KE 1997, ke ini ẹken̄wanade ye ukara ke Freetown, mma nnyịme ndisimen leta ke Freetown n̄ka ebiet oro ẹkedade nte n̄kọk itieutom ke Conakry ke Guinea.

Mma n̄kodụk bọs ye mbon en̄wen ke itiembehe bọs. Ima ikop nte itiat ikan̄ ẹduọn̄ọde ko nsannsan, ndien oro ama enen̄ede anam nnyịn ndịk. Nte ikawatde ke obio, ẹma ẹtomo ikan̄ ẹkpere nnyịn. Awat ọ-bọs ama afiak edem akasan̄a usụn̄ en̄wen. Ikebịghike ke oro ebede, otu mbon en̄wan ẹma ẹdọhọ nnyịn ituak ida inyụn̄ iwọn̄ọ ke bọs oro. Ẹma ẹdọhọ nnyịn ibe ke ẹma ẹkefak nnyịn mbụme. Ekem otu en̄wen ẹma ẹdọhọ nnyịn ituak ida. Edi sia owo kiet ke bọs oro ọkọfiọkde etubom mmọ, mmọ n̄ko ẹma ẹyak nnyịn ibe. Ke utịt utịt obio, ima isobo ọyọhọ otu ita, mmọ ẹma ẹdọhọ nnyịn ibe ke ẹma ẹkefak nnyịn mbụme. Nte ikosụk iwatde ika edem edere, ima ibe ediwak ebiet emi mbon en̄wan  oro ẹdade ẹkpeme usụn̄ tutu ikesịm Conakry ke mbubreyo usen oro, ntọn̄ ama onyụn̄ ọyọhọ bọs oro.

Ke ini n̄kesifiakde n̄ka, mma nsikama mme katọn n̄wed, n̄kpọutom ọfis, mme n̄wetnnịm n̄kpọ n̄kọk itieutom, ye mme n̄kpọ un̄wam. N̄kesiwak ndisan̄a ke ekpri moto m̀mê bọs. Edi ndusụk ini mma nsikpe mme owo ẹbiom mme katọn n̄wed ẹnọ mi ke ini nsan̄ade ke akai nnyụn̄ nsan̄a ke ubom ke ini mbede akpa.

Isan̄ kiet, ke ini n̄kadade n̄kpọutom ọfis nto Freetown n̄ka Conakry, mbon en̄wan ẹma ẹdọhọ bọs oro n̄kodụkde atuak ada ke adan̄a. Owo mmọ kiet ama okụt mbiomo mi onyụn̄ ọtọn̄ọ ndifak mi mbụme. Ke ebe oro, mma n̄kụt owo emi ikakade n̄wed ntre ke otu mbon en̄wan oro. Mbon en̄wan oro ẹkesikot enye Ikaki, enye okonyụn̄ enyene ndịk akan ke otu mmọ. Mma nsian owo oro akafakde mi mbụme ke n̄kedi ndikụt Ikaki, ekem nsịn uyo n̄kot enye. Enye Ikaki ama ọsọsọp ọfiọk ke ami ke edi onyụn̄ asan̄a ebịne mi. Nnyịn ima ifat kiet eken inyụn̄ isak. Ekem enye isakke aba.

Enye ama obụp mi ete, “Da, ndi emenyene mfịna?”

Mma mbọrọ nte, “Nyom ndibe n̄ka Guinea.”

Enye ama ọsọsọp ọdọhọ ikọt mmọ ẹyak bọs nnyịn ebe, owo okûdụn̄ọde.

Toto ke usen oro, ini ekededi emi nsịmde itie ndụn̄ọde oro, Ikaki ama esidọhọ ikọt mmọ ẹyak mi mbe. Mma nsinọ mbon en̄wan oro magazine nnyịn, ndien esịt ama esinem mmọ tutu. Oro akanam mmọ ẹsikot mi Owo Enyọn̄-Ukpeme.