MMA nsịn idem ke Ufọkabasi Catholic etieti n̄konyụn̄ ndaha n̄kpọ Abasi nnam mbubru. N̄kedi eyen n̄ka ikwọ, mma nsinyụn̄ ntiene mme oku n̄ka ebiet ekededi emi mmọ ẹkade ndinam n̄kpọ ufọkabasi nnyụn̄ nnịm Mass ke idụt nnyịn. Edi ke 1955, adiahaeka mi ama eneme nneme ye ami aban̄a Paradise. Enye ama ọnọ mi Bible, ekpri n̄wed emi ẹkotde “This Good News of the Kingdom,” ye n̄wed “Yak Abasi Edi Akpanikö.” Mma mma mme n̄wed emi etieti, ntre mma n̄kobụp oku nnyịn m̀mê mmekeme ndikot Bible oro. Enye ama ọdọhọ ke nyadama edieke n̄kotde, edi mma nsụk n̄kot n̄kpọ mi.

Ke mma n̄kọwọrọ n̄kodụn̄ ye ete ete ye eka ete mi ke Boca Chica, oku kiet do ama obụp mi m̀mê nsinam mmen̄kaha ufọkabasi aba. Mma ndọhọ enye ke mmokụt ke ediwak n̄kpọ emi ẹkpepde ke ufọkabasi idụhe ke Bible. Esịt ama ayat enye etieti, enye onyụn̄ ofiori ete: “Se mi n̄kaiferi, yak ndọhọ fi, afo edi erọn̄ emi oyode ọkpọn̄ otuerọn̄ mi.”

 Mma mbọrọ enye nte: “Ihih, afo akam oyo ọkpọn̄ otuerọn̄ Jehovah, sia idịghe owo ndomokiet enyene erọn̄, Jehovah enyene.”

N̄kafiakke n̄ka ufọkabasi aba. Mma n̄wọrọ n̄kodụn̄ ye adiahaeka mi, nnyụn̄ nna baptism ke ọfiọn̄ itiokiet ẹbede tọn̄ọ nte n̄kọdiọn̄ọ akpanikọ. Inikiet inikiet, mma ntọn̄ọ utom usiakusụn̄ ofụri ini. Ke isua kiet ama ekebe, mma ndọ Enrique Glass emi ekedide esenyịn circuit. Usen kiet ke ini isụk ikwọrọde ikọ ke itie nduọkodudu ke La Romana, mme bodisi ẹma ẹmụm Enrique. Nte mmọ ẹkesụk ẹmende enye ẹdaha, mma mfehe ntiene mmọ nnyụn̄ ndọhọ mmọ nte: “Ami n̄ko ndi Ntiense Jehovah, mma nnyụn̄ ntiene enye n̄kwọrọ ikọ. Nso inam mbufo mîtieneke imụm mi?” Edi mmọ ikamaha ndimụm mi.

Mbemiso emi, ẹma ẹkọkọbi Enrique ediwak ini; kpukpru ini emi ẹkekọbide enye ẹkedi isua itiaba ye ubak. Isan̄ enye emi ẹkebiere isua kiet ye ọfiọn̄ itiaita ẹnọ enye. Mma nsika n̄kese enye kpukpru Sunday. Ke Sunday kiet emi n̄kakade do, akwaowo ufọk-n̄kpọkọbi oro ama obụp mi ete, “Nso ida fi idi mi?”

Mma ndọhọ enye nte, “Ẹkemụm ebe mi ẹdisịn mi sia edide Ntiense Jehovah.”

Enye ama ọdọhọ mi ete, “Osụk ededi n̄kaiferi, omonyụn̄ ekeme ndinyene mfọniso ke ini iso. Nso inam atahade uwem fo ye Mme Ntiense Jehovah?”

Mma mbọrọ enye nte, “Ami ke idemmi ndi Ntiense Jehovah. Ọkpọkọm owot mi utịm ikatiaba onyụn̄ anam mi nset, ndisụk ndedi Ntiense Jehovah.” Ama akak ete emi ndien, enye ama ọdọhọ n̄wọrọ nnyọn̄.

Ke ini ẹkenyịmede ifiak itọn̄ọ utom, ami ye Enrique ima inam utom circuit ye district ke ediwak isua. Enrique ama akpa ke March 8, 2008, edi ke nnanam utom usiakusụn̄ ofụri ini tutu emi.