Ke October 20, 2012, Mme Ntiense Jehovah ke Korea ẹma ẹkop idatesịt ke ini ẹkeyakde n̄kọk itieutom oro ẹkefiakde ẹdiọn̄ ndusụk ikpehe ẹnyụn̄ ẹbọpde ndusụk ikpehe obufa, ẹnọ Jehovah. Edinam oro ama enem etieti koro enye ama anam nditọete ẹti nti utom oro ẹnamde ke isua 100 emi ẹbede. Ke akande oro, ke 2012, ibat mme asuanetop ama ebe 100,000 ke akpa ini. N̄kpọ nte mme anamutom unyịmesịt 1,200 ke Korea ye mme asan̄autom ofụri ererimbot 239 emi ẹtode idụt usụkkiet ẹma ẹbọp ufọkidụn̄, ufọk umịn̄n̄wed, itieutom umụm n̄kpọ ndọn̄ ke CD ye DVD, ye itie udiọn̄ n̄kpọisan̄. Ke adianade do, ẹma ẹfiak ẹdiọn̄ ata ediwak ufọk emi ẹdude do.

Anthony Morris emi edide owo Otu Ukara ama ọnọ  ata edinem utịn̄ikọ ediyak nnọ emi nditọete 3,037 ẹkedụkde. Ke ndan̄nsiere, ẹma ẹnịm akpan mbono ke akwa efe kiet, ndien ẹma ẹda Intanet ẹnam se ibede esop 1,300 ke Korea ẹtiene ẹdụk edinam oro. Ofụri ibat Mme Ntiense Jehovah ye mbon oro ẹnyenede udọn̄ 115,782 ẹkedụk inem inem edinam emi.

Mme andituak ibuot nnọ Jehovah ke Liberia idifreke March 9, 2013, nte ata akpan usen. Isenowo ẹma ẹto idụt 11 ẹdidụk edinam ediyak n̄kọk itieutom emi ẹfiakde ẹdiọn̄ ndusụk itie ẹnyụn̄ ẹbọpde ndusụk itie obufa, nnọ. Ama enen̄ede enem kpukpru owo ndikop utịn̄ikọ ediyak nnọ oro Guy Pierce emi edide owo Otu Ukara ọkọnọde. Ke ẹma ẹkeyak utom edinam ndutịm ye edibọp ufọk emi ẹnịm ke se ibede isua duop ke ntak en̄wan mbio obio, ẹma ẹtat n̄kọk itieutom emi ẹkesịm ufọk emi okodude ekpere, oro mbon oro ẹn̄wanade ye ukara ẹkesidịbede, ẹkesinyụn̄ ẹbonde mbon itọkekọn̄. Mbonubon Bethel 51 ẹdat esịt ndinyene ufọkidụn̄ emi enyenede  ubet 35, ọfis oro ẹfiakde ẹdiọn̄, obufa itie ubon n̄wed, obufa itie udiọn̄ n̄kpọ, obufa itie utem udia ye ubet udia.

Georgia edi idụt emi mme owo ẹnyenede ima ẹnyụn̄ ẹmade n̄kpọ Abasi. Ke ukara Soviet Union ama ọkọduọ, akwa n̄kọri ama odu ke esop Abasi, ekem ẹma ẹnen̄ede ẹkọbọ ikọt Abasi. Ubiọn̄ọ enen̄ede osụhọde ubọk, ndien Mme Ntiense Jehovah ke Georgia ẹma ẹnam ata akpan edinam ke Saturday, April 6, 2013, ke ini David Splane emi edide owo Otu Ukara ọkọnọde utịn̄ikọ ediyak n̄kọk itieutom nnọ. Emi esịne n̄kọk itieutom oro ẹfiakde ẹtat, Ufọk Mbono, obufa ufọk oro ẹdidade inịm Ufọkn̄wed Mme Ọkwọrọ Obio Ubọn̄, ye Ufọkn̄wed Mme Esenyịn Oro Ẹsan̄ade-San̄a ye Iban Mmọ. Owo 338 emi ẹtode idụt 24 ẹma ẹditiene Mme Ntiense 800 ke Georgia ẹdụk edinam ediyak nnọ oro.

Ke ndan̄nsiere, ẹma ẹda Intanet ẹnam owo 15,200 emi ẹkesopde idem ke nsio nsio itie ke ofụri Georgia ẹse akpan utịn̄ikọ emi Brọda Splane ọkọnọde. Edinam emi mme owo ẹketode nsio nsio idụt ẹdidụk mi ama enem tutu. Eyenete kiet emi edide akparawa ọkọdọhọ ete: “An̄wan̄a mi ndien nte obufa ererimbot editiede.”

