Ẹkesinịm mbono ke akani ntaha ufọk unam mmịn ke isua 13 ke Kutaisi, udiana n̄kponn̄kan obio ke Georgia. Ẹma ẹsifụk ọkpọ ke ọkọm mbak edịm edidụt mme andidụk mbono ke idem. Idahaemi nditọete ẹnyene obufa ediye Ufọkmbono Obio Ubọn̄ oro ẹsidade ẹnịm mbono n̄ko. Ke ini ẹkebọpde ufọkmbono emi, mme anamutom unyịmesịt 50 ẹkesion̄o itiat ubọpufọk ke ubomisọn̄ mbiomo ke ini mme bodisi ẹkedide ndise se itịbede. Sia mme bodisi oro ẹkemade idatesịt ye ifịk mme anamutom oro, mmọ ẹma ẹtoro nditọete oro ẹnyụn̄ ẹtiene  ẹsion̄o itiat oro. Mmọ ẹma ẹdọhọ nditọete oro ẹte ẹkot mmimọ edieke owo ọnọde mmọ afanikọn̄. Mme bodisi oro ẹma ẹdọhọ ke mmimọ iyetiene idụk akpa mbono oro ẹdinịmde ke obufa ufọkmbono oro.

Malachi edi ebiowo emi odụn̄de ke Burundi, ndien enye esitọ in̄wan̄ onyụn̄ awat mbiomo ke enan̄ukwak. Malachi ama ebiere ndisika itie oro ẹkebọpde Ufọkmbono Obio Ubọn̄ mmọ kpukpru usen man eketiene anam utom. Edi man enye anam emi, ama oyom enye enyene okụk ndida nse mban̄a ubon esie ke ọfiọn̄ iba oro ẹdinamde utom oro. Ntre, enye ama anyam enan̄ukwak esie onyụn̄ ayak ubak okụk ọnọ n̄wan esie ada ese aban̄a ubon, esịn ubak eken ke ekebe etịbe ẹda ẹnam utom oro. Ke ntak ukeme emi enye ekesịnde mi, mme asan̄autom ubọp Ufọkmbono Obio Ubọn̄ ẹma ẹkpep enye utom. Ke ẹma ẹkebọp Ufọkmbono Obio Ubọn̄ oro ẹkụre, enye ama enyene utom sia mme owo ẹma ẹkụt ke enye enen̄ede ọfiọk utom ubọpufọk. Idahaemi Malachi afiak edep enan̄ukwak!

Ndibọp mme Ufọkmbono Obio Ubọn̄ ke mme obio-in̄wan̄ Malawi asan̄a ye akpan mfịna. Ke isua utom emi ebede, ẹma ẹbọp ufọkmbono kiet ke obio emi usụn̄ ọdiọkde etieti. Nditọete ke n̄kọk itieutom ẹma ẹda jeep ẹtan̄ n̄kpọ ubọpufọk ẹka itie ubọp ufọkmbono oro. Nditọete ke n̄kann̄kụk oro ẹkedọhọ ke mme owo ẹnen̄ede ẹma utom oro. Ediwak mbon oro mîdịghe Ntiense ẹma ẹsitiene ẹnam utom tutu n̄kụteyo, ẹsion̄o ntan, itiat, simen, ye tian ke ubomisọn̄. Ke nditịm ntịn̄, odu ndusụk ini emi mbon oro mîdịghe Ntiense ẹkewakde ẹkan Mme Ntiense! Sia mbio obio oro ẹmade ukeme oro  Mme Ntiense Jehovah ẹsịnde ndibọp ndiye itie utuakibuot ke mme obio-in̄wan̄, emi esịn udọn̄ ọnọ mmọ nditiene nnam utom oro.

Ebe ye n̄wan emi ẹdide mme akpan asiakusụn̄ ke Côte d’Ivoire ẹsikpep Bible ke usem Bete ye ebe ye n̄wan emi ẹnyenede nditọ duop. Ke May 2013, ke ẹkeyom ndinịm akpa mbono ke usem Bete ke Daloa, ndien kpukpru owo ke ubon oro ẹma ẹyom nditiene n̄ka. Edi okụk ukpeusụn̄ ekedi n̄kpọ nte naira 250 uka ye unyọn̄ ke owo kiet, ndien ete ikekemeke ndikpe nnọ ofụri ubon. Edi sia enye ekenen̄erede oyom ndika, enye ama osio ekikere edi. Enye ama ọnọ adiaha esie n̄kpọ nte naira 90 ete ada anyam swid, ndien adiaha esie ama anyam. Enye ama enyene udori oro ekekemde ndida n̄kpe usụn̄. Ete ama ọnọ nditọ eken kpasụk ntre n̄ko—oro edi, ọnọ kpukpru mmọ n̄kpọ nte naira 90 ẹda ẹtọn̄ọ ndinyam swid tutu kpukpru mmọ ẹnyene okụk ẹkem ndida n̄kpe usụn̄. Ke akpatre, kpukpru mmọ ẹma ẹsan̄a ye mbon eken ẹka mbono oro. Esịt ekenem mmọ didie ntem ndikop nte ẹnọde utịn̄ikọ ke usem emana mmọ!