Ke October 2012, ẹma ẹberede ebiet emi ẹbonde n̄kani n̄kpọ ye ndise emi ẹwụtde se Mme Ntiense Jehovah ẹkenamde ke ini edem. Itie emi odu ke Brooklyn ke New York, ndien enyene-idem esisan̄a ke idemesie ese mme n̄kpọ emi. Mme n̄kpọ emi ẹwụt nte mbon oro ẹkedomode ndidu uwem ekekem ye Ido Ukpono Christ oro Jesus ọkọtọn̄ọde ẹkesinde ukeme ẹkenyụn̄ ẹsobode afanikọn̄.

Ke ata akpa urua, se ibede isenowo ye mbonubon Bethel 4,200 ẹma ẹsan̄a ẹse mme n̄kpọ emi. Naomi, Ntiense emi odụn̄de ke mbọhọ oro, akasan̄a ese ke ndondo oro ẹkebererede ebiet oro. Enye ọkọdọhọ ete: “Nte ẹbonde mme n̄kpọ ẹtiene ini oro n̄kpọ eketịbede anam mi mfiọk ini ye  ntak emi n̄kpọ eketịbede. Mma n̄kpep ekese n̄kpọ mban̄a esop Abasi ye mbụk eyomfịn oro aban̄ade esop emi.”

Mme n̄kpọ oro ẹsan̄ade ẹse ẹtọn̄ọ ye se iketịbede ke eyo mme Christian ke isua 33 E.N. tutu esịm idahaemi. Ẹbon mme n̄kpọ emi ke ikpehe inan̄. Ikpehe kiet kiet enyene ibuotikọ emi ẹdade ẹto N̄wed Abasi ye ibio ibio vidio Ikọmbakara emi ẹwetde-wet se ẹtịn̄de ke usem itiaba.

Ibuotikọ akpa ikpehe edi, “Mme Owo Ẹma Ekịm,” ndien ẹda enye ẹto ikọ Jesus emi ẹwetde ke John 3:19. Bible ama ọdọhọ ke mme apostle ẹma ẹkpan̄a, ke mme idiọkowo “ẹyedaha ẹda . . . ẹtịn̄ ukwan̄ ikọ.” (Utom 20:30) Ẹma ẹsinen̄ede ẹmia mbon oro mîkenyịmeke ye se ẹkekpepde ini oro ufen.

Ọyọhọ ikpehe iba edi ata isio ye enye oro. Ibuotikọ esie edi, “Yak Un̄wana Ayama,” emi ẹdade ẹto 2 Corinth 4:6, ndien mme n̄kpọ esie ẹtọn̄ọ ke utịt utịt iduọk isua 1800 emi mbon oro ẹkekpepde Bible ke ofụri esịt ẹkefiakde ẹtọn̄ọ  ndikpep N̄wed Abasi. Mmọ ẹma ẹtre ndikpep mme n̄kpọ oro ẹkesikpepde ke anyan ini edi emi mîkemke ye Bible, ẹnyụn̄ ẹkwọrọ akpanikọ emi esịnde owo ke un̄wana uko uko. Ikpehe emi owụt nte ifiọk mmọ okokponde ye nte mmọ ẹkewakde mbemiso akpa ekọn̄ ererimbot.

Isan̄ oro ada owo esịm ubet emi owụtde se ẹkenamde, emi osụk akpade Mme Ntiense Jehovah idem tutu esịm mfịn. Ke 1914, Nditọ Ukpepn̄kpọ Bible (nte ẹkediọn̄ọde Mme Ntiense Jehovah ini oro) ẹma ẹtọn̄ọ ndisio fim “Photo-Drama of Creation.” Ediwak miliọn owo ẹma ẹse fim emi, emi ekedide foto ye mme ndise emi ẹnamde-nam n̄kpọ ẹwụt ye uyo emi ẹkemụmde-mụm ẹnịm. Ndusụk n̄kpọ oro ẹkebonde man ẹsan̄a ẹse ẹdi mme ata akpa ndise oro ẹkewetde, ye se ibede ndiye ndise slide 500, ndien ẹsibre ntọn̄ọ fim oro ibio ibio.

Ukọbọ oro Satan ọkọbọde mme anditiene Christ, emi ẹtịn̄de ke Ediyarade 12:17, edi ibuotikọ ọyọhọ ikpehe ita,  emi edide “Dragon Ayat Esịt.” Ẹwụt nte mme Christian mîketieneke in̄wana ekọn̄ ke ikpehe emi. Ke adianade ye mme n̄kpọ ye ndise oro ẹwụtde, mbio mbio vidio ẹwụt nte ẹkedomode ndinyịk mbon oro ubieresịt mmọ mîkenyịmeke mmọ ẹn̄wana ekọn̄, utọ nte Remigio Cuminetti ke Italy, emi ekesịnde ndisịne ọfọn̄ekọn̄ m̀mê nditiene n̄n̄wana akpa ekọn̄ ererimbot. Ibio ibio vidio en̄wen aban̄a Alois Moser emi otode Austria. Enye ikenyịmeke ndidọhọ “Edinyan̄a Enyene Hitler,” ndien emi ama anam ẹsio enye ke utom, n̄ko nte ini akakade, ẹma ẹnọ enye aka ufọk-n̄kpọkọbi Dachau. Ẹma ẹnam mbiet ubet ufọk-n̄kpọbi emi un̄wana ikan̄ edide mbukpọn̄ mbukpọn̄ man odot ye mme ndise oro ẹwụtde nte ẹkekọbide Mme Ntiense Jehovah ke Greece, Japan, Poland, se ẹkediọn̄ọde nte Yugoslavia, ye mme ebiet en̄wen, ke ndinam se ido ukpono mmọ ekpepde mmọ.

Ibuotikọ akpatre ikpehe edi “Eti Mbụk Emi Enyenede Kpukpru Idụt,” emi owụtde se Mme Ntiense Jehovah ẹnamde ke mme isua ndondo emi, ndien ẹda enye ẹto Ediyarade 14:6. Ẹkụt usọp usọp n̄kọri mmọ, ifịk ifịk utom ukwọrọikọ mmọ, ye ima emi mmọ ẹmade nditọete mmọ ke mme ndise oro ẹkọn̄de ke ibibene. Ke akpatre, ediwak kọmputa emi ẹkemede ndinam owo emek se enye oyomde ndise anam mme owo ẹse Ufọk Bible ye Ataya Brooklyn—oro edi, ufọk emi Mme Ntiense Jehovah ẹkesidade ẹnam n̄kpọ ke se ikande isua 100 emi ẹkebede.

Ẹbon mme n̄kpọ emi ke 25 Columbia Heights ke Brooklyn ke New York. Ẹsiberede enye ke Monday esịm Friday, ke n̄kanika itiaita usenubọk esịm n̄kanika ition mbubreyo, ndien edi ke mfọn. Edieke odụn̄de ke New York City, di dise mme n̄kpọ emi ẹwutde se iketịbede ke ini edem mi!