Isọn̄ Ẹkpebahade Hispaniola ke itie ita, mbon Dominican Republic ẹdụn̄ ke mbahade iba, mbon Haiti ẹdụn̄ ke mbahade kiet. Ikpọ akai, ikpọ obot, mme edep, ye mme desat ẹdu ke Dominican Republic. N̄kon̄n̄kan obot ke idụt emi ekere Pico Duarte onyụn̄ edi n̄kpọ nte mita 3,175. N̄kan̄ emi ekperede mmọn̄ enyene ndiye esụk utan; n̄kan̄ eken enyene itịghede emi ọfọnde etieti se ẹtọde n̄kpọ, utọ nte itịghede emi ẹkotde Cibao Valley.

Mme Owo Ibat ibat owo ẹdi ata mfia owo mîdịghe ẹdi ata mbubịt owo. Ediwak ẹbabuaha; ete oto Europe, eka oto Africa, mîdịghe eka oto Europe, ete oto Africa. Mbon Haiti ẹwak do n̄ko.

Usem Spanish edi akpan usem mmọ.

 Se Ẹnamde Ẹda Ẹdu Uwem Ediwak owo ẹnam utom ke kọmpeni emi ẹsidọkde isọn̄ ẹsion̄o n̄kpọ, itie unam sugar, kọfi, ye sika. N̄kpọ en̄wen emi anamde okụk odụk do edi ke idụt emi ẹsinam nsio nsio n̄kpọ, mme owo ẹsinyụn̄ ẹka ẹkese ndiye itie do.

Nte Eyo Etiede Eyo ifiopke ikaha do, esiwak ndidi n̄kpọ nte Celsius 25. Edịm esiwak ndidep ke n̄kan̄ edere edere emi etiede obot obot, edi idepke ntre ke mme ebiet en̄wen. Ke ini ke ini, oyobio esibiat n̄kpọ do.

Udia ye Mbre Akpan udia mmọ esịne edesi, ọkọti, ye ikọn̄. Mbon Dominican Republic ẹsima n̄kpọ emi ẹkọde ke mmọn̄, mfri, ntokon, ye ufafran̄ ukọm. Mmọ ẹsidọn̄ mme n̄kpọ emi n̄ko ke ọwọrọetop udia mmọ emi ẹkotde La Bandera Dominicana. Mbon Dominican Republic ẹsima ndibre baseball, ẹma ikwọ ye unek, akpan akpan unek emi ẹkotde merengue. Mmọ ẹsima ndifri ifiom, ndibre guitar, ekọmọ, ye ikon emi ẹkotde marimba.