme Apostle obụk inem inem mbụk emi aban̄ade nte Jehovah akan̄wamde mme apostle ye nditọete eken ke eyo oro ẹnam utom emi. N̄wed emi afo osụk okotde mi ayanam fi ọfiọk ediwak n̄kpọ emi ẹketịbede ọnọ mme Christian eyo oro, oyonyụn̄ okụt nte ekenemde mmọ ndidiọn̄ọ ke ukwọrọikọ mmimọ ama ọsọsọp esịm ata ediwak ebiet. Eyenen̄ede akpa fi idem ndikụt ekese n̄kpọ oro ikọt Abasi mfịn ẹdade ẹbiet mme asan̄autom Abasi eke eyo mme apostle. Afo oyokụt ke se nnyịn idade ibiet mmọ idịghe sụk utom emi inamde, edi n̄ko nte ẹtịmde nnyịn idem man inam utom emi. Nditie n̄kere mban̄a emi ayanam fi etetịm enịm ke Jehovah Abasi ada ikpehe esop esie eke isọn̄ usụn̄.

Nnyịn imesịn fi ke akam inyụn̄ inịm ke ndikot nnyụn̄ n̄kpep n̄wed Utom Mme Apostle ayanam fi enen̄ede enịm ke Jehovah ayan̄wam fi ye nte ke edisana spirit esie ọyọsọn̄ọ fi idem. Emi akpakam anam fi aka iso esịn idem ọkwọrọ aban̄a “Obio Ubọn̄ Abasi” onyụn̄ an̄wam mbon en̄wen ẹtiene ẹdụk usụn̄ oro adade esịm edinyan̄a.​—Utom 28:23; 1 Tim. 4:16.