Jehovah eyemen kpukpru ndiọi edinam oro Satan anamde efep ofụri ofụri. Jehovah amanam Jesus edi Edidem ọnọ ofụri isọn̄. Ke idak ukara esie, ẹyenam isọn̄ akabade edi paradise.—Daniel 7:13, 14; Luke 23:43.

Jehovah ọmọn̄wọn̄ọ ndinam mme n̄kpọ ẹmi:

• UWAK UDIA: “Isọn̄ omon̄wụm mbun̄wụm esie; Abasi, kpa Abasi nnyịn eyediọn̄ nnyịn.” “Uwak ibokpot ẹyedu ke isọn̄ ke nsom ikpọ obot.”—Psalm 67:6; 72:16.

• EKỌN̄ IDỤHE ABA: “Mbufo ẹdi ẹdise se Jehovah anamde, emi esịnde n̄wụre ke ererimbot. Enye anam ekọn̄ etre tutu osịm ke utịt ekondo.”—Psalm 46:8, 9.

• NDIỌI OWO IDỤHE: “Koro ẹyekpok mme idiọkowo ẹfep . . . Koro osụk esisịt idiọkowo ididụhe: ndien ke afo etịn̄de enyịn ke ebiet esie, enye ididụhe.”—Psalm 37:9, 10.

• UDỌN̄Ọ, MFỤHỌ, M̀MÊ N̄KPA IDỤHE: “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ ẹyenek nte edop, edeme imụm eyenyụn̄ ọkwọ.”—Isaiah 35:5, 6.

   “Abasi ke Idemesie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”—Ediyarade 21:3, 4.

Ke okpụhọrede ọkpọn̄ Satan ye mme demon esie, akananam Jehovah isụhe nsu. Ana kpukpru se enye ọn̄wọn̄ọde ndinam ẹsu (Luke 1:36, 37) Jehovah ama fi onyụn̄ oyom fi odụn̄ ke Paradise oro enye edinamde. Ntre sobo ye Mme Ntiense Jehovah man ekpep ekese n̄kpọ efen efen aban̄a mme utịbe utịbe akpanikọ oro ẹkụtde ke Ikọ Abasi. Edieke afo adade akpanikọ emi esịn ke edinam ke uwem fo, afo eyewọrọ ke ufụn nsu, nsunsu ekikere, ye unana ifiọk. Nte ini akade, ẹyekam ẹsio fi ke ufụn idiọkn̄kpọ ye n̄kpa. Nte Jesus ọkọdọhọde ete: “Mbufo ẹyefiọk akpanikọ, akpanikọ eyenyụn̄ anam mbufo ẹwọrọ ufụn.”—John 8:32.