Ẹma ẹkot n̄wan Somalia kiet emi odụn̄de ke Sweden edi mbono esop ke Ufọkmbono Obio Ubọn̄, enye ama onyụn̄ enyịme ndika. N̄kpọ iketiehe nte enye ekekerede. Kpukpru owo ẹkesese enye, owo ndomokiet ikadarake enye. Eketie enye ntre ntre ke idem. Owo kiet oro okokụtde ke etie nte enye ikamaha ebiet oro ama obụp enye ete: “Ndi emedue usụn̄?”

Enye ama ọbọrọ ete: “Ih, etie  ntre.” Ekem ọkpọn̄ ebiet oro. Ke ini mma oro akafiakde osobo ye Mme Ntiense oro ẹkekotde enye, esịt ama ayat enye, ndien enye ama ọdọhọ ke tutu amama imọ idikaha aba Ufọkmbono Obio Ubọn̄. Mmọ ẹma ẹkere m̀mê edi didie, sia mmọ itịghi nte ikokụtde enye ke Ufọkmbono Obio Ubọn̄. Ke ẹma ẹkeneme n̄kpọ emi esisịt ye enye, mmọ ẹma ẹdifiọk ke enye akaka ufọkabasi!

Mme Ntiense oro ẹma ẹsịn udọn̄ ẹnọ enye ẹte afiak edi Ufọkmbono Obio Ubọn̄. Enye ama enyịme, edi ọdọhọ ke imọ iditiehe ibe minit duop edieke imọ mîmaha nte ẹnamde n̄kpọ do. Nte ededi, ke ini enye akakade Ufọkmbono Obio Ubọn̄, kpukpru owo ẹma ẹdara enye etieti!  Mbono esop ama enem enye tutu enye ekedi akpatre owo ndikpọn̄ Ufọkmbono Obio Ubọn̄ ke ẹma ẹkesuana. Toto ke ini oro, enye esidụk mbono esop kpukpru ini, ndien idahaemi enye edi asuanetop oro ama akana baptism.

Stergios edi akparawa emi odụn̄de ke Greece. Usenubọk usen kiet, ke ini enye ọkọnyọn̄de utom, enye ama asan̄a ke efak en̄wen utu ke enye oro enye esisan̄ade. Stergios ama okụt nte n̄kpọ anade ke isọn̄. Enye ekedi n̄wedikot Editi n̄kpa Christ. Ẹma ẹwet mbụme emi: “Didie ke afo ada Jesus?” Sia ediwak owo ẹkedude ke ebiet oro, Stergios ikọsọpke imen n̄wedikot oro ke isọn̄. Ke ini enye ekesịmde ufọk, enye ama ọtọn̄ọ ndikere mban̄a mme mbụme oro ẹmịn̄de ke n̄wedikot oro onyụn̄ enen̄ede oyom ndikpep mme n̄kpọ efen efen.

Stergios ama aduak ndin̄wọn̄ kọfi uwemeyo usen oro ye mme ufan esie. Ke ini enye akakade ndikụt mmọ, enye ama asan̄a usụn̄ oro enye okokụtde n̄wedikot oro, onyụn̄ ekere ke owo en̄wen idimenke. Owo ikosụk imenke, edi ediwak owo ẹkesụk ẹdodu, ntre enye n̄ko ikemenke. Ke usụn̄ unyọn̄ ke ama ọkọn̄wọn̄ kọfi ye mme ufan esie ama, Stergios ama afiak aka efak oro, n̄wedikot oro do okosụk ana ke isọn̄. Isan̄ emi enye ama emen n̄wedikot oro okot. Ke enye ama okokot n̄wedikot oro, enye ama ebiere ke imọ iyodụk Editi oro.

Ke ẹma ẹkekụre edinam Editi, Stergios ama enyịme ẹdikpep imọ Bible ke mfọn. Enye ama ọtọn̄ọ ndidụk mme mbono esop onyụn̄ anam n̄kọri. Enye akana baptism ke usen akpan mbono ke March 2013.

Ke January 2010, eyenete emi ekerede Finn ke Copenhagen ke Denmark, ama ọwọrọ aka ndinam isan̄  onyụn̄ akama mme magazine. Ke ini enye akasan̄ade ke mfafaha efak kiet, enye ama okụt ọbọn̄ kiet nte asan̄ade ebịne enye. Finn ama ọnọ enye Enyọn̄-Ukpeme ye Ẹdemede! eke December 2009, emi ẹkesịnede ediwak ibuotikọ oro ẹban̄ade Christmas. Ke ini ọbọn̄ oro eketịn̄de ikọ, Finn ama ọdiọn̄ọ uyo esie. Ọbọn̄ oro esida usụn̄ ke ọwọrọetop nneme ekebe ukopikọ. Ke ndan̄nsiere, Finn ama akpan̄ utọn̄ ke nneme ekebe ukopikọ, ndien idem ama akpa enye ndikop ọbọn̄ oro ọdọhọde ke imọ ima ibọ Enyọn̄-Ukpeme ye Ẹdemede! n̄kpọn̄ emi ekebede. Enye ama okot ndusụk ibuotikọ magazine ke ekebe ukopikọ. Enye ama okot aban̄a esen esen “ntantaọfiọn̄” emi ẹkekụtde ke ikpaenyọn̄ ke ini oro Jesus akamanade onyụn̄ enyịme ke anaedi Satan akanam ẹkụt ntantaọfiọn̄ oro.

