Ke 1960, ukara ibak Trujillo ama efri ifiom. Mme owo ke ofụri ererimbot ye ke idem Dominican Republic ẹma ẹnyen̄e enye etieti. Ini emi ke Milton Henschel okoto ibuot itieutom nnyịn ekenịm mbono usen ita do ke January 1961. Owo 957 ẹkedi ẹdikop utịn̄ikọ ofụri owo, owo 27 ẹna baptism. Brọda Henschel ama ada ifet emi an̄wam nditọete do ẹfiak ẹtọn̄ọ ukwọrọikọ ẹnyụn̄ ẹwet map efakutom.

Ẹma ẹnọ mme esenyịn circuit iba, Enrique Glass ye Julián López, ẹkese mme esop. Julián ọdọhọ ete: “Kpukpru esop ke edem edere ẹkedu ke circuit mi; ẹma ẹsịn esop iba ke edem usiahautịn ẹnọ mi n̄ko. Mme esop eken ke edem usiahautịn ye kpukpru esop ke edem usụk ẹkedu ke circuit Enrique.” Ndika n̄kese mme esop ama ọsọn̄ọ nditọete idem ndika iso nnam n̄kpọ Abasi, anam mmọ ẹfiak ẹkeme ndisiwet n̄kọk itieutom, n̄kọk itieutom ẹnyụn̄ ẹwet mmọ n̄ko.

Salvino Ferrari ye Helen an̄wan esie emi ẹkekụrede n̄wed ke ọyọhọ otu iba ke Ufọkn̄wed Gilead ẹma ẹdisịm ke 1961. Mmọ ẹma ẹnanam utom isụn̄utom ke Cuba, ndien ifiọk emi mmọ ẹkenyenede do ama enen̄ede an̄wam ke akwa utom oro mmọ ẹkedide ẹdikụt ke Dominican Republic. Nte ini akakade, Salvino ama edi owo Kọmiti N̄kọk Itieutom idụt oro tutu enye akpa ke 1997. Ofụri isua emi Helen an̄wan esie anamde utom ofụri ini idahaemi ẹdi isua 79. Ediwak ke otu isua emi ẹkedi ini emi enye akanamde utom isụn̄utom.

Ikebịghike ke Brọda Ferrari ye n̄wan esie ẹma ẹkesịm Dominican Republic, Trujillo ama akpa afai afai. Ẹketop  enye okoneyo ẹwot ke esịt moto esie ke May 30, 1961. Edi emi ikanamke emem odu ke idụt oro, ndutịme okosụk ododu ke ukara ye ke obio ke ediwak isua.

Ẹma ẹnọ ediwak isụn̄utom en̄wen ẹdi. Usen iba kpọt ke ẹma ẹkewot Trujillo, ẹma ẹsio owo inan̄ ke n̄kọk itieutom ke Puerto Rico ẹnọ ẹdi Dominican Republic. Mmọ ẹkedi William Dingman emi ekesịnede ke ata akpa otu emi ẹkekade Ufọkn̄wed Gilead ye Estelle an̄wan esie, ye Thelma Critz ye Flossie Coroneos. William ọdọhọ ete: “Ndutịme ama okpon etieti ke ini nnyịn idide idisịm. Mbonekọn̄ ẹkedu ke kpukpru ebiet. Sia ẹkekerede ke ndusụk owo ẹkeme ndifiak ndomo ndibọ ukara, mbonekọn̄ emi ẹkesese kpukpru se owo akamade. Mmọ ẹma ẹda ke ata ediwak itie ke usụn̄, ẹnyụn̄ ẹse se ikọdọn̄ọde ke ekpat nnyịn. Ẹma ẹsision̄o kpukpru n̄kpọ ke ekpat nnyịn ẹse, ọkpọkọm n̄kpọ enye oro ekekpri didie.” Ikememke utom ndikwọrọ ikọ do ini oro.

William ọdọhọ ete: “Ke ini Trujillo akakarade ukara ibak esie, ẹkedọhọ mme owo ke Mme Ntiense Jehovah ẹdi mbon Communist, ke mmọ ẹdiọk ẹkan ke ererimbot. . . . Ima inam mme owo ẹdiọn̄ọ sụn̄sụn̄ ite ke ẹkebabian̄a mmọ.” Nte ẹkefiakde ẹsịn idem ẹkwọrọ ikọ ama anam ediwak owo ẹdụk esop. Ke utịt isua utom 1961, akpan asiakusụn̄ 33 ẹkedu ke idụt emi.