Ke June 29, 2013, ẹma ẹyak obufa ọfis emi enyenede enyọn̄ ita ke Bethel Yangon ke Myanmar, ẹnọ. Guy Pierce emi edide owo Otu Ukara ọkọnọ utịn̄ikọ ediyak nnọ, ndien owo 1,013 emi esịnede mme owo emi ẹtode idụt 11 ẹkedụk edinam oro. Owo emi otode idụt oro ẹkpande utom Mme Ntiense Jehovah ama osobo ye nditọete oro ẹkedọhọde ẹkebet isenowo ke akwa an̄wambehe ubomofụm ke Yangon. Enye ama anyan ubọk ke idiọn̄ọ oro ẹkewetde “Mme Ntiense Jehovah Ẹmedi-o,” onyụn̄ obụp ete, “Ndi Mme Ntiense Jehovah ẹdi  ndika ikpe?” Mmọ ẹma ẹbọrọ enye ẹte: “Ihih, idara mme ufan nnyịn.” Ete oro ama obụp mmọ ete: “Anie ededi Jehovah emi?” Ufọn idụhe nditetịn̄ ke nditọete oro ẹma ẹda ifet oro ẹnọ ikọ ntiense. Ke ndan̄nsiere usen oro ẹkenamde edinam ediyak nnọ oro, ẹma ẹnịm san̄asan̄a mbono ke itie mbono Myanmar, ndien Brọda Pierce ama ọnọ utịn̄ikọ ke ibuotikọ emi: “Nam N̄kpọ Jehovah ye Esịt Ifiọk.” Ẹma ẹda urụk ukopikọ ẹnam mme owo ẹtie ke itie itiokiet en̄wen ke Myanmar ẹkop utịn̄ikọ emi, ndien owo 2,963 ẹkekop ekemini utịn̄ikọ emi. Kiet ke otu mme awat ọ-bọs oro ẹkemende nditọete ẹka akpan edinam oro ke Yangon ọkọdọhọ ete: “Mbufo ẹmenen̄ede ẹkpụhọde ye mme ido ukpono eken. Ẹmenyene eti edu uwem, ẹsịne n̄kpọ ediye ediye, ẹnyụn̄ ẹnen̄ede ẹfọn ido. Mmawat bọs ke ediwak isua, edi akanam n̄kwe mbon oro ẹyede ido nte mbufo!”

Mme asan̄autom Jehovah ke Moldova ẹma ẹnyene ntak ndidat esịt ke Wednesday, July 3, 2013, ke ini  Stephen Lett emi edide owo Otu Ukara ọkọnọde utịn̄ikọ ediyak obufa n̄kọk itieutom oro ẹkefiakde ẹtat, nnọ. Obufa ufọk oro ẹbọpde ẹdian mi enyene ufọk emi edide enyọn̄ ita emi esịnede itie ubonn̄wed ye ufọkidụn̄ emi enyenede ubet duop ye Ufọkmbono Obio Ubọn̄ emi edide enyọn̄ ye isọn̄ oro esop itiaba ẹsidụkde. Owo 33 emi ẹdude ke Bethel Moldova ẹma ẹnem esịt ndikụt isenowo emi ẹtode Germany, Ireland, Netherlands, Romania, Russia, Ukraine, ye United States, ẹdi edinam ediyak nnọ oro. Mbon oro ẹkesọn̄ọde ẹda ẹnam n̄kpọ Jehovah ke ini ẹkekpande utom nnyịn ke idụt oro—emi ndusụk mmọ ẹkesitienede ẹsion̄o n̄wed nnyịn ẹwet ke ubọk ẹdeme—ẹma ẹtiene ẹdụk edinam oro. Ediwak mbon oro ẹketienede ẹdụk ẹkedi mbon oro ẹketan̄de ye ete ye eka mmọ ẹka Siberia ke ini ẹkekọbọde Mme Ntiense Jehovah ke ini ukara Soviet Union. Ke Sunday, Brọda Lett ama ọnọ ata edinem utịn̄ikọ oro ẹkekabarede ke usem Romanian ye Russian ẹnọ otuowo oro ẹkewakde ẹsịm 14,705, kpa n̄wakn̄kan ibat Mme Ntiense Jehovah oro akanam ẹsopde idem ke Moldova.

Jesus ọkọdọhọ ke oyom nnyịn ‘ibọn̄ akam, ikunyụn̄ ukpa mba.’ (Luke 18:1) Ama ọbọn̄ akam, oro ayanam etetịm enyene idotenyịn. Mmọdo, ‘kûdop ndibọn̄ akam,’ ‘kọbọ ke akam.’ (1 Thess. 5:17; Rome 12:12) Nte anamde oro, “Abasi emem . . . akpakam ọnọ [fi] kpukpru nti n̄kpọ ndinam uduak esie, anamde ke idem [fo] se itịmde inem enye esịt ke iso esie ebe ke Jesus Christ.”—Heb. 13:20, 21.