Ndidi ufan Abasi edi mfọnn̄kan n̄kpọ oro afo ekemede ndinam. Abasi eyekpep fi nte ekemede ndikop inemesịt nnyụn̄ ndu ke ifụre; enye ayanam fi ọbọhọ ufụn ndiọi edinịm ke akpanikọ ye mme edinam ẹnọde unan. Enye ọyọbiọn̄ utọn̄ ke akam fo. Enye ayan̄wam fi enyene ifụre ekikere ye uko. (Psalm 71:5; 73:28) Abasi ọyọnọ fi ibetedem ke mme ini afanikọn̄. (Psalm 18:18) Ndien Abasi ọnọ fi enọ esie emi edide nsinsi uwem.—Rome 6:23.

Nte afo asan̄ade ekpere Abasi, afo ayasan̄a ekpere mme ufan Abasi. Mmọ ẹyekabade ẹdi mme ufan fo n̄ko. Ke akpanikọ, mmọ ẹditie nte nditọeka ẹnọ fi. Mmọ ẹyekop inemesịt ndikpep fi mban̄a Abasi ndien ẹyen̄wam fi ẹnyụn̄ ẹsịn udọn̄ ẹnọ fi.

Nnyịn idịghe n̄ka ye Abasi. Nte afo oyomde itie ufan ye Abasi, ana afo ọfiọk akpan n̄kpọ kiet. Itie ufan ye Abasi idịghe itie ufan ke ufọt ubọkn̄ka. Enye enen̄ede okpon onyụn̄ enyene ọniọn̄ onyụn̄ enen̄ede okop odudu akan nnyịn. Enye edi nnennen Andikara nnyịn. Ntre edieke nnyịn iyomde ndidi ufan esie, ana nnyịn ikpan̄ utọn̄ inọ enye inyụn̄ inam se enye ọdọhọde nnyịn inam. Emi kpukpru ini edidi ke ufọn nnyịn.—Isaiah 48:18.