Afo emekeme ndikpep n̄kpọ mban̄a Jehovah ebe ke ndikot Bible. Ke anyan ini ko, Abasi ama ẹmek ndusụk owo man ẹwet mme ekikere esie ẹnịm. Ẹkot mme uwetn̄kpọ oro Bible. Mfịn nnyịn ikpep n̄kpọ iban̄a Abasi ebe ke ndikot Bible. Sia Bible esịnede ikọ, m̀mê etop Jehovah, ẹkot enye n̄ko Ikọ Abasi. Nnyịn imekeme ndinịm se Bible etịn̄de ke akpanikọ koro akananam Jehovah isụhu nsu. ‘Abasi ikemeke ndisu nsu.’ (Mme Hebrew 6:18) Ikọ Abasi edi akpanikọ.—John 17:17.

Bible edi kiet ke otu ata ọsọn̄urua enọ emi Abasi ọnọde nnyịn. Enye etie nte leta emi ima ima ete ewetde ọnọ ẹsọk nditọ esie. Enye asian nnyịn aban̄a un̄wọn̄ọ Abasi ndinam isọn̄ akabade edi utịbe utịbe ebietidụn̄—paradise. Enye asian nnyịn se enye akanamde ke eset, se enye anamde idahaemi, ye se enye edinamde ke ini iso inọ mme anam-akpanikọ nditọ esie. Enye n̄ko an̄wam nnyịn ndikọk  mme mfịna nnyịn ndinyụn̄ nnyene inemesịt.—2 Timothy 3:16, 17.

Mme Ntiense Jehovah ẹdi mme ufan Abasi; mmọ ẹyen̄wam fi ọfiọk se Bible ekpepde. Kam sian mmọ ke imoyom ndikpep Bible. Mmọ ibọhọ okụk ke ndinam emi. (Matthew 10:8) Ke adianade do, afo emekeme ndidụk mme mbono esop Christian. Ẹnịm mmọ ẹmi ke mme itie utuakibuot ẹkotde mme Ufọkmbono Obio Ubọn̄. Edieke afo odụkde mme mbono esop Christian, afo ọyọsọsọp ọkọri ke ifiọk Abasi.

Afo emekeme ndikpep n̄kpọ mban̄a Abasi ebe ke mme n̄kpọ oro enye akanamde. Ke uwụtn̄kpọ, Bible ọdọhọ ete: “Abasi okobot enyọn̄ ye isọn̄.” (Genesis 1:1) Ke ini Jehovah okobotde “enyọn̄,” enye ama obot utịn. Nso ke oro asian nnyịn aban̄a Abasi idahaemi? Enye asian nnyịn ete ke Jehovah enyene akwa odudu. Enye kpọt ekeme ndibot okopodudu n̄kpọ nte utịn. Enye n̄ko asian nnyịn ete ke Jehovah enyene ọniọn̄, sia oyomde ọniọn̄ man ẹnam utịn, emi ọnọde ufiop ye un̄wana ndien akananam mînịmeke.

Edibotn̄kpọ Jehovah owụt ete ke enye ama nnyịn. Kere ban̄a kpukpru nsio nsio orụk mfri ẹmi ẹdude ke isọn̄. Jehovah ọkpọkọnọ nnyịn orụk mfri kiet kpọt—mîdịghe etre ndinọnọ. Utu ke oro, Jehovah ama ọnọ nnyịn ediwak orụk mfri ẹnyenede ediwak nsio nsio mbiet, idaha, uduot, ye inem. Emi owụt ete ke Jehovah idịghe Abasi emi enyenede ima kpọt edi emi enen̄erede atat ubọk n̄ko, ekerede aban̄a, onyụn̄ ọfọnde ido.—Psalm 104:24.