Ndiọi n̄kpọ oro ẹtịbede idahaemi ke ererimbot ẹwụt ẹte ke Paradise emekpere. Bible ama etịn̄ ete ke nnyịn iyokụt mme enyene-ndịk ini esisịt ini mbemiso Paradise edide. Nnyịn idu ke utọ ini oro idahaemi! Mmọ ẹmi ẹdi ndusụk n̄kpọ oro Bible ọkọdọhọde nte ẹditịbede.

Ikpọ ekọn̄. “Idụt ayadaha an̄wana ye idụt, obio edidem kiet oyonyụn̄ adaha an̄wana ye obio edidem efen.” (Matthew 24:7) Ntịn̄nnịm ikọ emi osu. Toto ke isua 1914, ẹn̄wana ekọn̄ ererimbot iba ye ediwak n̄kpri ekọn̄. Ediwak miliọn owo ẹkpan̄a ke mme ekọn̄ ẹmi.

Ntatara udọn̄ọ. “Mme idiọk udọn̄ọ ẹyenyụn̄ ẹdu ke nsio nsio ebiet.” (Luke 21:11) Nte emi etịbe? Ih. Kansa, udọn̄ọ esịt, akpaikpai ikọn̄, utoenyịn, AIDS, ye mme udọn̄ọ eken ẹwot ediwak miliọn owo.

Unana udia. Ke ofụri isọn̄ mme owo ẹdu oro mînyeneke udia oro ekemde. Ediwak miliọn owo ẹkpan̄a ke ntak ọbiọn̄ kpukpru isua. Emi edi idiọn̄ọ efen nte ke Paradise ọmọn̄ ọsọp edi. Bible ọdọhọ ete: “Akan̄ oyodu.”—Mark 13:8.

 Unyekisọn̄. “Unyekisọn̄ ẹyenyụn̄ ẹdu ke nsio nsio ebiet.” (Matthew 24:7) Emi n̄ko omosu ke eyo nnyịn. Se ibede owo miliọn kiet ẹkpan̄a ke unyekisọn̄ toto ke 1914.

Ndiọi owo. Mme owo ẹyedi “mme ama inyene” ye “mme ama idem.” Mmọ ‘ẹyema mbre ẹkan Abasi.’ Nditọ ‘ẹyesọn̄ ibuot ye ete ye eka.’ (2 Timothy 3:1-5) Ndi afo unyịmeke nte ke ediwak owo oro ẹtiede ntre ẹdu mfịn? Mmọ iwụtke ukpono inọ Abasi, ndien mmọ ẹsịn ntịme ye mbon oro ẹdomode ndikpep n̄kpọ mban̄a Abasi.

Ubiatibet. ‘Ukwan̄ido ọyọtọt’ n̄ko. (Matthew 24:12) Ekeme ndidi afo eyenyịme nte ke ubiatibet ọdiọk akan nte ekedide ke mme isua oro ẹkebede. Mme owo ke kpukpru ebiet ẹdu ke itiendịk edidi se ẹwode, ẹbian̄ade, m̀mê ẹnọde unan.

Kpukpru n̄kpọ ẹmi ẹwụt ẹte ke Obio Ubọn̄ Abasi emekpere. Bible ọdọhọ ete: “Ke ini mbufo ẹkụtde nte mme n̄kpọ ẹmi ẹtịbede, ẹfiọk ẹte Ubọn̄ Abasi ke ekpere.” (Luke 21:31) Nso idi Obio Ubọn̄ Abasi? Enye edi ukara Abasi eke heaven oro edidade Paradise edi ke isọn̄ emi. Obio Ubọn̄ Abasi ayada itie ukara owo.—Daniel 2:44.