Finn ama okot ọbọn̄ oro esidade usụn̄ ke ndutịm ekebe ukopikọ oro, sia ọbọn̄ oro ama ama se enye okokotde ke magazine oro. Ke ini mmọ ẹkenemede nneme, Finn ama obụp enye ukpono ukpono m̀mê ẹkeme ndineme n̄kpọ mban̄a Bible ke edinam ekebe ukopikọ. Ke urua iba ẹma ẹkebe, ẹma ẹbọrọ enye ke ẹkeme. Ẹma ẹsineme n̄kpọ ke hour iba ẹban̄a Mme Ntiense Jehovah ye Bible utịm ike 30. Ọbọn̄ oro akadade usụn̄ ke edinam ekebe ukopikọ oro ye Finn ẹma ẹsineme ibuotikọ oro mmọ ẹkemekde ẹnyụn̄ ẹbọrọ ediwak mbụme oro mme andikop edinam emi ẹkebụpde.

Owo kiet emi esikpan̄de utọn̄ ke edinam emi ama okot owo emi anamde utom ke itieutom ekebe ukopikọ emi, onyụn̄ ọnọ enye nọmba telefon esie. Enye okoyom nditọete ẹdisobo ye imọ. Ẹma ẹdiomi nte ẹdinamde oro. Ọbọn̄ oro ama esikop nte mme ufan ye iman esie ẹdoride Mme Ntiense Jehovah ikọ ke ediwak isua, ntre enye ikesimaha Mme Ntiense Jehovah, edi edinam  ekebe ukopikọ emi ama abiat kpukpru oro efep. Ẹma ẹtọn̄ọ ndikpep Bible ye enye, ndien ke 2013, enye ama odụk Editi ye akpan utịn̄ikọ an̄wa. Enye esidụk kpukpru mbono esop ke Sunday esinyụn̄ ọnọ nti ibọrọ ke Ukpepn̄kpọ Enyọn̄-Ukpeme. Mbon en̄wen n̄ko ke obio oro ẹma akpanikọ ke ntak n̄kpọ oro mmọ ẹsikopde ke ini edinam ekebe ukopikọ oro.

Ekedi ke akpatre usen mbono district kiet ke Italy. Ke ini Lucio ọkọkọmde mme ufan esie unyọn̄, ebe ye n̄wan kiet ẹma ẹsan̄a ẹkpere mmọ. Lucio ama obụp ebe ye n̄wan oro esop oro mmọ ẹdude. Mmọ ẹma ẹbọrọ ẹte: “Nnyịn inyeneke esop.”

Lucio ama obụp ete: “Ndi owo okokot mbufo?”

Mmọ ẹma ẹbọrọ ẹte: “Ihih, ikidi ke idem nnyịn.”

Idahaemi Lucio ama oyom ndifiọk se ikanamde mmọ ẹdi, ntre enye ama obụp ete, “Mbọk ẹkûyat esịt, nso ikanam mbufo ẹdi?”

Mmọ ẹma ẹbọrọ ẹte, “Ikokụt n̄wedikot ke enyịnusụn̄ nnyin, oro akanam idi.”

Ke ini mmọ ẹkesiande Lucio ebiet oro mmọ ẹdụn̄de, Ester an̄wan esie ama ofiori ete: “Ami n̄kafak n̄wedikot oro! Ekedi akpatre usen oro ikasuande n̄wedikot oro, ndien mma n̄kere ke ọfọn mfak mmọ ke enyịn̄usụn̄ ufọk oro mme enyeneufọk mîdụhe utu ke ndidọduọn̄ọ mmọ.” Ke ẹma ẹkedikụt n̄wedikot oro, ebe ye n̄wan emi ẹma ẹbiere ndika Ufọk Mbono n̄kodụk mbono oro ke Sunday oro eketienede. Ke ẹma ẹkenyene nneme esisịt, Lucio ye Ester ẹma ẹkot ebe ye n̄wan emi ufọk, ndien do mmọ ẹma ẹkeneme mme n̄kpọ en̄wen. Ebe ye n̄wan emi ẹma ẹnyịme ẹsikpep mmimọ Bible. Mmọ ẹsinen̄de ẹben̄e idem ẹnọ ukpepn̄kpọ Bible, ẹsinyụn̄ ẹdụk mme mbono esop ẹnyụn̄ ẹtiene ẹbọrọ mbụme idahaemi.