Mbonubon Bethel ẹsinam utom ke nsio nsio itieutom man ẹse ẹban̄a utom ukwọrọikọ oro ẹnamde ke idụt kiet m̀mê ke ediwak idụt. Mmọ ẹkeme ndinam utom ke itie ukabade n̄wed, itie umịn̄ mme magazine, itie udian n̄wed, itie ubon n̄wed oro ẹmịn̄de, itieutom oro esede aban̄a CD ye DVD, mîdịghe ẹse ẹban̄a mme utom eken ke ikpehe oro n̄kọk itieutom mmọ esede aban̄a.

Kọmiti N̄kọk Itieutom ẹsise enyịn ke utom. Otu Emi Ẹsede Ẹban̄a Utom Mme Ntiense Jehovah ẹyak utom ẹdise mban̄a n̄kọk itieutom ẹnọ Kọmiti N̄kọk Itieutom emi ẹsịnede mbiowo ita m̀mê ẹwakde ẹkan oro, emi ẹtịmde ẹdot. Kọmiti emi ẹsisian mmọ n̄kọri oro ẹnamde ke utom ke idụt kiet kiet emi ẹdude ke idak kọmiti oro ẹnyụn̄ ẹsian mmọ mfịna ekededi oro edemerede. Mme utọ ntọt oro ẹsin̄wam Otu Emi Ẹsede Ẹban̄a Utom Mme Ntiense Jehovah ẹbiere se ẹdinemede ke mme n̄wed oro ẹdisiode ye ke mme mbono esop ye mme mbono. Otu Emi Ẹsede Ẹban̄a Utom Mme Ntiense Jehovah esidọn̄ mbon oro ẹdade ke ibuot mmọ ẹte ẹka ẹkese mme n̄kọk itieutom ke ini ke ini ẹnyụn̄ ẹnọ mme Kọmiti N̄kọk Itieutom ndausụn̄ ke nte ẹkpenamde utom mmọ. (Mme N̄ke 11:14) Ẹsinam san̄asan̄a ndutịm man esenowo emi ọnọ utịn̄ikọ emi esịnde udọn̄ ọnọ mbon oro ẹdụn̄de ke n̄kann̄kụk n̄kọk itieutom.

Ẹnọ mme esop un̄wam. Nditọete iren oro ẹdotde ẹdu ke n̄kọk itieutom, emi ẹsinọde unyịme man ẹsiak mbufa esop. Mmọ n̄ko ẹsinọ ndausụn̄ ke utom mme asiakusụn̄, mme isụn̄utom, ye mme esenyịn circuit oro ẹnamde utom ke efakutom oro n̄kọk itieutom esede aban̄a. Mmọ ẹsitịm n̄kpri ye ikpọ mbono, ẹse ẹban̄a edibọp mbufa Ufọkmbono Obio Ubọn̄, ẹnyụn̄ ẹkụt ẹte ke ẹnọ mme n̄wed oro esop ẹketobode ẹsọk mmọ. Kpukpru n̄kpọ oro ẹnamde ke n̄kọk itieutom ẹtịp ẹsịn ke ndinam utom ukwọrọikọ asan̄a ke ndutịm.—1 Corinth 14:33, 40.

• Didie ke mme Kọmiti N̄kọk Itieutom ẹn̄wam Otu Emi Ẹsede Ẹban̄a Utom Mme Ntiense Jehovah?

• Nso ye nso ke ẹsinam ke n̄kọk itieutom?